04 Март 2026
Недоступен ни однин перевод.
Дар гимназияи №1 ба номи Раҳим Ҷалили шаҳри Хуҷанд ҳамоиши идона бахшида ба Рӯзи модар бо иштироки аҳли маорифи шаҳр ва меҳмонон баргузор шуд.
Дар чорабинӣ, муовини Раиси шаҳри Хуҷанд Муяссара Қаҳҳорӣ, сардори раёсати маорифи вилоят Гулсара Мирзозода, раиси Кумиҷроияи ҲХДТ дар шаҳри Хуҷанд Мунзифа Ҷабборӣ, мудири маорифи шаҳри Хуҷанд Мадина Салимзода аҳли бонувони соҳаи маорифи шаҳрро бо фарорасии фасли зебои сол - баҳори оламафрӯз ва ҷашни модарон табрик гуфта, барояшон саломатӣ ва саодати ҳамешагӣ орзу намуданд.
Таъкид шуд, ки ҳамасола дар оғози фасли баҳор ва остонаи зеботарин ҷашни аҷдодиамон - Наврўзи дилафрўз доир шудани иди бонувону хоҳарон ифодагари бузургию шаҳомати Зан – Модар мебошад. Маҳз бо ташаббус ва ибтикори Асосгузори сулҳу Ваҳдати миллӣ – Пешвои миллат, Президенти Тоҷикистон муҳтарам Эмомалӣ Раҳмон санаи 8-март дар ҷумҳурии мо ҳамчун Рўзи Модар таҷлил карда мешавад, ки баёнгари сипосу эҳтиром ва ихлоси бепоён ба Зан-Модар маҳсуб меёбад. Чуноне ки Пешвои муаззами миллат муҳтарам Эмомалӣ Раҳмон таъкид кардаанд: “Ба оғози эҳёи табиат – фасли рўидани сабза, шукуфтани гулҳо ва ҷомаи сабзи баҳорӣ ба тан кардани дашту саҳрои сарзамини зебоямон рост омадани Рўзи Модар рамзи басо неку хуҷаста мебошад. Чунки агар баҳор оғози эҳёи табиат ва зиндагӣ, ибтидои нақшаву ниятҳо ва ташаббусу иқдомоти тоза, омодагӣ ба киштукор ва оғози нави корҳои ободониву созандагӣ бошад, модар худ оғозгари зиндагӣ ва бахшандаи ҳаёт мебошад. Аз ин рў, мо модарро ҳамчун мавҷуди муқаддас дўст медорем, мақому манзалат, қадру қимат ва ҳурмату эҳтироми ўро ҳамеша пос медорем”.
Зикр гардид, ки воқеан ҳам Модар арзандаи ҳама гуна эҳтиром, қадршиносӣ ва дўстдорӣ мебошад, зеро ў меҳрубонтарин инсон барои ҳар як шахс буда, фарзанди худро бузургворона ва бо дилсўзиву бахшоиш ҳамеша дастгиру пуштибон аст, ба хотири роҳату осоиши фарзандаш шабу рўз заҳмат мекашад ва намегузорад, ки нури чашмони ў ба ранҷу озоре гирифтор гардад, бардаму солим ба камол расад, соҳиби одобу маърифат шавад, илму дониш ва касбу ҳунар омўзад ва дар оянда барои ҷомеа хизмати сазовору шоиста анҷом диҳад.
Сипас ба як қатор фаъолони соҳаи маорифи шаҳр Сипоснома ва туҳфаҳои хотиравӣ тақдим гардид.
Барномаи консертии муҳассилини муассисаи таълимии шаҳри Хуҷанд ва аҳли санъати шаҳр табъи иштирокдорони чорабиниро болида намуд.
Дафтари матбуоти
Раиси шаҳри Хуҷанд
