Шиносоии Раҷаббой Аҳмадзода бо фаъолияти КВДК «Хизматрасонии нақлиёти санитарии шаҳри Хуҷанд»

Нахуст Раиси вилояти Суғд Раҷаббой Аҳмадзода аз ҳолати нигоҳдории техникаву таҷҳизот ва раванди корҳои созандагӣ дар ҳудуди КВДК «Хизматрасонии нақлиёти санитарии шаҳри Хуҷанд» ошноӣ пайдо намуда, ҷиҳати бакорааандозии техникаҳои азкорманда, суръатбахшии корҳои бунёдкорӣ ва ташкили шароити арзандаи фаъолият барои кормандон дастурҳо дода, таъкид намуд, ки давоми 1 моҳ 10 адад техникаҳои муассиса аз таъмири куллӣ бароварда шуда, ба хизматрасонии аҳолӣ сафар карда шаванд.

Таъкид шуд, ки аз фаъолияти бонизоми корхонаи мазкур тозагии шаҳр ва саломатии сокинони вобастагӣ дорад. Бояд кормандон ҳамарўза ҷиҳати саривақт гирифтани партов аз ҳудуди шаҳр фаъолнокӣ зоҳир намоянд ва масъулияти ҷиддӣ дар самти тозагии шаҳр ва ороста намудани кўчаву хиёбонҳоро дошта бошанд. Аз симо ва рафтори кормандони ин ниҳод ба шаҳр ва маданияти шаҳрдорӣ баҳо медиҳанд.

Бояд қайд намуд, ки баҳри рушди корхонаи мазкур бо дастгирии Ҳукумати Ҷумҳурии Тоҷикистон Лоиҳаи “Идоракунии партовҳои сахти маишии шаҳри Хуҷанд” амалӣ шуда истодааст, ки дар доираи он таҷдиди корхона ва харидории техникаву таҷҳизот роҳандозӣ гардидааст.

Иттилоъ дода шуд, ки КВДК «Хизматрасонии нақлиёти санитарии шаҳри Хуҷанд» ягона муассисаи коммуналии шаҳр ба ҳисоб рафта мебошад, ки барои бардоштан, кашонидан ва гӯронидани партовҳои сахти маишии шаҳри Хуҷанд, фаъолият мебарад. Корхона реҷаи кори худро дар 3 баст ба роҳ монда, аз ҳудуди шаҳр партовҳоро ба партовгоҳи шаҳри Хуҷанд мекашонад. Дар корхона 117 нафар фаъолият дошта, 14 адад нақлиётҳои партовкашон ҳамарӯза дар 3 баст фаъолияти пурсамар дошта, партовҳоро саривақт аз ҷойҳои муайяншуда мегиранд.

Ҳамарӯза партов тибқи реҷаи муайян, яъне басти аввал: аз соатҳои 5:00 то 12:00, басти дуюм бо усули бонгӣ, яъне дар дохили маҳаллаҳое, ки партовҷойи муайян надоранд соатҳои 8:00 17:00 ва басти сеюм аз 17:00 то 24:00 муқаррар шуда, дар ин замонҳо партовҳо бароварда мешаванд.