21 Ноябр 2016

Асосгузори сулҳу ваҳдат, Пешвои миллат, Ҷаноби Олӣ мӯҳтарам Эмомалӣ Раҳмон дар китоби тозанашри “Чеҳраҳои мондагор” менависанд, ки “Омӯхтани рӯйдодҳои таърихиву фарҳангӣ, зиндагиномаи шахсиятҳои сарсупурдаи миллат ва чеҳраҳои баргузидаи адабӣ имкон медиҳад, решаҳои худро аз гузашта дарёфт намоем, бо онҳо пайванд доштани хешро эҳсос карда, ба хотири номуси ватандорӣ ном ва корнамоиҳои онҳоро аз нав зинда гардонем ва ба фарзандони халқи далерамон бо ифтихор дар бораашон ҳарф занем.” Ин дафъа нишасти 145-умини маҳфили илмиву адабии “Ганҷи сухан” таҳти ҳамин дастури Пешвои миллат бахшида ба Рӯзи парчам ва солгарди мавлуди асосогузори маҳфил донишманди маъруфи тоҷик шодравон Абдулманнон Насриддин, дар толори Донишгоҳи давлатии шаҳри Хуҷанд ба номи академик Бобоҷон Ғафуров бо иштироки донишмандани маъруф, адибони номвар, омӯзгорон,донишҷӯён ва афроди суханпарвару фарҳангдӯст баргузор шуд. Сараввал бо чанд  паёми фараҳбахш масъули маҳфил, номзади илмҳои филология, дотсент Саидумрон Саидов ба нишасти навбатӣ ифтитоҳ бахшид. Аз ҷумла аз муҳимтарин рӯйдоҳои як моҳи охир дар ҳаёти аҳли кишвар ёд карда, бунёди сарбанди дарёи Вахш ва оғози корҳои бунёдии Нерӯгоҳи барқии обиро  бо иштироки Асосгузори сулҳу ваҳдат, Пешвои миллат,Ҷаноби Олӣ мӯҳтарам Эмомалӣ Раҳмон ва ҷашни Рӯзи Президенти Тоҷикистон, Рӯзи конститутсияро аз ишонаҳои олии ваҳдати миллӣ ва рушди босуботи Тоҷикистон ном бурд. Ҳамзамон баргузории конфренсияи  байналмилалии  “Камоли Хуҷандӣ ташаккули адабиётшиносӣ ва равобити адабӣ”-ро, ки дар ҳаёти илмиву фарҳангии вилоят таъсири бузурге расонид аз дастовардҳои илми тоҷик хонд. Дар партави ин ҷашнҳои бузург дарҷи китоби Пешвои миллат Эмомалӣ Раҳмон таҳти унвони “Чеҳраҳои мондагор”  барои олимону адибон ва кулли мардуми тоҷик армуғони бузурги идона маҳсуб мешавад. Саидумрон Саидов илова кард, ки вобаста ба ин ҷашну маъракаҳои фараҳбахш маҳфили илмиву адабии “Ганҷи сухан” низ армуғонҳои худро барои аҳли илму адаб пешниҳод кард. Аз ҷумла шумораи аввалини фаслномаи “Ганҷи сухан “ интишор шуд , ки минбаъд дар инъикоси осори илмиву адабӣ ва фарҳангӣ саҳми худро мегузорад. Ҳамчунини як китоби нав дар ҳамдастӣ бо Донишгоҳи давлатии ҳуқуқ, бизнес ва сиёсати Тоҷикистон таҳти унвони “Хваканта –Хуҷанд” нашр гардид, ки мақолаҳои илмиву публистистиро дар бораи таърих ва фарҳанги шаҳри Хуҷанд фаро мегирад.
Ректори ДДХ ба номи академик Бобоҷон Ғафуров Анвар Мақсудӣ баромад карда, дар мавриди фазои илмиву адабии имрӯза ва таъсири маҳфили “Ганҷи сухан” ба ин раванд изҳори назар намуд. Таҳти унвони ”Чароғи рӯшани илму адаб мудири шӯъбаи рушди иҷтимоӣ ва робита бо ҷомеаи дастгоҳи Раиси вилояти Суғд, номзади илмҳои филология, дотсент Тоҷибой Султонзода баромад карда, паёми Раиси вилояти Суғд мӯҳтарам Абдураҳмон Қодириро ба унвони ҳозирин расонид. Ӯ дар мавриди дар сатҳи баланд баргузор шудани Рӯзи Президенти Ҷумҳурии Тоҷикистон ва омодагиҳо ба Рӯзи парчами миллӣ ибрози назар намуд. Баргузории маҳфилро, ки дар густариши ҳаёти маънавии ҷомеа нақши бориз дорад  ва дар тарбияии ахлоқии ҷавонон саҳми беназир мегузорад муҳим ва муфид шуморид. Китобҳои тозанашрро дар бахши “Навгонињои илмиву адабӣ ва фарњангї” муаллимаи кафедраи умумидонишгоҳии забони тоҷикии  ДДХ ба номи академик Бобоҷон Ғафуров  Башорат Алиева муаррифӣ кард. Ба ҳозирин  маърӯзаи мудири шӯъбаи табъу нашри ДДҲБСТ, номзади илмҳои филология, дотсент Ислом Раҳимов бахшида ба Рӯзи Парчам, “ Аз Дирафши Каён то Парчами Тоҷикистон” писанд омад. Ӯ дар маърӯзааш оид ба таърихи пайдоиши парчам, мазмун ва мундариҷаи он дар даврони мухталиф, моҳияти парчам, назари олимон дар бораи ин муқаддасот муфассал суханронӣ карда, ба ҳозирин санаду далелҳои нави таърихиро баён кард.
Дар маърӯзаи хеш номзади илмҳои филология, дотсент Ҳалимҷон Зоиров “Назаре ба “Куллиёти осор”- и устод Абдулманнон Насриддин  дар бораи  фаъолияти илмии собиқ мудири кафедраи адабиёти классикии тоҷики ДДХ ба номи академик Бобоҷон Ғафуров, поягузори маҳфили илмиву адабии “Ганҷи сухан”, доктори илмҳои филология, профессор шодравон Абдулманнони Насриддин сухан кард. Ӯ дар баробари баёни арзишҳои баланди илмии осори устод дар мавриди инсонгариву ахлоқи волои эшон дар заминаи ёддоштҳояш нақлҳои ҷолиб намуд. Сипас Шоири Халқии Тоҷикистон Фарзона дар бораи устод Абдулманнони Насриддин сӯҳбати муассире намуда, бо ашъори ба эшон бахшидаи хеш дар дилҳои ҳозирин эҳсоси муҳаббату садоқатро бедор кард. Доктори илмҳои филология, профессор Фахриддин Насриддинов аз ҳамкорону дӯстон ва шогирдони падари хеш изҳори сипомандӣ намуд ва гуфт, ки хидмат ба илм рисолати азалии мост ва мо идомабахши кори падари хеш ҳастем. Шоира Гулноз шеъре дар васфи устод қироат кард ва шогирдони факултети филологияи тоҷики ДДХ ба номи академик Б.Ғафуров ба он идома бахшиданд.
Дар маҳфил меҳмони арҷманд аз шаҳри Душанбе, Ҳунарпешаи мардумии Ҷумҳурии Тоҷикистон Абдувалӣ Абдурашидов баромад намуда, иттилоъ дод, ки китоби шашҷилдаи “Шашмақом” ва “Фарҳанги истилоҳоти “Шашмақом”  интишор гардид, ки аз падидаҳои ҷолиби фарҳанги маҳсуб мешавад. Дар поёни маҳфил  ҳадяҳои Раиси вилояти Суғд мӯҳтарам Абдураҳмон Қодирӣ ба маърӯзачиён ва фаъолони маҳфил супорида шуд. Маҳфил дар сатҳи баланди ташкилӣ ва маънавӣ баргузор гардид.