29 Январ 2018
Дар толори Мақомоти иҷроияи ҳокимияти давлатии шаҳри Хуҷанд бо иштироки зиёда аз 40 нафар рӯзноманигорони дохилию хориҷӣ нишасти матбуотӣ оид ба натиҷаҳои фаъолият дар соли 2017 сурат гирифт.
Ба таъкиди Раиси шаҳр дар раванди саноатикунонии кишвар аз ҷониби корхонаҳои хурду калони шаҳри Хуҷанд ба маблағи 942,6 млн. сомонӣ маҳсулоти саноатӣ истеҳсол шуда, он нисбат ба соли пешина 22,6 дар сад афзоиш ёфта, 34,2 фоизи он (322,1 млн. сомонӣ) ба хориҷи кишвар содирот карда шудааст. Дар ин давра 20 адад корхонаҳои истеҳсолии хурду миёна (бо назардошти соҳибкорони инфиродӣ) таъсис дода шуда, аз ин ҳисоб 171 нафар шаҳрвандон бо ҷойи кори доимӣ таъмин шуданд. Бо мақсади тақвияти минбаъда ба иқтидори истеҳсолот ҷиҳати ташкили минтақаи саноатӣ дар соҳили рости шаҳр барои соҳибкороне, ки бо истеҳсоли маҳсулоти ивазкунандаи воридот фаъолият мебаранд 45 гектар замин ҷудо карда шудааст.
Иттилоъ дода шуд, ки ҷиҳати баланд бардоштани сатҳи некӯаҳволии мардум зиёда аз 2920 адад ҷойҳои нави корӣ (бо назардошти фаъолияти соҳибкорӣ) таъсис ёфта, 346 нафар бекорон касб омухта истодаанд. Музди миёнаи маоши кормандон бошад, 96,4 сомонӣ афзуда, ба 1222,7 сомонӣ расонида шуд. Дар натиҷаи чораҳои андешидашуда, иҷрои нақшаи буҷети давлатӣ 102,0 фоиз ва буҷети маҳаллӣ 101,6 фоиз таъмин гардид, ки он аз нақшаҳои пешбинишуда мутаносибан 6,7 ва 2,2 миллион сомонӣ зиёд ворид гардидааст. Бақияи қарзи андоз бошад нисбат ба аввали сол 2,2 млн. сомонӣ, ё 8,7 фоиз кам шудааст. Бояд қайд намуд, ки аз нақшаи 11 намуди андоз 10 намуд пурраю барзиёд таъмин гардида, 78,4 фоизи қисми хароҷоти буҷети маҳаллӣ ба соҳаҳои маориф, тандурустӣ, фарҳанг ва ҳифзи иҷтимоӣ масраф карда шудааст.
Раиси шаҳри Хуҷанд Маъруф Муҳаммадзода қайд кард, ки “Аз ҳисоби ба кор андохтани механизми шарикии рушд тавассути ҳамкориҳои давлатӣ ва соҳибкорӣ 23,7 миллион доллари амрикоӣ сармояҳои дохилию хориҷӣ ҷалб карда шуда, танҳо сармоягузории дохилӣ дар муқоиса бо соли пешина 2,1 маротиба афзуда, сармояи хориҷӣ бошад 15,3 дар сад зиёд шудааст. Дар самти бунёдкорию созандагӣ зиёда аз 64967 метри мураббаъ манзили истиқоматӣ сохта шуда, ҳаҷми маблағгузории асосӣ дар соҳаи сохтмон ба 182,4 млн. сомонӣ расида, ба маблағи 190,0 миллион сомонӣ фондҳои асосӣ ба истифода дода шуд”.
Таъкид шуд, ки бо мақсади дар сатҳи ба талаботи муосир ҷавобгӯй будани роҳҳо, дар ин давра 98 кӯчаю хиёбонҳои шаҳр ба масоҳати 31509 м2. ё 44,82 километр роҳҳо корҳои таъмиру мумфаршкунӣ ба сомон расонида шуданд.
Бо мақсади иҷрои дастуру супоришҳои Президенти мамлакат мӯҳтарам Эмомалӣ Раҳмон дар рӯзҳои иду ҷашнвораҳо зиёда аз 8900 нафар иштирокчиён ва маъюбони Ҷанги бузурги Ватанӣ, шахсони барӯманд, иштирокчиёни сохти конститутсионӣ, ятимону маъюбон ва оилаҳои камбизоату ниёзмандон аёдат карда шуда, барои сохтмон ва таъмири хонаҳои истиқоматӣ ба 585 нафар шаҳрвандони камбизоат кӯмаки моддӣ расонида шуда, ба 22 нафар аробачаи маъюбӣ супорида шуд. Инчунин 174 нафар кӯдакони ятиму бепарастор дар 30 маъракаи хайриявӣ хатнатӯй карда шудааст.
Вобаста ба соҳаи маориф зикр гардид, ки баҳри таъмиру азнавсозии муассисаҳои таълимӣ аз ҳисоби буҷети маҳаллӣ 1,6 млн. сомонӣ маблағҳои иловагӣ ҷудо гардида, ба 425 нафар хонандагони ятиму камбизоат либоси мактабӣ тақдим карда шуд. Хонандагони мактабҳои шаҳри Хуҷанд дар олимпиадаҳои вилоятӣ, ҷумҳуриявӣ ва байналмилалӣ соҳиби 4 медали тилло, 14 нуқра, 14 биринҷӣ ва 95 мақоми ифтихорӣ гардиданд.
Иттилоъ дода шуд, ки бахшида ба Соли ҷавонон зиёда аз 180 чорабиниҳои маънавӣ, фарҳангӣ ва варзишӣ доир гардида, дар соли 2017 варзишгарони шаҳр ба гирифтани 2811 медал, аз ҷумла, 980 медали тилло, 798 медали нуқра ва 1033 медали биринҷӣ ноил гардиданд. Бо ҷалби маблағҳои буҷетӣ, соҳибкорон ва сокинони маҳаллаҳо 20 адад майдончаҳои варзишӣ сохта ба истифода дода шуданд.Чорабиниҳои доиргардида барои баланд бардоштани сатҳи маърифати маънавию ҳуқуқӣ ва сиёсии сокинон, аз он ҷумла ҷавонон мусоидат намудааст, ки сатҳи ҷинояткорӣ низ нисбат ба ҳамин давраи соли 2016 ба миқдори 183 адад, ё 13,3 фоиз кам шудааст.
Ҷиҳати рушди соҳаи сайёҳӣ, ҷалби сайёҳони дохилӣ ва хориҷӣ чораҳои амалӣ андешида шуда истода, барои қабули меҳмонон 3 хатсайрҳои дохилӣ, ба монанди “Шоми Душанбе”, Искандаркӯл”, “Ҳафткӯли мӯъҷизадор”, 12 меҳмонхонаҳо, 32 ёдгориҳои таърихӣ, 3 ёдгориҳои археологӣ, 25 ёдгориҳои шаҳрсозиву меъморӣ ва санъат таъсис дода шуда, танҳо соли 2017 58,2 ҳазор нафар сайёҳон дидан намуданд. Аз ин шумора 2053 нафарашон аз хориҷи дур ва 1198 нафар аз Иттиҳоди давлатҳои мустақил мебошанд.
Раиси шаҳр таъкид дошт, ки “Мақомоти иҷроияи ҳокимияти давлатии шаҳри Хуҷанд дар “Соли рушди сайёҳӣ ва ҳунарҳои мардумӣ” бо дарки масъулият, тамоми имкониятҳоро ҷиҳати иҷрои дастуру супоришҳои Асосгузори сулҳу Ваҳдати миллӣ, Пешвои миллат, Президенти мамлакат мӯҳтарам Эмомалӣ Раҳмон зимни ироаи Паёми навбатии хеш ба Маҷлиси олӣ аз 22 декабри соли 2017 ва ҳам-чунин нишондодҳои иҷрокунандаи вазифаи Раиси вилояти Суғд мӯҳтарам Раҷаббой Аҳмадзода дар самти корҳои ободониву созандагӣ ва таъмини зинда-гии шоиста барои мардум сафарбар намуда, меҳнати софдилонаро пеш гирифта, барои рушди соҳаҳои мухталифи хоҷагии халқи шаҳр саҳми босазо мегузорад.
Иттилоъ дода шуд, ки дар соли 2018 дар шаҳри Хуҷанд таъмиру азнавсозӣ ва ба истифодадиҳии як қатор иншооти муҳим, аз ҷумла “Қалъаи Хуҷанд”, боғи “Дӯстии халқҳо”, гимназияи №1, муассисаи таҳсилоти томактабии №28, меҳмонхонаи замонавии “Парламент” ва ғайраҳо пешбинӣ гардидааст.
Сипас, ба Раиси шаҳри Хуҷанд Маъруф Муҳаммадзода аз ҷониби рӯзноманигорон, аз ҷумла: Ҷовиди Аштӣ (рӯзномаи “Ҷумҳурият”), Мирзоаъзам Мақсудов (рӯзномаи “Садои мардум), Дилрабо Анорқулова (телевизиони “Суғд”), Ҷамшеди Маъруф (радиои “Пайванд”), Раънои Муҳаммад (маҷаллаи “Кайҳон), Ҷӯра Юсуфӣ (маҷаллаи “Бонувони Тоҷикистон”), Файзулло Ҳасанов (рӯзномаи “Согдийская правда), Маъсум Имомов (радиои “Озодӣ”), Мадина Поччоева (ОИ “Суғднюс”), Ҳалим Ҷӯраев (ШТР “СМ-1”), Нӯъмони Раҷабзод (рӯзномаи “Омӯзгор”), Фарзона Муродӣ (рӯзномаи “Тоҷикистон”), Шоира Салимова (рӯзномаи “Ҳақиқати Суғд”), Мастонаи Мӯъминҷон (ШТР “7 ситора”) ва дигарон доир ба самтҳои мухталифии хоҷагии халқи шаҳр, аз ҷумла саҳми бахши хусусӣ дар ташаккулёбии буҷети шаҳр, хизматрасонии коммуналӣ, дастоварди маорифчиёни шаҳр, муроҷиати шаҳрвандон, бартарафкунии оқибати табиӣ рухдода, пешгирии сохтмонҳои ғайриқонунӣ, таъмиру азнавсозии макотиби таҳсилоти ҳамагонӣ, рушди сайёҳӣ ва ҳунарҳои мардумӣ, қадршиносии омӯзгорони пешқадам ва ғайра саволҳо дода, ҷавобҳои мушаххас дарёфтанд.
Дар поёни нишасти матбуотӣ Раиси шаҳри Хуҷанд Маъруф Муҳаммадзода аз рӯзноманигорон даъват ба амал овард, ки ҳамкории мутақобилаи судмандро ба роҳ монанд.
Дафтари матбуоти
Раиси шаҳри Хуҷанд
