04 Май 2026
Бо иқдоми Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар Коллеҷи тиббии ҷумҳуриявӣ олимпиадаи фанҳои тахассусӣ байни донишҷӯёни муассисаҳои тибби таҳсилоти миёнаи касбии ҳудуди кишвар ташкил ва баргузор гардид. Дар чорабинии мазкур беҳтарин донишҷӯёни ин зинаи таҳсил сарҷамъ омада, дониш, малака ва маърифати зеҳнии худро нишон доданд.
Боиси ифтихору сарфарозӣ аст, ки Муассисаи давлатии таълимии “Коллеҷи тиббии шаҳри Хуҷанд ба номи Ю.Б. Исҳоқӣ” дар байни муассисаҳои таҳсилоти миёнаи касбӣ мақоми дуюмро ишғол намуда, бо дипломи дараҷаи 2 сарфароз гардид.
Ҳамчунин Коллеҷи тиббии шаҳри Хуҷанд ба номи Ю.Б.Исҳоқӣ дар Олимпиадаи ҷумҳуриявии донишҷӯёни муассисаҳои таълимии таҳсилоти миёнаи касбии Ҷумҳурии Тоҷикистон сазовори ҷои сеюм гардид. Олимпиада бо ибтикори Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон баргузор гардид.
Ба ин муносибат дар Коллеҷи тиббии шаҳри Хуҷанд маросими истиқболи расмии ғолибони Олимпиада баргузор шуд.
Директори Коллеҷи тиббии шаҳри Хуҷанд Нурзода Амирҷон Рузихон ғолибонро бо ин дастовард табрику таҳният гуфта, аз ҷумла афзуд, ки Олимпиада бо мақсади дар сатҳи баланд истиқбол гирифтани ҷашни муҳими миллӣ 35-умин солгарди Истиқлолияти давлатии Ҷумҳурии Тоҷикистон роҳандозӣ гардида, ҳадафи асосии он тарбияи кадрҳои баландихтисос, тақвияти шавқи донишҷӯён ба илм, таҳкими заминаҳои зеҳнӣ ва омодасозии мутахассисони рақобатпазир дар бозори меҳнат мебошад.
Боиси ифтихор ва сарфарозист, ки Дипломро дар вазъияти тантанавӣ муовини якуми Вазири тандурустӣ ва ҳифзи иҷтимоии аҳолии Ҷумҳурии Тоҷикистон Юсуфӣ Саломуддин ва сардори Раёсати таҳсилоти тиббию фармасевтӣ , сиёсати кадрҳо ва илм Шаҳло Ашӯриён супориданд.
Ин дастовард самараи фаъолияти бонизом, пояи мустаҳаками моддию техникӣ ва дар мадди аввал гузоштани сифати таҳсилот дар муассиса маҳсуб меёбад. Ин дастовард масъулияти ҷомеаи меҳнатии муассисаро дар татбиқи ҳадафҳои бунёдии давлат ва Ҳукумати кишвар боз ҳам баланд мебардорад.
Нурзода Амирҷон Рузихон аз номи роҳбарияти муассиса кулли иштирокдорони олимпиада, устодон ва шогирдонро бо ин комёбӣ табрику муборакбод намуда, орзуи он намуд, ки бигзор ҳамвора илм дар амалия дар ин боргоҳи илму маърифат татбиқи амалӣ ёбад.
Ғолибони олимпиадаҳо аз ҷониби директори Коллеҷи тиббии шаҳри Хуҷанд ба номи Ю.Б.Исҳоқӣ бо Сипоснома қадрдонӣ шуданд.
Ҳамчунин ғолибони озмунҳои варзишӣ бо аз ҷониби раҳбарияти муассиса бо Сипоснома қадрдонӣ гардиданд.
Дафтари матбуоти
Раиси шаҳри Хуҷанд
