16 Март 2026
Субҳи имрўз дар толори Мақомоти иҷроияи ҳокимияти давлатии шаҳри Хуҷанд таҳти роҳбарии Раиси шаҳр Фирдавс Шарифзода бо иштироки муовини аввал, муовинони Раиси шаҳр, роҳбари дастгоҳи Раиси шаҳр, мудирони шўъбаю бахшҳо, роҳбарони сохторҳои мақомоти иҷроияи ҳокимияти давлатии шаҳри Хуҷанд, бахшҳои корхонаи воҳиди давлатии коммуналии «Сарраёсати ободонӣ ва хоҷагии манзилию коммуналӣ»-и шаҳр, раисони маҳаллаҳо ҷаласаи васеи шаҳрдорӣ баргузор гардид.
Фирдавс Шарифзода нахуст таваҷҷуҳи иштирокдорони ҷаласаро ба корҳои омодагӣ ба таҷлили бошукуҳи Наврўзи байналмилал, аз ҷумла омода намудани иншооти ҷашнӣ ҷалб намуда, таъкид дошт, ки Наврӯз оғози соли нав ва ибтидои тақвими нав буда, ба ҷашни баробаршавии шабу рӯз, инъикоскунандаи фалсафаи баробарии инсоният дар рӯи Замин табдил ёфтааст. Мақоми он дар фарҳанги тоҷик ва ҳамзамон дар тамаддуни ҷаҳонӣ арзишманд мебошад. Ин ҷашни аҷдодии мо шукуҳу шаҳомати беназир дошта, дар худ рамзи меҳрофарӣ, равшангароӣ, зебоидӯстӣ, ҳамнавоӣ бо табиату Замин, неруи тоза ва қавӣ пайдо намудан, ободкорию накӯкориро инъикос ва таҷассум намудааст. Бинобар ин ягон боду газанди рӯзгору зарбаҳои таърих натавонист Наврӯз ва арзишҳои муқаддаси онро аз байн барад.
Истиқлоли Тоҷикистони азиз ва сиёсати хирадмандонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бар он ибтидо гузошт, ки заминаи ваҳдати миллӣ устувор гашта, урфу одат, расму ойини миллии ниёгон ва арзишҳои муқаддаси аҷдодиамон дар симои Наврӯз дубора эҳё гардида, ба тамоми оламиён муаррифӣ ва ба ҷашнвораи ҷаҳонӣ табдил ёбанд. Ин паёми нек ба шоирону адибони муосири мо барои эҷоди шеъру чакидаҳои наву рангин илҳоми тоза бахшид.
Зикр гардид, ки фазилати Наврӯз ҳамчун ҷашни пайванди инсон бо табиат аз вусъати амалҳои созандаву ободгарона, сабзонидану парвариши ниҳолҳо ва бунёди боғҳо иборат аст. Аз ҷумла, обод намудани кўчаву хиёбонҳо, афзун намудани истеҳсоли маҳсулоти худӣ, бунёди корхонаву коргоҳҳои нави истеҳсолӣ, инчунин, тозаву озода гардонидани хонаву кошона, хиёбону маҳалҳои зист ва дигар амалҳои ободонӣ аз ҷумлаи корҳое мебошанд, ки ҳар кадоми мо бояд онҳоро ба хотири боз ҳам ободу зебо ва мунаввар гардонидани шаҳри бостонии Хуҷанд равона намоем.
Фирдавс Шарифзода ба муовинони Раиси шаҳри Хуҷанд, масъулини кўчаву хиёбонҳо ва раисони маҳаллаҳо дастур дод, ки корҳои ободонӣ, кабудизоркунӣ ва дарахтшинонию гулзоркуниро вусъат бахшида, намои зоҳирии маҳаллаву кўчаҳоро ба фазои идона мубаддал гардонанд. Ба масъулини дахлдор ҷиҳати омодагӣ ва дар сатҳи баланд баргузор кардани чорабиниҳои наврӯзӣ дастуру супоришҳо дода шуд.
Ҳамзамон масъулин ҷиҳати вусъат додани сабзкорӣ, шинонидани ниҳолҳои ҳамешасабз, рангубори биноҳои баландошёна, мумфаршкунии роҳҳо, тоза намудани ҷӯйборҳо, саривақт гирифтани партов, роҳандозии кори муназзами хадамоти коммуналӣ ва ғайраҳо вазифагузорӣ карда шуданд.
Дафтари матбуоти
Раиси шаҳри Хуҷанд
