Номаи табрикотии Раиси шаҳри Хуҷанд Фирдавс Шарифзода ба муносибати Рўзи таъсисёбии Қувваҳои мусаллаҳ

Миллати тоҷик афсарону аскарон, сарбозони далер, ҳомиёни ватанро дар ин санаи муборак шодбод мегўяд ва хизматҳои шоёнашонро дар ҳифзи марзу буми Тоҷикистони соҳибистиқлол шоиста медорад. Бешак, дар фосилаи ин 33 сол Артиши миллии Ҷумҳурии Тоҷикистон барои ҷавонон мактаби бузурги ватандорӣ, оини ҷавонмардӣ, пойдевори тарбияи ҳарбӣ – ватандўстии насли наву далери тоҷик гардид.

Сарфармондеҳи Олии Қувваҳои мусаллаҳи Ҷумҳурии Тоҷикистон мўҳтарам Эмомалӣ Раҳмон ба масъалаи мустаҳкам намудани иқтидори мудофиавии мамлакат ҳамасола диққати махсус дода, ба сохтори ташкиливу штатӣ, таъминоти моддиву техникӣ ва пуррагардонии сафи артиш бо мутахассисони касбӣ таваҷҷўҳи беандоза зоҳир мекунанд. Зеро амнияти давлату миллат, ҳаёти осоиштаи ҷомеа ва пешрафти тамоми соҳаҳои иқтисодиву иҷтимоӣ, тартиботи ҳуқуқӣ, таъминоти волоияти қонун пеш аз ҳама ба тинҷиву оромӣ ва мустаҳкамии марзу буми кишвар вобаста аст. Дар Паёми навбатии хеш Пешвои миллат мўҳтарам Эмомалӣ Раҳмон дар ин хусус махсус таъкид доштанд, ки “...сохторҳои низомӣ ва мақомоти ҳифзи ҳуқуқ бояд вазифаи худро дар самти ҳимояи суботу оромии ҷомеа, амнияту осоиши давлат ва мардуми Тоҷикистон бо садоқат ба давлат ва халқи кишвар таъмин намоянд. Ҳукумати мамлакат вазифадор аст, ки ҷиҳати боз ҳам беҳтар гардонидани шароити кору зиндагии хизматчиёни ҳарбии Қувваҳои мусаллаҳ ва кормандони мақомоти ҳифзи ҳуқуқ тадбирҳои иловагӣ андешад. Мо шароити онҳоро сол аз сол беҳтар карда истодаем, лекин боз ҳам дар ин самт кор кунем, шароити дараҷаи олии хизмат, ҳам зиндагиро бояд муҳайё намоем ва ҳам мутахассисони сатҳи баланди касбии низомӣ омода намоем”.

Мақомоти иҷроияи ҳокимияти давлатии шаҳри Хуҷанд ва масъулини соҳа ин нуктаи муҳими дастури Пешвои миллатро вазифаи аввалиндараҷаи хеш медонанд. Ин аст, ки ҳамаи қисмҳои ҳарбии воқеъ дар шаҳри Хуҷанд бо таҷҳизот ва техникаи зарурӣ таъмин буда, сафи ихтиёриёне, ки бо ташаббуси худ ба коммисариатҳои ҳарбӣ омада, омодагии хешро барои адои қарзи фарзандӣ ифода мекунанд, зиёд гардида истодааст.

Дар қонуни асосии мо, Конститутсияи Ҷумҳурии Тоҷикис-тон низ омадааст, ки ҳифзи Ватан, ҳимояи манфиатҳои давлат, таҳкими Истиқлолият ва иқтидори мудофиавии он қарзи муқаддаси ҳар шаҳрванд аст. Хизмат дар сафи Қувваҳои мусаллаҳи мамлакат барои ҷавонон муҳимтарин мактаби обутоб ва шуҷоату диловарӣ мебошад. Маҳз дар ҳамин ҷо онҳо сабақи ҳаёту мардонагӣ, муҳофизат намудани Ватанро меомўзанд.

Халқи тоҷик дарк намудааст, ки имрўз Артиши миллӣ ва Қувваҳои мусаллаҳи Тоҷикистон қобилияти баланди ҳифзи марзу буми кишвари худро дорад ва зери ҳимояи он ҳаёти осоишта дорад.

Рўзи Артиши миллӣ ва Қувваҳои мусаллаҳи Ҷумҳурии Тоҷикистонро бори дигар ба ҳамаи Шумо, собиқадорон, хизматчиёни ҳарбии ҷузъу томҳо ва мақомоту сохторҳои ҳарбӣ, ҳамшаҳриёни азиз муборакбод мегўям. Бароятон саломатӣ, рўзгори обод ва дар иҷрои рисолату қарзи фарзандӣ – ҳифзу ҳимояи ин Ватани маҳбуб шуҷоату далерӣ, садоқату сарбаландӣ таманно мекунам.

Ид муборак, родмардони Ватан!