Раиси шаҳри Хуҷанд Фирдавс Шарифзода ҷаласаро ҳусни оғоз бахшида, аз ҷумла зикр намуд, ки имрӯз ба шукргузорӣ аз фазои орому осуда ва кору рӯзгори бомаром, фаъолони шаҳри Хуҷанди бостонӣ дар партави сиёсати оқилона ва созандаву бунёдкоронаи Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон барои ободии Ватан, рушду нумуъи соҳаҳои хоҷагии халқ, арҷгузорӣ ба дастовардҳои даврони истиқлол софдилона меҳнат мекунанд. Рушду тараққиёт ва пешрафту шукуфоии ватани мо на ҳамеша ба душманони давлату миллати тоҷик хуш меояд ва онҳо талош доранд, ки бо ноором сохтани вазъи сиёсӣ ҳадафу мақсадҳои нопоки хешро дар ин сарзамини ободу зебо, ки беш аз ҳарвақта тараққӣ меёбад, амалӣ намоянд. Дар ин росто ҷинояти савдои одамон дар баробари терроризму эстремизм, сепаратизм, гардиши ғайриқонунии маводи мухадир ва дигар таҳдидҳои геополитикӣ мушкилоти нигаронкунанда мебошад, ки ин нукта дар Паёми навбатии Пешвои муаззами миллат, Президенти мамлакат муҳтарам Эмомалӣ Раҳмон ба Маҷлиси Олӣ ироа гардид ва таъкид шуд, ки масъалаҳои марбут ба савдои одамон дар шароити имрӯза таҳти таваҷҷуҳи ҷиддии Давлату Ҳукумати мамлакат қарор дорад.

Дар Ҷумҳурии Тоҷикистон Нақшаи миллии муқовимат ба савдои одамон барои солҳои 2025-2027 қабул шудааст, ки масъалаҳои гуногуни муқовимати давлатӣ ва ташкилотҳои ғайридавлатиро ба танзим дароварда, он сиёсати Ҷумҳурии Тоҷикистон дар самти муқовимат бо савдои одамонро муайян менамояд. Робита ба ин дар Мақомоти иҷроияи ҳокимияти давлатии шаҳри Хуҷанд комиссия амал намуда, нақша-бандҳои қабулшуда ҳамеша мавриди таваҷҷуҳ қарор дода мешавад.

Иттилоъ дода шуд, ки ҳафтаи сипаришуда аз ҷониби Раиси Комиссияи байниидоравӣ оид ба муқовимат ба савдои одамон, муовини якуми вазири корҳои дохилии Ҷумҳурии Тоҷикистон генерал-полковники милится Аламшозода Абдураҳмон Аламшо доир ба натиҷаҳои фаъолияти ҳудудӣ оид ба муқовимат ба савдои одамон дар вилояти Суғд дар соли 2025 бо иштироки Раиси вилояти Суғд Раҷаб Аҳмадзода ва аъзоёни Комиссияи ҳудудӣ оид ба муқовимат ба савдои одамон вохӯрӣ баргузор карда шуда, натиҷаҳои фаъолияти комиссияи ҳудудӣ оид ба муқовимат ба савдои одамон дар вилояти Суғд дар соли 2025-ро баррасӣ ва таҳлил гардид.

Сипас доир ба мавзуъи матраҳшуда сардори ШВКД ҶТ дар шаҳри Хуҷанд полковники милитсия Каримӣ Раҳматулло Расулзода, раиси Кумиҷроияи ҲХДТ дар шаҳри Хуҷанд Мунзифа Ҷабборӣ, устоди Донишгоҳи ҳуқуқ, бизнес ва сиёсати Тоҷикистон, номзади илмҳои ҳуқуқшиносӣ, дотсент Ботурхоҷа Қобилзода баромад намуданд.

Дар ҷараёни баромадҳо вобаста ба ташаббус ва корҳои анҷомдода дар самти пешгирӣ ва муқовимат ба савдои одамон ва нақшаи фаъолияти комиссия таваҷҷуҳ карда шуда, тарзу усули корбарӣ ва инъикоси он дар ВАО ҷиҳати баланд бардоштани маърифати ҳуқуқии шаҳрвандон ва дигар паҳлуҳои масъалаи мазкур муҳокима гардид.

Таъкид шуд, ки Ҷумҳурии Тоҷикистон ҳамчун узви ҷомеаи ҷаҳонӣ таҳти роҳбарии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба масъалаҳои ҳуқуқу озодиҳои инсон аҳамияти авалиндараҷа дода, тибқи меъёри конститутсионӣ арзиши олӣ доштани ҳуқуқи инсонро эътироф менамояд.

Дар анҷоми ҷаласа Раиси шаҳри Хуҷанд Фирдавс Шарифзода аз аҳли толор бахусус, шахсони мутасаддии соҳа, раисони маҳаллаҳо, масъулини соҳаи маорифу тандурустӣ, ҷавонон, бонувон, ва дигарон даъват ба амал овард, ки бояд корбарӣ боз ҳам ҷоннок карда шавад.Таъкид гардид, ки мо бояд ба қадри сулҳу субот ва ваҳдати миллӣ расем.

Дар ҳамдастии фаъолони ҷомеа, аҳли ҷамоатчигӣ, бахусус ҷавонон, ки ояндасози давлату миллат ба ҳисоб мераванд, талошу кӯшиши худро алайҳи ҷинояти савдои одамон, ки ҳамчун зуҳуроти манфӣ эътироф шудааст, равона намуда, муборизаи оштинопазир барем. Танҳо бо такя ба имконоту иқтидори давлат ва иродаи мустаҳками мардум, бо вусъат додани корҳои тарғиботию ташвиқотӣ ва таҳкими худшиносиву худогоҳии миллӣ метавонем пеши ҷараёнҳои номатлуб ва амалӣ шудани нақшаҳои нопоки чунин гурӯҳҳои ҷиноятпешаро гирем.

Шарҳ додан

Ном (ҳатмӣ)

E-Mail (ҳатмӣ)

Сайт

Номнависӣ барои қабули шарҳҳои нав

Нав кардан

Шарҳ додан

Отменить