02 Март 2026
Недоступен ни однин перевод.
Раиси вилояти Суғд Раҷаб Аҳмадзода ва Раиси шаҳри Хуҷанд Фирдавс Шарифзода бо фаъолияти Шуъбаи ВКД дар шаҳри Хуҷанд шинос гардида, бо шароити хизматии кормандони милитсия аз наздик ошно шуданд.
Зимни мулоқот бо ҳайати шахсӣ Раиси вилоят Раҷаб Аҳмадзода таъкид намуд, ки мақомоти корҳои дохилӣ ҳамчун сипари боэътимоди давлат дар ҳифзи сулҳу субот, ваҳдату якпорчагӣ ва таъмини тартиботи ҷамъиятӣ нақши калидӣ доранд.
Роҳбари вилоят иброз дошт, ки маҳз дар натиҷаи дастгириву пуштибониҳои доимии Пешвои миллат муҳтарам Эмомалӣ Раҳмон дар солҳои соҳибистиқлолӣ барои фаъолияти шабонарӯзии кормандони мақомоти қудратӣ шароити мусоиди хизматӣ фароҳам оварда шуда, онҳо ҳамеша таҳти ғамхории давлату ҳукумат қарор доранд.
Изҳори боварӣ карда шуд, ки кормандону хизматчиёни мақомоти корҳои дохилии шаҳр минбаъд низ ба савганди касбӣ содиқ монда, баҳри ҳифзи ҳуқуқу манфиатҳои шаҳрвандон, таъмини оромии ҷомеа ва мубориза бо ҳар гуна зуҳуроти ҷинояткорӣ тамоми донишу малака ва неруву тавони худро равона месозанд.
Дар доираи дастгирии моддиву техникии сохтор ба шуъбаи мазкур ду адад автомобили нави барқӣ тақдим гардид, ки ба беҳтар гардидани сатҳи хизматрасонӣ ва иҷрои босамари вазифаҳои хизматӣ мусоидат менамояд.
Қайд гардид, ки бо дастгирии Ҳукумати мамлакат, мақомоти иҷроияи ҳокимияти давлатии вилоят ва шаҳр заминаи моддиву техникии милитсияи шаҳр таҳким ёфта, таъмиру таҷдиди утоқҳои корӣ марҳила ба марҳила идома дорад. Ҳамзамон, дар самти рақамикунонии фаъолияти милитсия истифодаи таҷҳизоти муосир, аз ҷумла низоми симошиносӣ ва харитаи электронии маъмурии шаҳр ҷорӣ гардида, барои қабули арзу муроҷиати шаҳрвандон шароити муносиб фароҳам оварда шудааст.
Кормандони мақомоти милитсия дар навбати худ кӯшиш ба харҷ медиҳанд, ки оромиву суботи ҷомеа ва тартиботи ҷамъиятӣ ҳамеша таъмин карда шавад.
Дафтари матбуоти
Раиси шаҳри Хуҷанд
