29 Май 2026
Раиси вилояти Суғд Раҷаб Аҳмадзода ноиби Президенти Бонки аврупоии таҷдид ва рушд Марк Боуман ва ҳайати ҳамроҳонашро ба ҳузур пазируфт.
Дар ҷараёни мулоқот ҷонибҳо масъалаҳои марбут ба густариши ҳамкориҳо, саҳми Бонки аврупоии таҷдид ва рушд дар татбиқи лоиҳаҳои муҳими иҷтимоиву иқтисодӣ ва амалисозии нақшаҳои нави ҳамкориро мавриди баррасӣ қарор доданд.
Раиси вилояти Суғд Раҷаб Аҳмадзода меҳмононро ба вилояти Суғд хайрамақдам гуфта, таъкид намуд, ки ҳамкории беш аз бистсола бо Бонки аврупоии таҷдид ва рушд дар татбиқи як қатор лоиҳаҳои муҳими инфрасохторӣ ва иҷтимоӣ натиҷаҳои назаррас ба бор овардааст.
Зикр гардид, ки бо дастгирии Ҳукумати Ҷумҳурии Тоҷикистон ва сиёсати созандаи Пешвои миллат муҳтарам Эмомалӣ Раҳмон дар вилояти Суғд баҳри беҳтар намудани шароити зиндагии сокинон, рушди соҳаҳои иқтисодиву иҷтимоӣ ва татбиқи барномаҳои муҳим тадбирҳои муассир амалӣ мешаванд. Дар ин раванд ҷалби сармояҳои дохиливу хориҷӣ ва саҳми ташкилотҳои байналмилалии молиявӣ, аз ҷумла Бонки аврупоии таҷдид ва рушд, аҳамияти хоса дорад.
Таъкид шуд, ки бо маблағгузории Бонки аврупоии таҷдид ва рушд дар бахшҳои обу энергетика, кишоварзӣ ва дигар соҳаҳои муҳим як қатор лоиҳаҳои афзалиятнок амалӣ гардида, ҳамкориҳои мутақобилан судманд идома доранд.
Раиси вилоят иброз дошт, ки бо дастгирии Ҳукумати Ҷумҳурии Тоҷикистон дар шаҳрҳои Хуҷанд, Бӯстон, Гулистон ва ноҳияи Бобоҷон Ғафуров татбиқи лоиҳаҳои муҳим, аз ҷумла беҳтар намудани таъминоти аҳолӣ бо оби нӯшокӣ ва таҷдиди хатҳои партовоб дар назар дошта шудааст ва барои амалишавии онҳо ҷалби сармояи Бонки аврупоии таҷдид ва рушд муҳим арзёбӣ мегардад.
Ҳамчунин, таҷдиду навсозии пойгоҳҳои обкашӣ дар шаҳру ноҳияҳои пахтакор, истифодаи панелҳои офтобӣ дар муассисаҳои иҷтимоӣ ва корхонаву ташкилот, инчунин амалисозии дигар лоиҳаҳои нав дар самтҳои гуногун барои рушди минбаъдаи минтақа муҳим шуморида шуданд.
Ноиби Президенти Бонки аврупоии таҷдид ва рушд Марк Боуман аз сатҳи ҳамкорӣ бо Мақомоти иҷроияи ҳокимияти давлатии вилояти Суғд изҳори қаноатмандӣ намуда, таъкид кард, ки бонк давоми ду даҳсола дар бахшҳои давлатӣ ва хусусӣ лоиҳаҳои зиёдеро амалӣ кардааст.
Ҳамчунин вобаста ба татбиқи Барномаи “Шаҳри сабз”, ки бо маблағгузории Бонки аврупоии таҷдид ва рушд роҳандозӣ мегардад, маълумоти муфассал пешниҳод гардида, зикр шуд, ки бонк барои амалисозии лоиҳаҳои пешниҳодшуда ҳавасманд буда, минбаъд низ ҳамкориҳоро густариш хоҳад дод.
Дар фарҷоми мулоқот Раиси вилояти Суғд Раҷаб Аҳмадзода Марк Боуман ва ҳайати ҳамроҳонашро ба Ярмаркаи байналмилалии савдо “Суғд-2026”, ки моҳи июн баргузор мегардад, даъват намуд.
Пас аз анҷоми мулоқот Ёддошти тафоҳум миёни Бонки аврупоии таҷдид ва рушд ва шаҳри Хуҷанд дар доираи татбиқи Барномаи “Шаҳри сабз” ба имзо расид.
