16 Октябрь 2017

Субҳи 15 октябри соли равон дар назди театри мазҳака-мусиқии ба номи Хоҷа Камоли Хуҷандии шаҳри Хуҷанд  Иди Меҳргон бо тантана ҷашн гирифта шуд. Дар ин рӯзи иди деҳқонон озмунҳои «Оши палав», «Кадбонуи моҳир», намоишу фурӯши маҳсулоти кишоварзии шаҳру навоҳии вилоят, маҳсули аҳли эҷоди коллеҷи тиббии шаҳри Хуҷанд бо маҳорати баланд ба маърази тамошо гузошта шуда буд.
Хоҷазода  Ориф Ашӯрӣ, муовини Раиси вилояти Суғд ва Маъруф Муҳаммадзода, Раиси шаҳри Хуҷанд аз растаи намоишу фурӯши маҳсулоти кишоварзии шаҳру навоҳии вилоят боздид ба амал намуда, ба нархҳои анвои пешкашнамудаи деҳқонон мароқ зоҳир намуданд. Бонувони шаҳри Хуҷанд маҳсули кадбонугии хешро бахшида ба Иди Меҳргон ба меҳмонон муаррифӣ карданд, ки бо гуногунанвогии хеш ҳар як бинандаро ба худ ҷалб менамуд.

Устодон ва донишҷӯёни коллеҷи тиббии шаҳри Хуҷанд аз таърихи ҷашнгирии Иди Меҳргон силсилабарномаҳои хешро ба маърази тамошо гузошта, таъкид сохтанд, ки новобаста аз гиру дорҳои сиёсию фарҳангӣ ва мазҳабӣ Меҳргони аҷдодӣ тавонист аз гузаштаҳои дуродур то имрўз эътибору манзалати иҷтимоии хешро ҳифз намояд. Зеро Меҳргон ба монанди иди Наврўз таҷассумгари суннатҳои он зинаи инкишофи тамаддуни башарист, ки кулли инсоният онро дар давраҳои гуногун тай намудааст. Аз ин лиҳоз, бисёре аз суннатҳои ин идҳоро одамон  бо ҳусни тафоҳум қабул доранд ва онро ҷузъи таркибии тамаддуни умумибашарӣ меҳисобанд.
Хоҷазода Ориф Ашӯрӣ, муовини Раиси вилоят Суғд ҳозиринро бо Иди Меҳргон таҳният гуфта, таъкид сохт, ки «Меҳргон иди ҷамъоварии ҳосили рӯёнидаи деҳқон, иди фаровонӣ, шодию нишот, дӯстию рафоқат, ваҳдату ягонагӣ ва меҳру садоқат аст. Ва номаи табрикотии Раиси вилояти Суғд Абдураҳмон Қодириро ба самъи ҳозирин расонд, ки дар он аз ҷумла гуфта мешавад: «Ҷашни Меҳргон дар радифи Наврӯзу Сада аз куҳантарин идҳои машҳури халқи тоҷик аст. Пайдоиш, рушду такомул ва таҳаввули он ба шуғлу рӯзгори деҳқонон марбут мебошад. Ин ҷашн дар рӯзи 16-уми моҳи меҳр, ки он рӯзро низ рӯзи меҳр меноманд, баргузор мегардид.
Чунонки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъкид кардаанд, “Меҳргон тибқи андеша ва эътиқоди ниёгони мо дар оғози фасли тирамоҳ таҷлил карда мешуд. Он дорои эътидои кайҳонӣ буда, дар ин айём рӯзу шаб баробар мешавад ва ба ин сабаб номи ин моҳро меҳр гузоштаанд”. Аз ин рӯ, рӯзи меҳр ба муносибати ғундоштани ҳосили боғу зироат ва шукргузорӣ аз неъматҳои Замин-Модар аз тарафи мардум ҷашн гирифта мешавад.
Имрӯз кишоварзони вилояти Суғд ғамхориву пуштибонии Ҳукумати Ҷумҳурии Тоҷикистонро ҳамарӯза дарк намуда, бо мақсади таъмини иҷрои дастуру супоришҳои Пешвои миллат муҳтарам Эмомалӣ Раҳмон софдилона меҳнат намуда, ҳамасола афзоиши ҳаҷми истеҳсоли маҳсулотро таъмин карда истодаанд».
Сипас Раиси шаҳри Хуҷанд Маъруф Муҳаммадзода ҳамагонро бо Иди деҳқонон ва рамзи фаровонӣ табрик гуфта, аз ҷумла таъкид сохт, ки  «Меҳргон яке аз идҳои қадимии мардуми заҳматкашу меҳнатдӯсти ориёинажод, бахусус тоҷикон ба шумор меравад, аммо як замон он то андозае аз назари мардум дур монда буд. Бо шарофати соҳибистиқлол гардидани кишвар ва сиёсати фарҳангпарваронаи Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имрӯз дар Тоҷикистон ин ид ба монанди дигар идҳо дар асоси Қонуни Ҷумҳурии Тоҷикистон «Дар бораи рӯзҳои ид» ҷашн гирифта мешавад. Меҳргон  айёмест, ки дар он деҳқонон пас аз ҷамъоварии ҳосили дастранҷи худ ид мекунанду барои соли оянда дуо мекунанд, ки ҳосили аз ин ҳам фаровонтар бигиранд. Дар ин ид онҳо  шодию хурсандӣ мекунанд».
Маъруф Муҳаммадзода гуфт, ки месазад, ки мо иди Меҳргонро низ эҳё намуда, ба ҷаҳониён исбот намоем, ки ин иди мардуми ориёинажод, бахусус мардуми тоҷику форс мебошад. Ниёгони мо вобаста ба ҳар як фасли сол ва ҳар як шебу фарози зиндагӣ монанди  Наврӯз, ки оғози сол аст ва Меҳргон, ки давраи ғунучини ҳосил мебошад, ҷашнҳо доштанду онро таҷлил менамуданд. Бубинед, ки дар Наврӯз ба кишту кор шурӯъ мекунанд, дуои пири деҳқонро мегиранд ва ҳамчунин дар Меҳргон, ки давраи ҳосилғундорӣ ва иди деҳқонон аст, барои мо ҳамчун  ҷашне аз ниёгонамон мерос мондааст.
Сипас барои иштироки фаъолна дар гузаронидани чорабиниҳои Иди Меҳргон ба ҷомеаи меҳнатии коллеҷи тиббии шаҳри Хуҷанд ва саҳм гузоштан ба таъмини амнияти озуқаворӣ, бо нархҳои дастрас пешниҳод нам3удани маҳсулоти кишоварзӣ ба Сарраёсати кишоварзии вилоят ва кишоварзони шаҳру навоҳии  Ашт, Бобоҷон Ғафуров, Деваштич, Исфара, Конибодом, Мастчоҳ ва Спитамен Сипосномаҳои Мақомоти иҷроияи ҳокимияти давлатии шаҳри Хуҷанд тақдим карда шуд.
Барномаи илмию-фарҳангии адибон Ҷӯра Юсуфӣ, Озарахш, Гулноз ва санъаткорони шаҳри Хуҷанд табъи ҳозиринро болида намуд.

Дафтари матбуоти
Раиси шаҳри Хуҷанд