19 Март 2021
Субҳи имрўз Раиси вилояти Суғд Раҷаббой Аҳмадзода бо максади иштирок дар чорабиниҳои наврўзӣ ба «Боғшаҳри наврўзӣ»-и маркази вилоят-шаҳри Хуҷанд ташриф оварда, фаъолон ва сокинони шаҳри Хуҷандро бо Наврўзи хуҷастапай табрику таҳният намуд.
Нахуст Раиси вилояти Суғд Раҷаббой Аҳмадзода ва Раиси шаҳри Хуҷанд Фирдавс Шарифзода аз намоиши дастовардҳои аҳли ҷомеаи Хуҷанди бостонӣ ошноӣ пайдо кард. Маҳаллаҳои шаҳри Хуҷанд дар растаи ҳунармандӣ маҳсули эҷод ва истеҳсоли хешро гузошта муаррифӣ намуданд. Таъкид гардид, ки ҳар як маҳаллаи шаҳри Хуҷанд аз қадимулайём бо хусусиятҳои хоси худ анвои гуногуни ҳунарҳои миллиро истеҳсол намуда, то ба имрўз асолати онро нигоҳ доштаанд. Идораву ташкилот ва муассисаҳои шаҳри Хуҷанд бо муаррифии дастархони наврўзӣ ва урфу одатҳои қадимаи тоҷикон омодагии комили худро аз Иди Наврўзи байналмилал собит намуданд. Варзишгарони хуҷандӣ ки дар риштаҳои гуногун муваффақ шуданд, бо маҳорату санъати хеш намунаи олии тарбияи тану ҷон ва рўҳро ба маърази тамошо гузоштанд.
Раиси вилоят Раҷаббой Аҳмадзода ба варзиши ҷисмонӣ ҷалб намудани наврасону ҷавононро амали нек арзёбӣ намуда, аз масъулини соҳа даъват ба амал овард, ки бо истифода аз имконоту василаҳо барои музаффарият расонидани варзишгарони шаҳр дар мусобиқаҳои ҷаҳонӣ, минтақавӣ ва ҷумҳуриявӣ ҷаҳд намоянд. Мақомоти иҷроияи ҳокимияти давлатиивилояти Суғд ҷиҳати дастгирии лаёқатмадон ва варзишгарони парчамбардор омода аст.
Дар хаймаҳои наврўзӣ армуғонҳои наврўзӣ ва дигар намунаҳои ифодагари суннатҳои миллӣ мо ба маърази тамошо ва фурўш гузошта шуда буданд. Раҷаббой Аҳмадзода барои тавсеаи чунин нуқтаҳои хостаҳои сайёҳони хориҷию дохилӣ ба масъулини дахлдор дастуру супоришҳои мушаххас дод.
Дар муаррифии устодон ва донишҷўёни муассисаҳои олии шаҳри Хуҷанд санъати миллӣ, урфу одат ва русуми тоҷикон дар рўзҳои таҷлили Иди Наврўзи байналмилал муаррифӣ карда шуд.
Раиси вилояти Суғд Раҷаббой Аҳмадзода зимни ирои номаи табрикотии худ бахшида ба Иди Наврўзи байналмилал аз ҷумла афзуд, ки боиси ифтихор аст, ки ҷашни Наврўз таҳти сиёсати дурандешона ва бунёдкоронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамчун падидаи хиради созанда, таҷассумгари фалсафаи таҳаммулгароӣ, сулҳу ваҳдат, ҳамзистии осоишта, нишони арҷгузорӣ ба таъриху тамаддун ва анъанаҳои ниёгон ба аҳли башар муаррифӣ гардида, мақоми байналмилалиро соҳиб шудааст. Гузаштагони мо дар тўли таърихи дароз новобаста аз монеаҳои замон Наврўзро ҳамчун айёми бедоршавии табиат, оғози киштукор, баробарии шабу рўз, ҷашни пайвандбахши миёни табиату инсон, хайру эҳсон, накўкориву инсонпарварӣ, созандагиву бунёдкорӣ арҷ мегузоштанд ва ҷиҳати интишори суннату ойинҳои он талош меварзиданд. Дар ин бора, Пешвои муаззами миллат муҳтарам Эмомалӣ Раҳмон таъкид намудаанд: «Аҷдоди шарафманди мо бо вуҷуди монеаву мушкилоти зиёд Наврўзро на танҳо ҳамчун мероси муқаддаси гузашташтагони худ ҳифз кардаанд, балки онро ба сифати ойини башардўстонаву офаранда ба дигар халқҳои дунё ба таври шоиста муаррифӣ намудаанд».
Таъкид гардид, ки мардуми кишвари азизамон аз он ифтихор доранд, ки Тоҷикистон натанҳо ватани Наврўзи ҷаҳонӣ, балки Ватани ҷашнҳои дигари мардумӣ, аз қабили Сада, Тиргон ва Меҳргон аст, ки бо фалсафаи бузурги созандагии худ дар таърихи рушди тафаккури инсоният беш аз шаш ҳазор сол инҷониб нақши арзишманд мегузоранд.
Дар марҳалаи нави таърихи давлатдории мо – яъне дар замони соҳибистиқлолии кишвар мақоми ҷаҳонӣ гирифтани Наврўз имкон фароҳам овард, ки мардуми кишварҳои гуногуни олам аз фитрати офарандагии ин падидаи куҳани башарӣ огоҳ гардида, дар таҳкими ҳамзистии осоишта, тақвияти дўстию ҳамдигарфаҳмӣ, ки аслу моҳияти фарҳанги ахлоқии Наврўз аст, бештар таваҷҷўҳ намоянд.
Дар анҷоми суханронии худ Раҷаббой Аҳмадзода таъкид намуд, ки ҷашни Наврўзи байналмилалӣ соли равон бо таҷлили санаи фархундаи 30-солагии Истиқлоли давлатии Ҷумҳурии Тоҷикистон рост омад ва ин падидаи фараҳбахш сокинони сарбаланди вилоятро водор менамояд, ки барои татбиқи иқдому ташаббусҳои бунёдкоронаи давлату Ҳукумат фаъолияти густурдаро ба роҳ монда, ҷиҳати боз ҳам тақвият бахшидани арзишҳои фарҳанги миллӣ талош варзанд.
Аҳли санъати шаҳри Хуҷанд ба чорабинии идона ҳусни дигар зам намуданд.
Бояд қайд намуд, ки бори аввал соли ҷорӣ бахшида ба иди Наврӯзи байналмилалӣ бо иқдоми шаҳрдории Хуҷанд ва дастгирии Мақомоти иҷроияи ҳокимияти давлатии вилояти Суғд дар «Майдони ситораҳо»-и шаҳри Хуҷанд «Боғшаҳри наврўзӣ» бунёд карда шуд, ки дар меҳвари он дарахти сунъии зардолу бо баландии 15 метр, рамзҳои наврўзӣ ва дигар ороишоти марбут ба ҷашни Наврўз гузошта шуданд.
«Боғшаҳри наврўзӣ» аз 6 дарвоза ва деворҳои рамзии иҳотавӣ иборат буда, дар ин мавзеъ ҳамзамон хаймаҳои наврўзӣ ташкил гардида, тўҳфаҳои наврўзӣ ва дигар ниёзҳои ҷомеа ба фурўш гузошта шуданд.
Иқдоми мазкур бо мақсади фароҳамсозии шароити созгор барои истироҳату фароғати сокинон ва меҳмонони шаҳри Хуҷанд дар рўзҳои тантанаҳои идонаи Наврўзи байналмилалӣ амалӣ гардидааст.
Дафтари матбуоти
Раиси шаҳри Хуҷанд