04 Июн 2026
Як гурӯҳ равшанфикрон, ходимони давлатӣ ва ҷамъиятӣ, инчунин рӯзноманигорони вилояти Суғд таҳти роҳбарии Раиси вилояти Суғд, муовини якуми Раиси Маҷлиси миллии Маҷлиси Олии Ҷумҳурии Тоҷикистон Раҷаб Аҳмадзода ба шаҳри Душанбе сафар намуда, оромгоҳи фарзандони фарзонаи миллат, Қаҳрамонони Тоҷикистон Нусратулло Махсум ва Шириншо Шотемур, инчунин ходими намоёни давлативу ҷамъиятӣ Нисор Муҳаммадро зиёрат карданд.
Иштирокчиёни маросим бар сари турбати ин шахсиятҳои барҷаста гулчанбар ва гулдастаҳо гузошта, бо эҳтироми хос хотираи неки онҳоро гиромӣ доштанд. Зимни зиёрат аз хизматҳои бузурги онҳо дар роҳи ташаккули давлатдории миллӣ, ҳифзи манфиатҳои мардум, таҳкими пояҳои давлат ва рушди ҷомеа ёдоварӣ карда шуд.
Таъкид гардид, ки корномаи ибратбахши ин фарзандони содиқи Ватан дар саҳифаҳои таърихи миллат бо ҳарфҳои заррин сабт гардида, барои наслҳои имрӯзу фардо ҳамчун намунаи олии ватандӯстӣ, худшиносӣ ва садоқат ба давлату миллат хизмат хоҳад кард. Гиромидошти хотираи чунин шахсиятҳои таърихӣ дар таҳкими худогоҳии миллӣ, тарбияи насли ҷавон дар рӯҳияи эҳтиром ба арзишҳои давлатдорӣ ва арҷгузорӣ ба мероси маънавии миллат аҳаммияти бузург дорад.
Ёдовар мешавем, ки бо ташаббуси Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон мушти хоки оромгоҳи фарзандони барӯманди миллат — Қаҳрамонони Тоҷикистон Нусратулло Махсум ва Шириншо Шотемур, инчунин арбоби намоёни сиёсиву фарҳангӣ Нисор Муҳаммад аз шаҳри Москва ба Ватан оварда шуда, дар пойтахти мамлакат бо эҳтироми шоиста ба хок супурда шуд. Ин иқдоми таърихӣ ҳамчун рамзи арҷгузорӣ ба хизматҳои фарзандони содиқи миллат ва эҳтиром ба хотираи неки онҳо дар саҳифаҳои таърихи Тоҷикистони соҳибистиқлол ҷойгоҳи махсус дорад.
