16 Май 2026
Имрӯз дар майдони назди Кохи «Суғдиён”-и шаҳри Хуҷанд масроми истиқболи ғолибони Чемпионати Осиё миёни навравон, ки дар шаҳри Тошканди Ҷумҳурии Ӯзбекистон баргузор гардид ва 4 нафар варзишгарони муваффақи тоҷик миёни муштзанҳои то 17-сола натиҷаҳои назаррас ба даст оварданд, бо иштироки муовини Раиси вилояти Суғд Зуфар Исмоилзода, муовини Раиси шаҳри Хуҷанд Ҷамшед Набизода, сардори Раёсати кор бо ҷавонон ва варзиши вилояти Суғд Бахтиёр Исматзода, намояндагони Федератсияи бокси вилоят, хонандагон, омӯзгорон, варзишгарон ва волидайн баргузор шуд.
Иттилоъ дода шуд, ки чанде қабл дар Чемпионати Осиё миёни наврасон оид ба бокс, ки дар шаҳри Тошканди Ҷумҳурии Ӯзбекистон баргузор гардид, 4 нафар варзишгарони муваффақи тоҷик миёни муштзанҳои то 17-сола натиҷаҳои назаррас ба даст оварданд:
Беҳрӯз Умаров — вазни 54 кг, ҷойи якум
Анушервон Сидиқов — вазни 46 кг, ҷойи якум
Муҳаммадҷон Сулаймонов — вазни 58 кг, ҷойи сеюм
Азизахон Бобоҷонова — вазни 52 кг, ҷойи сеюм.
Зуфар Исмоилзода муштзанонро бо ин дастоварди назаррас аз номи роҳбарияти Мақомоти иҷроияи ҳокимияти давлатии вилояти Суғд ва Федератсияи бокси вилоят таҳният гуфта, барояшон дар мусобиқаҳои минбаъда барору зафарҳои нав таманно намуданд.
Таъкид шуд, ки ин варзишгарон ифтихори тамоми тоҷикистониён мебошанд, зеро ба шарафи онҳо Парчами Тоҷикистон дар Чемпионати Осиё паравшон гардид.
Зикр гардид, ки Президенти кишвар муҳтарам Эмомалӣ Раҳмон пайваста ба рушди соҳаи варзиш ва дастгирии варзишгарон таваҷҷуҳи ҷиддӣ зоҳир менамоянд.
Пешвои миллат дар суханрониҳояшон варзишгаронро ба сайқал додани маҳорати касбӣ ва иштироки фаъолона дар мусобиқаҳои байналмилалӣ даъват менамоянд. Варзишгарон дар ин марҳалаи муҳими созандагӣ ҳамчун намунаи ибрат барои ҷавонон ва рамзи садоқат ба Ватан хизмат менамоянд.
Тавре Сарвари давлат муҳтарам Эмомалӣ Раҳмон таъкид менамоянд, ҳар як пирӯзии варзишгар — пирӯзии миллат ва давлат мебошад. Имрӯз варзиш дар Тоҷикистон ба рамзи сулҳ, ваҳдат ва пешрафти устувор табдил ёфтааст.
Дафтари матбуоти
Раиси шаҳри Хуҷанд
