20 Март 2026
Недоступен ни однин перевод.
Субҳи имрӯз дар шаҳри бостонии Хуҷанд фазои идона ҳукмфармо буд. Дар ҳоле, ки шаҳр ба истиқболи Наврӯзи оламафрӯз омодагӣ мебинад, Раиси Кумитаи иҷроияи Ҳизби Халқии Демократии Тоҷикистон дар вилояти Суғд Ҷаҳонгир Салимзода бо як иқдоми наҷиб занони покизакори шаҳрро, ки саҳаргоҳон аввалин шуда ба ободии диёр камар мебанданд, табрику таҳният гуфт.
Ҷаҳонгир Салимзода зимни суҳбати самимӣ ба бонувони заҳматкаш иброз дошт, ки маҳз бо шарофати дастони гулрези онҳо имрӯз кӯчаву хиёбонҳои мо чун арӯси нав ороста ва барои ҷашн омодаанд.
«Шумо чеҳраҳои воқеии ободии Ватанед. Меҳнати софдилона ва шабонарӯзии Шумо дар тозагиву хуррамӣ ва ободии кишвар шоистаи таҳсин аст!», — таъкид намуд Ҷаҳонгир Салимзода.
Дар раванди мулоқот зикр гардид, ки қадрдонии заҳмати инсон ва дастгирии бонувон ҳамеша дар меҳвари сиёсати хирадмандонаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дорад. Сарвари давлат ҳамеша таъкид менамоянд:
«Мо ба заҳмати содиқонаи бонувону занони кишвар, ки дар ҳама соҳаҳои ҳаёт, махсусан дар ободониву хуррамгардонии Ватан саҳми арзанда мегузоранд, арҷ мегузорем ва онҳоро ҳамеша дастгирӣ мекунем».
Дар фазои идона ба ҳар як бонуи покизакор тӯҳфаҳои хотиравии Кумитаи иҷроияи ҲХДТ дар вилояти Суғд тақдим карда шуд. Ин иқдом на танҳо боиси болидахотирии занон, балки нишони эҳтироми баланди ҷомеа ба касби пурмашаққат, вале пуршарафи онҳост.
Наврӯз бо хусусиятҳои таваҷҷуҳ ва самимият ба хонадони ҳар як тоҷикистонӣ файзу баракати нав меорад!
