22 Июн 2026
Раиси вилояти Суғд Раҷаб Аҳмадзода ва Раиси шаҳри Хуҷанд Фирдавс Шарифзода ба шиногоҳи навбунёди соҳили рости дарёи Сир ташриф оварда, ба он ҳусни оғоз бахшиданд.
Иттилоъ дода шуд, ки шиногоҳи нав дар паҳлуйи Боғи Ғалабаи шаҳри Хуҷанд бунёд шуда, бо тамоми инфрасохтон аз ҷониби Идораи сохтмони асосии вилояти Суғд сохта шудааст.
Бояд қайд намуд, ки бо фаро расидани тобистон ва гарм шудани ҳаво сокинон дар мавзеъҳои истироҳатӣ, аз ҷумла шиногоҳҳо вақт мегузаронанд. Барои истироҳату фароғати шаҳрвандон дар соҳили Сирдарёи шаҳри Хуҷанд ҳамасола шароити зарурӣ фароҳам оварда шуда, дар мавсими оббозӣ таъмини бехатарии сокинон дар мадди назари масъулин қарор дорад. Мавзеъи мазкур яке аз ҷойҳои серодами шаҳр маҳсуб дониста мешавад.
Раиси вилояти Суғд Раҷаб Аҳмадзода зимни суҳбат бо мардуми маҳалли шиногоҳ омада, иттилоъ дод, ки бо мақсади истироҳату таъмини зиндагии шоиста ба мардум чунин мавзеъҳои истироҳатии мавсимӣ мавриди истифода қарор мегирад. Ҳамчунин барои кӯдакон ҳавзҳои сунъӣ сохта мешаванд. Шиногоҳ бо назардошти меъёрҳои байналхалқӣ бунёд ва на фақат барои шаҳрвандони Тоҷикистон, балки барои хориҷиён низ пешбинӣ мегардад. Зеро нури офтоби Тоҷикистон беҳтарин василаи табобат барои шаҳрвандони хориҷӣ арзёбӣ шудааст.
Зимни шиносоӣ бо шиногоҳ ба Раиси вилоят Раҷаб Аҳмадзода иттилоъ доданд, ки дар шиногоҳ майдонҳои истироҳату фароғат, машқу тамрин низ фароҳам оварда шудааст.
Бояд қайд намуд, ки дар шиногоҳ соябонҳои истироҳатию обутобдиҳӣ, ҳуҷраҳои ивази либос ва дигар эҳтиёҷоти шиногоҳ муҳайё карда шудааст.
Аз ҷониби Раиси вилоят ба бахши Раёсати Кумитаи ҳолатҳои фавқулода ва мудофиаи граждании вилояти Суғд дар шаҳри Хуҷанд ва дигар масъулин дастур дода шуд, ки ҷиҳати таъмини бехатарии шаҳрвандон ҳангоми оббозӣ тадбирҳои мушаххас андешида шавад, аз ҷумла навбатдории доимӣ ташкил гардад.
Дафтари матбуоти
Раиси шаҳри Хуҷанд
