19 Февраль 2026
Недоступен ни однин перевод.
Дар Литсейи инноватсионии "Ҷавонӣ"и шаҳри Хуҷанд дар доираи ҳафтаи фаннии “Забони англисӣ” фестивали хайриявӣ таҳти унвони «Дастони меҳр» бо шукуҳу шаҳомати хоса баргузор гардид. Ҳадафи асосии чорабинӣ тарбияи ҳисси ҳамдигарфаҳмӣ, меҳрубонӣ ва дастгирии ниёзмандон дар миёни хонандагон буд.
Дар доираи фестивал хонандагони синфҳои 1–11 бо кӯмаки волидон навъҳои гуногуни шириниҳо ва маҳсулоти хонагӣ омода намуда, онҳоро ба маърази намоиш ва фурӯш гузоштанд. Меҳмонон, волидайн ва омӯзгорон бо хушнудӣ аз ин дастовардҳои хонандагон харидорӣ карданд. Маблағҳои ҷамъовардашуда ба корҳои хайриявӣ ва дастгирии ниёзмандон равона карда мешаванд.
Чорабинӣ ҳамчун қисми барномаи ҳафтаи фаннии “Забони англисӣ”, ки аз 17 то 24 феврал дар муассиса баргузор мегардад, ташкил карда шуд. Дар ин ҳафта як қатор озмунҳои ҷолиб, аз ҷумла “Spelling Bee”, “Беҳтарин нақшофарии ҳикояҳои англисӣ”, “Беҳтарин сарояндаи суруд бо забони англисӣ”, “Эссе” ва дигар мусобиқаҳо гузаронида мешаванд.
Ҳамзамон, дар доираи фестивал натиҷаҳои озмуни дохилимуассисавии «Луғатдони беҳтарин» ҷамъбаст гардида, 80 нафар хонандаи фаъолу беҳтарин бо диплом ва туҳфаҳои арзишманд қадршиносӣ шуданд.
Қобили зикр аст, ки дар муассиса барномаи такмили таълиму омӯзиши забонҳои русӣ ва англисӣ пайваста амалӣ мегардад. Ин иқдом дар партави ташаббусҳои Пешвои миллат оид ба рушди забономӯзӣ, баланд бардоштани сатҳи дониш ва омода намудани ҷавонони рақобатпазир дар арсаи байналмилалӣ роҳандозӣ шудааст.
Дар анҷом бояд таъкид намуд, ки Литсейи инноватсионии "Ҷавонӣ" дар шаҳри Хуҷанд омӯзишро бо забонҳои англисӣ ва русӣ ба роҳ монда, баҳри тарбияи шоистаи насли наврас пешсаф ба шумор меравад. Шогирдони ин боргоҳи илму маърифат пайваста дар олимпиадаҳои байналмилалӣ иштирок намуда, ба дастовардҳои назаррас ва ғолибиятҳо ноил мегарданд. Ҳамчунин муассиса бо беш аз 40 кишвари англисзабон шартномаҳои ҳамкорӣ дошта, робитаҳои таълимии байналмилалиро густариш медиҳад.
Дафтари матбуоти
Раиси шаҳри Хуҷанд
