26 Май 2026
Шоми дирӯз бо ибтикори Планетарияи ба номи Абӯмаҳмуди Хуҷандӣ дар Боғи Абӯмаҳмуди Хуҷандӣ бахшида ба таҷлили бошукӯҳи 35 -умин солгарди Истиқлолияти давлатии Ҷумҳурии Тоҷикистон ва 46 - умин солгарди таъсисёбии нахустин Планетарий дар Тоҷикистон ҳафтаи ҳаводорони илми афлокро оғоз гардид.
Директори Планетарияи ба номи Абӯмаҳмуди Хуҷандии шаҳри Хуҷанд Фирдавс Ашӯрматов чорабиниро оғоз ва иттилоъ дод, ки он дар асоси нақша-чорабиниҳои Раёсати маорифи вилоят роҳандозӣ гардида, дар доираи он намоиши хиёбонии Моҳ ва сайёраҳоро тариқи телескопҳои диҷетолӣ ва рақамӣ тӯли як ҳафта ташкил карда мешавад.
Иттилоъ дода шуд, ки намоиш аз ҷониби астрофизики номии Федератсияи Руссия - сармутахассиси Планетарияи шаҳри Барнаули Федератсияи Руссия, роҳбари лоиҳаи "Наблюдательный Барнаул" ва коршиноси аршади соҳаи физика ва астрофизикаи шабакаи телевизионии "Россия" Владислав Токарев ба роҳ монда мешавад.
Намоиш бахшида ба Истиқлолияти давлатии Ҷумҳурии Тоҷикистон комилан ройгон буда, ҳаводорони илми афлок ва хоҳишмандон метавонанд ба макони баргузории ҳозир шаванд ва аз тасвири зиндаи радифи Замин - Моҳ ва сайёраҳои системаи офтобӣ ҳаловат баранд.
Ҳамчунин ҳамарӯза соатҳои 21:00 ва 22:00 дар толори осмони ситоразор намоиши филмҳои илмӣ низ ба роҳ монда мешавад.
Сармутахассиси Планетарияи шаҳри Барнаули Федератсияи Руссия Владислав Токарев баромад намуда, маъмурияти Планетарияи ба номи Абӯмаҳмуди Хуҷандӣ дар Боғи Абӯмаҳмуди Хуҷандиро бо 46-умин солгарди фаъолият таҳният гуфт.
Сипас дар гумбади бузурги Планетария намоиши хиёбонии Моҳ ва сайёраҳо, инчунин бори аввал барномаи "Сонификатсия", "Стелариум" мавриди истифода қарор дода шуд.
Меҳмонони чорабинӣ на танҳо аз телескоп бо сайёраҳои системаи офтобӣ шинос шуданд, балки садоҳои ҳар сайёраро тариқи барномаи махсус шуниданд ва аз гумбади бузурги Планетария филмҳои илмӣ тамошо карданд.
Лозим ба таъкид аст, ки тайи 7 рӯз баргузории чорабиниҳои гуногун барои кӯдакон аз ҷумла фестивалҳои роботтехникӣ, ракета-шоу, авиамоделӣ ва аквагрим низ бо дастгирии Раёсати маорифи вилоят ба нақша гирифта шудааст.
Тамоми ҳаводорони илми афлок ва меҳмонону сокинони вилояти Суғд ва шаҳри Хуҷандро метавонанд давоми ҳафта ба Планетарияи ба номи Абӯмаҳмуди Хуҷандӣ, ки дар Боғи Абӯмаҳмуди Хуҷандӣ воқеъ аст омада, намоиши барномаҳои онро комилан ройгон тамошо намоянд.
Дафтари матбуоти
Раиси шаҳри Хуҷанд
