31 Январ 2026
САДА ОЯД, КИ ТУРО МУЖДА ДИҲАД АЗ НАВРЎЗ…
Хуҷандиёни азиз, меҳмонони ин шаҳри хуршедӣ!
Соли равон давлати соҳибистиқлоли мо, ки сивупанҷсолагии онро тантана хоҳем кард, дар шинохти мероси маънавию таърихии халқи тоҷик корҳои бузургро ба иҷро расонд, ки дар саргаҳи он ҳама Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, мўҳтарам Эмомалӣ Раҳмон меистанд.
Дар қатори эҳёи ҷашнҳову идҳои мардумӣ, 6-уми декабри соли 2023 зимни иҷлосияи 18-уми Кумитаи байниҳукуматӣ оид ба ҳифзи мероси фарҳангии ғайримоддии ЮНЕСКО номинаи муштараки Ҷумҳурии Тоҷикистон ва Ҷумҳурии исломии Эрон «Ҷашни Сада» ба Феҳристи мероси ғайримоддии башарият ворид гардид. Тантанаи ин ҷашни бузург бори дигар аз он шаҳодат медиҳад, ки миллати тоҷик, мардуми ориёитабор таърихи хеле куҳан дорад. Дар Паёми навбатии Пешвои миллат мўҳтарам Эмомалӣ Раҳмон чунин нукта зикр гардид, ки “Мо вазифадорем, ки дар баробари ифтихор кардан аз мероси оламшумули аҷдоди худ онро соҳибӣ кунем, омўзем, идома диҳем ва барои наслҳои оянда ҳамчун ганҷинаи бебаҳои ҳувиятсоз ба мерос гузорем. Мо бояд ифтихор дошта бошем, ки аҷдоди хирадманди мо «пиндори нек, гуфтори нек ва кирдори нек»-ро ҳамчун арзиши бузурги инсондўстона шиори зиндагии худ қарор додаанд. Воқеан, Наврўз, ки имрўз мақоми байналмилалӣ гирифтаасту Меҳргон, Сада ва Тиргон таҷассумгари андешаҳои инсондўстӣ ва бузургдошти табиат мебошанд ва анъанаҳои давлатдории гузаштагони ориёии мо дар таърихи башарият нақши мондагору таъсиргузор бозидаанд, асоси ҳувият ва асолати мо – тоҷикон мебошанд”. Ҷашни аҷдоди ориёии мо – Сада бозтоби пайванди инсону табиат, ойинҳои вобаста ба корҳои кишоварзӣ, беҳтарин ғояҳои инсонӣ, моҳият ва мўҳтавои онҳо мебошад.
Аз ин рў, мувофиқи Қонуни Ҷумҳурии Тоҷикистон “Дар бораи рўзҳои ид” аз соли 2018 ҳамасола санаи 30 январ (яъне, даҳуми баҳманмоҳи тақвими хуршедӣ) ҷашни Сада ба таври расмӣ дар қаламрави мамлакат бо шукўҳу шаҳомати хоса таҷлил ме-гардад.
Дар Хуҷандшаҳри бостонӣ низ соли нўҳум аст, ки Сада ҳамчун ҷашни бузурги миллӣ, бо тамоми расму оини хос тантана мегардад ва мардум, хусусан, насли ҷавон бо таҷлили Сада худшиносӣ ва ватандўстии хешро собит менамояд.
Бо камоли ифтихор аз ватану ватандорӣ аз номи Мақомоти иҷроияи ҳокимияти давлатии шаҳри Хуҷанд ҳамаи сокинон ва меҳмонони гиромии шаҳрро ба муносибати ҷашни миллии Сада самимона табрику таҳният мегўям.
Ҷашни Сада рамзи гармиву нур, рамзи ғалабаи некӣ бар бадӣ, омодагии табиат ба табдили сардӣ ба гармӣ маҳсуб меёбад. Яъне, пас аз панҷоҳ шабу панҷоҳ рўз табиат мақоми бедорӣ, омодагиашро ба истиқболи фасли гармо дарак медиҳад.
Мо, мардуми сарбаланду заҳматкаши Хуҷандшаҳри бостонӣ дар соли ҷашнӣ бо баргузории иди миллии Сада, бо шукргузорӣ аз амну суботи кишвар ва осмони софу беғубори ватан, шаҳри азизу ҳамешаҷавонамонро боз ҳам ободу шукуфон, сарсабзу хуррам мегардонем ва дар иҷрои дастуру супоришҳои Президенти Ҷумҳурии Тоҷикистон мўҳтарам Эмомалӣ Раҳмон ва Раиси вилояти Суғд Раҷаб Аҳмадзода камари ҳиммат мебандем ва дар пешрафти ҳаёти иқтисодиву иҷтимоӣ меҳнат мекунем.
Сада ояд, ки туро мужда диҳад аз Наврўз!
Сада, пайки аввалини баҳор муборак, ҳамдиёрони азиз!
