30 Январ 2024
ҶАШНИ САДА – ПАРТАВИ ХУРШЕДИ ИСТИҚЛОЛ
Ҳамшаҳриёни азиз, меҳмонони ин шаҳри хуршедӣ!
Истиқлоли давлатии Ҷумҳурии Тоҷикистон миллати тоҷикро бо асолати худ наздик намуд, худшиносӣ ва худогоҳии мардуми кишвар боло рафт ва мероси маънавию таърихии халқи тоҷик эҳё гардид, ки дар саргаҳи ин хештаншиносиҳо Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Асосгузори Тоҷикистони мустақил мўҳтарам Эмомалӣ Раҳмон меистанд.
Чуноне маълум аст, 6-уми декабри соли 2023 зимни иҷлосияи 18-уми Кумитаи байниҳукуматӣ оид ба ҳифзи мероси фарҳангии ғайримоддии ЮНЕСКО номинаи муштараки Ҷумҳурии Тоҷикистон ва Ҷумҳурии исломии Эрон «Ҷашни Сада» ба Феҳристи мероси ғайримоддии башарият ворид гардид. Ин ҷашни мардуми машриқзамин бори дигар аз он шаҳодат медиҳад, ки миллати тоҷик, мардуми ориёитабор таърихи хеле куҳан дорад ва бо он ифтихор мекунад. Чуноне дар яке аз суханрониҳояшон Пешвои миллат мўҳтарам Эмомалӣ Раҳмон таъкид доштаанд: «Истиқлоли давлатӣ барои мардуми куҳанбунёди тоҷик имкони таърихие фароҳам овард, ки анъанаҳои фарҳангӣ ва ҷашнҳои миллии худро дар шаклу мўҳтавои наву замонавӣ эҳё ва таҷлил намояд. Ҷашнҳои аҷдоди ориёии мо, ба монанди Садаву Нав-рўз, Тиргону Меҳргон бозтоби пайванди инсону табиат, ойинҳои вобаста ба корҳои кишоварзӣ, инчунин ҳунармандӣ буда, беҳтарин ғояҳои инсонӣ, моҳият ва мўҳтавои онҳо мебошанд».
Аз ин рў, ҳамасола мувофиқи қонунгузории мамлакат, санаи 30 январ (яъне, даҳуми баҳманмоҳи тақвими хуршедӣ) ҷашни Сада ба таври расмӣ дар қаламрави мамлакат бо шукўҳу шаҳомати хоса таҷлил мегардад.
Дар шаҳри Хуҷанди бостонӣ чанд сол аст, ки Сада ҳамчун ҷашни бузурги миллӣ таҷлил мегардад ва мардум бо таҷлили ҷашни Сада ба фасли баҳор омодагӣ мегирад. Дар ин радиф, аз номи Мақомоти иҷроияи ҳокимияти давлатии шаҳри Хуҷанд ҳамаи шумо, шаҳрвандон ва меҳмонони гиромии шаҳрро ба муносибати ҷашни Сада самимона табрику таҳният мегўям, бароятон ризқу рўзии фаровон, сиҳатмандии комил, рўзгори обод ва дар кору пайкоратон барору пешравиҳо хоҳонам.
Аз рўйи нишондодҳои аксари таърихнигорон бошишгоҳи нахустини қавму қабилаҳои сершумори ориёӣ тахминан чордаҳ-понздаҳ ҳазор сол пеш паҳноҳои Сибири Ғарбӣ, доманакўҳҳои Урал ва даштҳои ҷанубии Рус, аз ҷумла соҳилҳои рўдҳои Обу Енисей то кўли Байкал тўл кашида будааст, ки ба он бозёфтҳои харобаҳои шаҳри Аркаим ва дигар осори бостоншиносӣ шаҳодат медиҳанд. Гурўҳи калони қавму қабилаҳои ориёӣ пас аз оғози яхбандию хунукиҳои шадид аз қисмати шимолии Осиё ночор кўч баста, сўйи минтақаҳои гарми ҷануб ва сарзамини кунунии Осиёи Миёна меоянд, ки гузаштагони дури мо – тоҷикон аз ҳамон тоифаи ориёиҳои дар миёни дарёҳои Ому ва Сир сокингашта пайдо шудаанд.
Ҷашни Сада, ҳамчунин ифодаи пайванди зиндагии инсон бо табиат, даври омодагӣ ба истиқболи баҳор ва Наврўз, инчунин, даври ниҳолшинонӣ, тайёрӣ ба киштукори баҳорӣ ва дигар корҳои кишоварзӣ маҳсуб меёбад.
Ҷашни Сада рамзи гармиву нур, рамзи ғалабаи некӣ бар бадӣ маҳсуб меёбад, ки мо бо баргузории чорабиниву тадбирҳои оммавӣ онро мутантан истиқбол мекунем.
Бо ифтихор ва итминони комил метавон гуфт, ки мо, мардуми сарбаланду заҳматкаши Хуҷандшаҳри бостонӣ бо баргузории ҷашни миллии Сада шаҳри азизу ҳамешаҷавонамонро боз ҳам ободу пешрафта, шукуфону сарсабз менамоем ва дар иҷрои дастуру супоришҳои Президенти Ҷумҳурии Тоҷикистон мўҳтарам Эмомалӣ Раҳмон ва Раиси вилояти Суғд Раҷаббой Аҳмадзода камари ҳиммат мебандем.
Ҷашни Сада – муждаи аввалини баҳор мубораку фархунда бод!
