28 Май 2026
Дар гимназияи №1 ба номи Раҳим Ҷалили шаҳри Хуҷанд ҳамоиши маърифатӣ таҳти унвони "Зиндагӣ чист?" баргузор гардид.
Дар ҳамоиш доир ба рӯйдоди таърихӣ боз як қаҳрамонии Қаҳрамони Тоҷикистон мущтарам Эмомалӣ Раҳмон бобати ба Ватан баргардондани мушти хоки оромгоҳи фарзандони фарзонаи миллат, қаҳрамони Тоҷикистон Нусратулло Махсум, Шириншоҳ Шоҳтемур ва мунодии илм, мубаллиғи китоб, маорифпарвар Нисор Муҳаммад бахшида шуд
Таъкид гардид, ки боиси ифтихори бузурги ҳар як шаҳрванди Тоҷикистон аст, ки ин иқдоми таърихӣ бо ташаббус ва талошҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон амалӣ гардид. Истиқболи мушти хоки ин фарзандони фарзонаи миллат аз ҷониби Пешвои миллат дар фурудгоҳ бо эҳтирому самимияти хос бори дигар нишон дод, ки дар даврони соҳибистиқлолӣ қадршиносӣ аз таърих, ҳифзи хотираи миллӣ ва арҷгузорӣ ба хизматҳои шахсиятҳои бузург ба сиёсати муҳими давлатӣ табдил ёфтааст.
Нусратулло Махсум ва Шириншоҳ Шотемур аз ҷумлаи он абармардоне буданд, ки дар солҳои бисёр ҳассоси таърихӣ барои ҳастии миллати тоҷик, таъсиси давлати миллӣ ва ҳифзи манфиатҳои мардум мубориза бурданд. Онҳо бо ҷасорат ва иродаи қавӣ барои эҳёи номи тоҷик ва таҳкими давлатдории миллӣ талош варзиданд.
Дар баробари онҳо, Нисор Муҳаммад ҳамчун чеҳраи барҷастаи фарҳангиву маърифатӣ дар рушди илму фарҳанг ва бедории шуури миллӣ саҳми арзишманд гузоштааст. Ин шахсиятҳо бо фаъолияти худ барои наслҳои оянда роҳи худшиносӣ ва ватандӯстиро боз намуданд.
Дар ҳамоиш доир ба рӯзгори ибратбахши яке аз аввалин сарварони гимназияи №1, иштирокчии ҶБВ Ҷаннатой Раҳимова, ки солҳои зиёд барои тарбияи насли ҷавон саҳми худро гузошта, аз тарафи нависанда Талъат Нигор доир ба ҳаёт ва фаъолияти ӯ китоби тозанашр бо номи "Муаллиме, ки афсар буд" аз ҷониби Рафоат Бобоева муаррифӣ карда шуд.
Ҳамзамон дар ҳамоиш доир ба мавзӯи "Касби ман- ифтихори ман" маърӯзаҳои ироа гардида, насли наврас дар оянда ба кадом касб машғул мешаванду роҳи зиндагии худро аз рӯи ҳамин касб пеш мебаранд маълумот дода шуд.
Директори гимназия Манзура Муинзода зикр дошт, ки ҳадафи асосии чорабинӣ баланд бардоштани ҳисси худшиносӣ, ватандӯстӣ, тарғиби арзишҳои инсонӣ ва омӯзиши илму дониш ва интихоби дурусти касбу ҳунар мебошад.
Инчунин намояндаи шуъбаи маорифи шаҳри Хуҷанд, сармутахассиси шуъбаи таблиғот ва иттилооти ҲХДТ дар вилояти Суғд Зеварой Бобоева, раиси КИ ҲХДТ дар шаҳри Хуҷанд Мунзифа Ҷабборӣ, хешону пайвандони Ҷаннатой Раҳимова, собиқадорону фаъолон роҳбари маҳфил Матлуба Муинова иштирок ва баромад намуданд.
Зимни суханрониҳо таъкид карда шуд, ки ҷавонон ҳамчун нерӯи пешбарандаи ҷомеа бояд маъно ва қадри зиндагиро дуруст дарк намуда, барои расидан ба ҳадафҳои созанда дониш омӯзанд, соҳибкасб гарданд ва дар рӯҳияи ватандӯстиву инсонпарварӣ тарбия ёбанд.
Иштирокчиён доир ба масъалаҳои ахлоқи ҳамида, эҳтироми падару модар, дӯст доштани Ватан, пешгирии омилҳои номатлуб ва истифодаи самараноки вақти холӣ ибрози андеша намуданд. Ҳамчунин қайд гардид, ки баргузории чунин чорабиниҳо барои ташаккули ҷаҳонбинии ҷавонон, баланд бардоштани масъулияти шаҳрвандӣ ва ҷалби онҳо ба корҳои созанда нақши муҳим мебозад.
Дар фарҷоми ҳамоиш миёни хонандагон мубодилаи афкор сурат гирифта, барои болидахотирии меҳмонон барномаи фарҳангӣ пешниҳод гардид.
Дафтари матбуоти
Раиси шаҳри Хуҷанд
