03 Апрель 2026
Недоступен ни однин перевод.
Имрӯз бо ташаббуси шуъбаи кор бо занон ва оилаи Мақомоти иҷроияи ҳокимияти давлатии шаҳри Хуҷанд дар тарабхонаи “Сайҳун”-и шаҳр даври шаҳрии Озмуни ҷумҳуриявии «Кадбонуи беҳтарин» баргузор шуд.
Дар Озмун идораву ташкилот, муассисаву маҳаллаҳои шаҳри Хуҷанд фаъолона иштирок намуданд.
Таъкид шуд, ки тарғиби ҳунари асили фарҳанги кадбонугии занону духтарони тоҷик, гиромидошти шахсияту эътибори зан дар хонавода ва ҷомеа, баланд бардоштани маърифати хонадорӣ, омода намудани духтарон ба ҳаёти мустақилона, арҷ гузоштан ба ҳунари кадбонуҳо, завқи дастархонороӣ, эҳё ва рушди таомҳои миллӣ ва анъанаҳои ороиши миллӣ рукнҳои муҳими арзишҳои миллии халқи тоҷик мебошанд. Истеъдоди нотакрори ҳунармандии занону духтарони тоҷик онҳоро ҳамчун занони бохираду порсо, созандаву офаранда, фарҳангиву фарҳангсолор муаррифӣ менамояд.
Ҳамин аст, ки имрӯз аз ҷониби Ҳукумати мамлакат, хусусан Президенти Ҷумҳурии Тоҷикистон муҳтарам Эмомалӣ Раҳмон нисбат ба соҳибкасбу соҳибдониш гардидани занону духтарон, ҷалби занон ба омӯхтани касбу ҳунар, ҳамзамон бо ҷойи кори доимӣ таъмин намудани онҳо пайваста тадбирҳои судманд андешида мешаванд.
Баргузории чунин намоишгоҳҳо, озмунҳо, фестивалҳои ҷумҳуриявӣ имконият медиҳад, ки паҳлуҳои нозуки санъати асили ҳунармандӣ, кадбонугӣ, маърифати оиладорӣ, сарфаву сариштакорӣ мавриди истифода қарор гирифта, беҳтарин ҳунармардон қадршиносӣ карда шаванд. Ин васила барои пайдо намудани шавқу рағбати онҳо ба омӯзиши расму оин, мероси ниёгон, анъанаи миллӣ ва густариши маънавиёти ҷомеа такони хуб мебахшад.
Сипас ҳайати ҳакамот бо ҳунари кадбонугии идораву ташкилот, муассисаву маҳаллаҳои шаҳри Хуҷанд шинос шуда, онро баҳогузорӣ намуданд.
Муовини Раиси шаҳри Хуҷанд Муяссара Қаҳҳорӣ ва як қатор бонувони барӯманди шаҳр дар чорабинӣ иштирок намуда, аз ҷумла иброз доштанд, ки озмуни ҷумҳуриявии «Кадбонуи беҳтарин» бо мақсади тарғиб, эҳё ва ҳифзу нигоҳдошти беҳтарин суннатҳои миллии ниёгони шарафманди тоҷик дар самти омода намудани хӯрокҳои миллӣ, хӯришҳои болаззат, таомҳои миллии маҳаллӣ, баланд бардоштани завқи кадбонугӣ ва ҳунари дастархонороӣ соли 8-ум аст, ки гузаронида мешавад.
Яке аз ҳадафҳои асосии чунин озмунҳои ҷумҳуриявӣ дар самти ҳунармандии занон- ин ҳавасмандгардонӣ ва ҷалби занони ҳунарманд, соҳибзавқ ва кадбонуҳои моҳир ба эҳёи таомҳои милливу маҳаллии аз байнрафта ва ривоҷ додани пухту пази таомҳои миллӣ дар тарабхонаву ошхонаҳо, омода намудани ҷавондухтарон ба ҳаёти мустақилона, баланд бардоштани маърифати хонадорӣ ва завқи дастархонороӣ, баланд бардоштани мақоми зан дар ҷомеа ва зиёд намудани ҷойи нави кор мебошад.
Сипас ба ғолибон ва иштирокчиёни фаъол Диплом, туҳфаҳои хоиравӣ ва сипосномаҳо тақдим гардиданд.
Ҳамин тавр, гуруҳи кадбонуҳои Беморхонаи клиникавии шаҳрии №1 –и шаҳри Хуҷанд дар даври шаҳрии Озмуни ҷумҳуриявии «Кадбонуи беҳтарин» мақоми аввалро ба даст овард. Ҷойи дуюмро кадбонуҳои ДДХ ба номи академик Бобоҷон Ғафуров ва мақоми сеюмро аҳли маҳаллаи “Тиллокон”-и шаҳри Хуҷанд соҳиб шуданд.
Ғолибон дар даври вилоятии озмун иштирок хоҳанд намуд.
Ҳамзамон ба як қатор хатмкунандагони маҳфили “Гулдузӣ”-и назди маҳаллаи “Содирхон Ҳофиз” низ шаҳодатномаҳо тақдим шуд.
Барномаи фарҳангӣ ба чорабинӣ ҳусни анҷом бахшид.
Дафтари матбуоти
Раиси шаҳри Хуҷанд
