Номаи табрикотии Раиси шаҳри Хуҷанд Фирдавс Шарифзода ба муносибати Рӯзи байналмилалии ҳифзи кӯдакон
01 Июнь 2023
Недоступен ни однин перевод.
КЎДАКИИ ХУШБАХТОНА НАСИБАТОН БОД!
Кўдакон ва наврасони меҳрубон!
Ҳамасола рўзи 1-уми июн - Рўзи байналмилалии ҳифзи кўдакон дар қаламрави олам таҷлил мегардад ва дар иртибот ба он силсилаи чорабиниву тадбир гузаронида мешавад. Мақомоти иҷроияи ҳокимияти давлатии шаҳри Хуҷанд ҳам барои нек тарбия кардани кўдакону наврасон, барои амалишавии даҳҳо барномаи давлатии ба рушди кўдакон вобастабуда, барои хушнудиву болидарўҳии кўдакону наврасон тадбирҳои созандаро роҳандозӣ кардааст.
Дар ин рўзи пурнишот кулли кўдакону наврасони бахтиёри диёрро бо ин санаи таърихӣ табрику муборакбод мегўям ва ба онҳо айёми хуши наврасӣ, осмони софу беғубор, оромию осудагӣ ва хандаҳои беғаши тифлиро таманно мекунам.
Рўзи байналмилалии ҳифзи кўдакон байни мардуми мо ҳамчун яке аз рўзҳои муҳим маҳбубият дорад, зеро дар ҳар оилаи мо фарзандону кўдакони маъсум тарбия меёбанд, ки сабаби шодиву хурсандии бепоён аст.
73 сол муқаддам, яъне соли 1950 бо қарори Анҷумани Шўрои федератсияи байналмилалии демократии занон Рўзи байналмилалии ҳифзи ҳуқуқи кўдак таъсис ёфт ва бори аввал он дар даҳҳо кишвари дунё таҷлил гардид.
Ин сана мо, волидайнро, ҳамеша ҳушдор медиҳад, ки масъулияти саломатӣ, тарбияи маънавии кўдакону наврасон, фароҳам овардани шароити мусоиди таълиму тарбияи онҳо дар мактаб ва оила, инкишофу рушди зеҳнии бачагон ва тайёр намудани онҳо ба зиндагии оянда ба дўши мост. Ба тасвиб расидани Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» низ вазифаву ўҳдадориҳои моро мушаххас намудааст.
Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон ва Раиси вилояти Суғд Раҷаббой Аҳмадзода таваҷҷўҳ ба тақдири кўдакон, тарбияи онҳо, фароҳам овардани имконоти моддию маънавиро вазифаи асосии давлат, аҳли ҷомеа ва волидайн меҳисобанд.
Дар кишвари шукуфону соҳибистиқлоли мо кўдакон бо ғамхорию меҳрубонӣ фаро гирифта шудаанд ва дар муҳити оилаву кўдакистонҳо тарбияву таълими хуб дида истодаанд. Ба кўдакони имконияташон маҳдуд ва ятиму бепарастор таваҷҷўҳи хоса зоҳир мегардад. Президенти кишвар мўҳтарам Эмомалӣ Раҳмон ҳамеша дар суханрониҳояшон изҳор медоранд, ки ягон кўдаки ятиму бепарастор ва имконияти ҷисмониаш маҳдуд аз таваҷҷўҳи давлату ҳукумат берун нест. Давлат онҳоро ба паноҳи хеш гирифтааст, таълиму тарбия медиҳад, соҳиби касбу кор мегардонад ва ояндаашонро таъмин месозад…
Воқеан ҳам, кўдакони шаҳри Хуҷанд низ бо меҳру муҳаббат фаро гирифта шудаанд ва аз ғамхориҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон бархурдоранд.
Дар шаҳр барои беҳтар намудани шароити таълиму тарбияи кўдакон тадбирҳои зарурӣ роҳ-андозӣ гардида, таъсиси мактабу кўдакистонҳои замонавӣ, таъмиру таҷдиди муассисаҳои соҳаи маориф, ҳифзи тандурустии кўдакон дар дармонгоҳҳо ва оила, ташкили истироҳату фароғати бачагон ва баланд бардоштани мақому манзалати мактаб, бунёди майдончаҳои варзишӣ дар маҳалҳо ва микроноҳияҳо, умуман, корҳои зиёд амалӣ шуда истодаанд.
Бори дигар Рўзи байналмилалии ҳифзи кўдаконро ба ҳамаи кўдакони некбахти диёр шодбод гуфта, таманнои онро дорам, ки ҳамеша сулҳу ваҳдати тоҷикон побарҷо, кишварамон обод, кўдаконамон саодатманд ва ояндаашон дурахшон бошад.
Айёми хуши кўдакӣ муборак, дўстрўякони азиз, гулғунчаҳои боғи зиндагӣ!
Идатон муборак, дӯстрӯякони азиз!
