Ҷамъбасти фаъолияти шаҳрдорӣ дар семоҳаи аввали соли 2024

Фирдавс Шарифзода, Раиси шаҳри Хуҷанд ҷаласаи фаъолонро ҳусни оғоз бахшида, иттилоъ дод, ки дар он нишондиҳандаҳои рушди иқтисодию иҷтимоии шаҳр дар 3 моҳи аввали соли 2024 баррасӣ гардида, вазифаҳо барои фаъолияти минбаъда муайян карда мешаванд.

Сипас, Муяссара Қаҳҳорӣ, муовини Раиси шаҳри Хуҷанд оид ба натиҷаҳои фаъолияти хоҷагии халқи шаҳр дар ин давра маълумоти муфассал дода аз ҷумла афзуд, ки Мақомоти иҷроияи ҳокимияти давлатии шаҳри Хуҷанд ҷиҳати татбиқ намудани сиёсати хирадмандонаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон, иҷрои босифату саривақтии дастуру ҳидоятҳое, ки аз Паёми навбатӣ ба Маҷлиси Олии Ҷумҳурии Тоҷикистон ва сафарҳои корӣ ба шаҳру ноҳияҳои вилояти Суғд бармеоянд, инчунин супоришҳои Раиси вилоят Раҷаббой Аҳмадзода чораҳои амалӣ андешид.

Иттилоъ дода шуд, ки дар натиҷаи чораҳои андешидашуда сарфи назар аз таъсири мушкилиҳои пешомада имкон дод, ки дар ин давра 7 адад корхонаҳои хурду миёнаи истеҳсолӣ бо истифодаи технологияҳои муосир ва дорои 95 адад ҷойи корӣ, бо ҷалби 33,4 млн. сомонӣ сармояи мустақим сохта ба истифода дода шуда, миқдори умумии корхонаҳои саноатӣ ба 271 адад расонида шуд. Илова бар ин, ин нишондиҳанда ҷиҳати афзоиш ёфтани ҳаҷми маҳсулотҳои истеҳсолгардидаистода дар раванди саноатикунонии босуръати кишвар, барои тақвият ёфтани соҳа, ҳамчун ҳадафи чоруми миллӣ саҳми босазо гузошта истодааст.

Аз таҳлилҳо бармеояд, ки ҳаҷми умумии маҳсулоти истеҳсолгардида ба 447 миллиону 461,1 ҳазор сомонӣ расида, нисбат ба ҳамин давраи соли сипаригашта 78,5 млн. сомонӣ афзоиш ёфта, аз ин миқдор 71,2 млн. сомонӣ маҳсулот ба давлатҳои хориҷии дуру наздик содирот карда шудааст. Ин нишондиҳанда барои рушду такомули ин соҳаи реалии иқтисодиёт заминаи устувор гузошта истодааст.

Дар шаҳр шумораи корхонаҳои истеҳсолкунандаи маҳсулотҳои воридотивазкунанда ва ба содирот нигаронидашуда зиёд шуда, дар ин давра аз ҷониби 106 адад корхонаҳои хурду калон ба маблағи 185,2 млн. сомонӣ чунин маҳсулот истеҳсол гардид, ки он нисбат ба ҳамин давраи соли сипаригашта 9,1 млн. сомонӣ ё 5,2 банди фоизӣ зиёд гаштааст.

Илова бар ин, қайд кардан бамаврид аст, ки дар давраи ҳисоботӣ шумораи корхонаҳои нисбат ба ҳамин давраи соли гузашта зиёд маҳсулот истеҳсол карда, теъдоди онҳо ба 182 адад расидааст.

Дар масъалаҳои шуғлнокии ин соҳа низ пешравиҳо ба назар расида, шумораи кормандон нисбат ба ҳамин давраи соли сипаригашта 220 нафар ё 3,6 дар сад афзоиш ёфта, музди маоши миёнаи кормандон низ 107,7 сомонӣ ё 6,0 фоиз афзоиш ёфтааст.

Боиси зикр аст, ки натиҷаҳои комёбшудаи ин соҳа барои ғанӣ гардонидани бозори дохилӣ ва кам шудани маҳсулоти қаблан воридшаванда шароити мусоид фароҳам оварда, ҷиҳати такомули буҷети давлатӣ замина гузошта истода бошад ҳам, ҳоло дар ин самт имкониятҳои мавҷуда пурра истифода нашудаанд.

Иттилоъ дода шуд, ки дар давоми семоҳаи аввали соли ҷорӣ тавассути нақлиётҳои мусофиркашон ба 20,4 млн. нафар мусофирон хизмат расонида шуда, он дар муқоиса бо ҳамин давраи соли сипаригашта 26,2 ҳазор нафар зиёд гаштааст. Ҳаҷми борҳои кашонидашуда бошад, тавассути ҳамаи нақлиётҳои боркашон ба 899,2 ҳазор тонна расида, нисбатан 15,8 фоиз ё 123,0 ҳазор тонна зиёд шудааст.

Дар раванди баланд бардоштани сатҳи некўаҳволӣ дар давраи ҳисоботӣ ҳаҷми гардиши савдои чакана ба 1025,6 млн. сомонӣ ва ҳаҷми хизматрасонии пулакӣ ба 421,4 млн. сомонӣ расонида шуд, ки он нисбат ба ҳамин давраи соли сипаригашта 8,5 фоиз афзоиш ёфтааст. Ин натиҷаҳо баҳри дар амал татбиқ намудани ҳадафҳои стратегии амнияти озуқаворӣ, дар самти беҳтар намудани таъминоти аҳолии шаҳр бо маводҳои аввалияи ниёзи мардум шароити фаровон муҳайё намуда, ин нишондиҳандаҳо дар муқоиса бо соли гузашта, ба ҳар як сари аҳолӣ, мутаносибан 8,7 ва 10,5 фоизӣ зиёд шудааст.

Солҳои охир шаҳри Хуҷанд бо мақсади густариши муносибатҳои иқтисодӣ бо 45 давлатҳои дуру наздик ҳамкориҳои мутақобиларо самаранок ба роҳ мондааст.

Таҷрибаҳо нишон медиҳад, ки ҳаҷми савдои хориҷӣ мунтазам афзоиш ёфта, дар семоҳаи аввали соли равон он ба 100,7 млн. доллари амрикоӣ расидааст, ки аз ин миқдор воридот 89,1 миллион доллари амрикоӣ ва содирот 11,6 миллион доллари амрикоиро ташкил намудааст.

Боиси зикр аст, ки вазни қиёсии маҳсулотҳои содиргашта дар ҳаҷми умумии савдои хориҷӣ 11,5 фоизро ташкил дода, барои мавқеи устувор ишғол намудани молистеҳсолкунандагон дар бозори хориҷӣ мусоидат карда истодааст.

Чораҳои судманди андешида шуда, дар самти муносибатҳои бурунмарзӣ собит менамояд, ки шаҳри Хуҷанд бо 15 шаҳрҳои хориҷии дуру наздик аз ҷумла, бо шаҳрҳои Оренбург, Энгельс, Сургут, Волгоград ва ноҳияи Киеви вилояти Маскави Федератсияи Россия, Могилеви Ҷумҳурии Белорус, Тайюан ва Ландҷоуи Ҷумҳурии халқии Чин, Линколни Штатҳои Муттаҳидаи Амрико, Ганҷаи Ҷумҳурии Озорбойҷон, Шимкент ва Туркистони Ҷумҳурии Қазоқистон, Оши Ҷумҳурии Қирғизистон, Табрез ва Язди Ҷумҳурии Исломии Эрон, солҳои тўлонӣ робитаҳои иқтисодию фарҳангии бародаршаҳрӣ дорад. Ҳамкориҳои мутақобилаи ин самт, нишон дод, ки дар натиҷаи ташрифи намояндагони сохторҳои давлатӣ ва соҳибкорӣ ба ин кишварҳо барои рушду такомули соҳаҳои иқтисодӣ, фарҳангӣ ва соҳибкорию ташаббускорӣ заминаи мусоид гузошта истодааст.

Зикр намудан ба маврид аст, ки самти сармоягузории дохилӣ ва хориҷӣ яке аз рукнҳои пурсамар барои такомули иқтисодиёт ба ҳисоб рафта, дар ин ҷода дар давраи ҳисоботӣ 14,3 миллион доллари амрикоӣ ҷалб карда шудааст.

Муяссара Қаҳҳорӣ дар баромади худ доир ба нишондиҳандаҳои дигар соҳаҳои шаҳрдорӣ низ маълумоти муфассал ироа намуд.

Раиси шаҳри Хуҷанд Фирдавс Шарифзода фаъолияти тамоми сохторҳои шаҳрдориро мавриди таҳлил қарор дода, аз масъулини дахлдор ҷиҳати иҷрои корҳои анҷомшуда ҳисобот талаб намуд.

Ҳамзамон ҷиҳати баланд бардоштани сифати таълиму тарбия, таҳкими худшиносию худогоҳӣ, пешгирии омилҳои номатлуб, мубориза алайҳи бегонапарастӣ, афзун намудани ҳаҷми истеҳсолот, зиёд намудани ҷойҳои нави корӣ, иҷрои самараноки нақшаи даромади буҷет дар нимсолаи дуюм, пешгирии ҷинояткорӣ, тарғибу ташвиқи дастовардҳои Истиқлолият, ба касбомўзӣ фаро гирифтани бекорон, ба роҳ мондани фаъолияти муназзами автобусҳои мусофиркаш, таъмини самараноки хизматрасонии коммуналӣ, пешгирии ҷудошавии оилаҳо, ҷалби сармояи мустақим ва хориҷӣ, сифатнок иҷро намудани нақшаи даъвати хизмати ҳарбӣ, таҳияи лоиҳаи нави сармоягузорӣ ба иншооти таъиноташ гуногун, таъсиси корхонаи наву муштарак, вусъати корҳои ободонӣ ба истиқболи сазовори 35 солагии Истиқлолияти давлатӣ, суръатбахшии кор дар сохтмонҳои банақшагирифташуда ва ғайраҳо дастуру супоришҳо дода, муовинони сарпарасти соҳаҳоро барои назорати ҷиддӣ муваззаф намуд.

Дар ҷараёни ҷаласаи ҷамъбастӣ намояндаи Мақомоти иҷроияи ҳокимияти давлатии вилояти Суғд, сардори Раёсати сармоягузорӣ ва идораи амволи давлатии Мақомоти иҷроияи ҳокимияти давлатии вилояти Суғд Шарифҷон Ахмедов баромад намуда, доир ба бурду бохти шаҳрдорӣ фикру мулоҳизаҳои хешро баён дошт.

Раиси шаҳри Хуҷанд Фирдавс Шарифзода ҷаласаи ҷамъбасти семоҳаи фаъолияти шаҳрдориро натиҷагирӣ карда, таъкид дошт, ки рушди бемайлони иқтисодию иҷтимоии шаҳр дар натиҷаи заҳмати софдилонаи фаъолон ва мардуми шарафманди шаҳрамон таъмин гаштааст. Мақомоти иҷроияи ҳокимияти давлатии шаҳр дар оянда низ ҷиҳати дастуру ҳидоятҳои Асосгузори сулҳу ваҳдати миллӣ – Пешвои муаззами миллат, Президенти Ҷумҳурии Тоҷикистон, муҳтарам Эмомалӣ Раҳмон, нишондодҳои Раиси вилоят Раҷаббой Аҳмадзода ба истиқболи сазовори ҷашни 35-солагии Истиқлолияти давлатии Ҷумҳурии Тоҷикистон тадбирҳои муассир хоҳад андешид.