17 Март 2016

Бо мақсади муайян намудани дараҷаи саводнокӣ, қобилияту истеъдод ва дарёфт намудани «Беҳтарин донандаи забони англисӣ» дар ҳамаи муассисаҳои таълимии шаҳри Хуҷанд байни хонандагони синфҳои чаҳорум озмун гузаронида шуд. Ғолибони даври якуми озмуни «Беҳтарин донандаи забони англисӣ» тибқи дархости муассисаҳои таълимӣ ба даври ниҳоии озмуни шаҳрӣ пешниҳод карда шуданд.
Ҳадафи асосии озмун баланд бардоштани ҳавасмандӣ ва донишандӯзии хонандагон ба фанни забони англисӣ, ташаккули тафаккури мантиқии хонандагон, бедор намудани завқу шавқи онҳо дар инкишофи нутқ, тарбияи зебоипарастӣ, муайян намудани беҳтарин донандаи забони англисӣ мебошад.
Ба ин мақсад дар муассисаи таълимии №8 аз 43 муассисаи таълимӣ толибилмон дар давраи ниҳоии озмуни шаҳрии «Беҳтарин донандаи забони англисӣ» аз рӯи 5- шарт: муаррифии хонанда, қироати шеър, нақли афсона ва ҳикоя аз рӯи расм, суруд бо забони англисӣ ва нишон (эмблемаи)-и беҳтарин қувваозмоӣ намуданд.
Ҳайати доварон сармутахасиси хадамоти давлатӣ дар соҳаи маорифи вилояти Суғд Рустамова Муслима Мансуровна, устоди Донишгоҳи давлатии Хуҷанд ба номи акадгмик Бобоҷон Ғафуров Бойматов Алиҷон Бойматович, омӯзгори забони англисӣ Иброҳимова Мунира Мамадҷоновна, омӯзгори забони англисии литсейи хонандагони болаёқат Абдуғаниев Ҳофизхон, Раиси иттифоқи касабаи кормандони шуъбаи маориф Дадобоев Ғафурҷон, мушовири шуъбаи маориф Шаидова М, мушовири синфҳои ибтидоӣ Ботурова М.К аз рӯи шартҳои дар боло зикршуда, ба донишу маҳорати забондонии довталабон баҳои арзанда дода, ғолибонро муайян намуданд. Натиҷаи озмуни «Беҳтарин донандаи забони англисӣ» нишон дод, ки толибилмони МТМУ №3,31,12.15,11,30,13,9,8,4,24,25, гимназияи №1, мактабҳои хусусии «Гулчини маърифат», «Файз», «Паймони азизон», «Гёте»,  «Пӯлотов», «Кавсар», «Ирфон» аз ҳама зиёд сазовори ҷойҳои ифтихорӣ гардиданд.
Шоҳҷоизаи «Беҳтарин донандаи забони ангисӣ» насиби хонандаи синфи 4-уми МТМУ №31 Холиқова Фараҳноз гардид. Ба дипломи дараҷаи 1 хонандаи МТМУ №12 Масобирова Назира, дипломи дараҷаи 2-хонандаи М/Х «Гулчини маърифат» Шарипова Муҳайё ва хонандаи МТМУ №15 Мамадова Фарзона мушарраф гаштанд.
Хонандаи МТМУ №11 Абосҷонова Махфират, хонандаи М/Х «Кавсар» Бойматова Меҳрангез, хонандаи  М/Х «Ирфон» Латипов Ҷамшед сазовори дипломи дараҷаи 3-юм гардиданд.
Ба ғолибон ва иштирокчиёни озмуни шаҳрии «Беҳтарин донандаи забони англисӣ» дар вазъияти тантанавӣ диплому сипосномаҳо тақдим карда шуд.