17 Декабрь 2025
Недоступен ни однин перевод.
Тавре иттилоъ дода будем, муштзани ҷавони тоҷик, Хусравхон Раҳимови 23-сола дар XXIII-юмин Қаҳрамонии ҷаҳон оид ба бокс миёни мардон соҳиби медали нуқра шуд. Ин аввалин медали нуқра дар таърихи бокси Тоҷикистон дар мусобиқаҳои Қаҳрамонии ҷаҳон мебошад. Варзишгар бо чунин дастовард номи худро дар таърихи муштзании Тоҷикистон сабт кард.
Имрӯз Хусравхон Раҳимов бо сари баланд ба хонаи худ баргашт ва ин ҷавонмарди асили парчамбардорро намояндагони Мақомоти иҷроияи ҳокимияти давлатии вилояти Суғд ва шаҳри Хуҷанд, Федератсияи бокси вилоят, устодони варзиш, варзишгарон самимона истиқбол намуданд.
Ҷамшед Набизода, муовини Раиси шаҳри Хуҷанд ва Дилшод Давронзода, муовини сардори раёстаи кор бо ҷавонон ва варзиши вилояти Суғд, Фирӯз Азимҷонов, раиси Федератсияи бокси вилояти Суғд ноиби қаҳрамони бокси ҷаҳон Хусравхон Раҳимовро аз номи роҳбарияти вилоят ва шаҳри Хуҷанд самимона табрику таҳният намуданд.
Таъкид шуд, ки дар таърихи бокси Тоҷикистон аз Чемпионати ҷаҳон Абдусалом Ҳасанов (57 кг) соли 2003 дар Бангкок, Шералӣ Достиев (48 кг) соли 2005 дар Мянян, Анвар Юнусов (56 кг) соли 2011 дар Боку, Мавзуна Чориева (60 кг) соли 2012 дар Синхуандао ва Баҳодур Усмонов (63,5 кг) соли 2023 дар Тошканд ва Акмал Убайдов (60 кг) соли 2025 дар Дубай соҳиби медалҳои биринҷӣ шуда буданд. Хусравхон Раҳимов (57 кг) соли 2025 дар Дубай аввалин медали нуқраро барои Тоҷикистон дар Чемпионати ҷаҳон ба даст овард.
Ҷоиз ба зикр аст, ки мусобиқаи Қаҳрамонии ҷаҳон оид ба бокс миёни мардон аз 2-юм то 13 -уми декабр дар шаҳри Дубайи Аморати Муттаҳидаи Араб баргузор гардид. Аз Тоҷикистон дар ин мусобиқа 13 муштзан ширкат варзиданд ва аз ин шумора 2 медал ба даст омад. Акмал Убайдов дар вазни 60 кг медали биринҷӣ ва Хусравхон Раҳимов дар вазни 57 кг медали нуқра гирифтанд. Медали нуқраи Хусравхон Раҳимов аввалин дастоварди шоиста дар таърихи бокси тоҷик дар Чемпионати ҷаҳон мебошад.
Дар он Хусравхон Раҳимов дар вазни 57 кг дар даври аввал муқобили намояндаи Лесото Тока Литабе ба набард баромада, дар раунди дуюм пирӯз шуд. Рақиби дуюмаш аз Муғулистон буд, ки бо натиҷаи 4-3 бар ӯ ғолиб шуд. Баъдан Хусравхон ба марҳилаи чаҳорякниҳоӣ роҳ ёфта, бо намояндаи Африқои Ҷанубӣ, Сигвела Масибулеле нерӯ санҷид. Бо қарори якдилонаи доварон (5:0) пирӯзӣ ба даст овард ва роҳашро ба марҳилаи нимниҳоӣ ҳамвор сохт.
Хусравхон Раҳимов дар марҳилаи нимниҳоӣ бо ҳисоби 5:0 муштазни узбек Хуҷаназар Нортоҷиевро мағлуб сохта, ба финал роҳ ёфт. Ҳамин тариқ, Хусравхони 23-сола аввалин муштзани тоҷик шуд, ки ба финали Чемпионати ҷаҳон роҳ ёфт. Ҳамзамон, дар рӯзи ҳаштуми мусобиқа Акмал Убайдов аз Тоҷикистон ба гирифтани медали биринҷӣ шарафёб гардид.
Дар даври ниҳоӣ Хусравхон бо намояндаи Қазоқистон Оразбек Асилқулов ба майдони сабқат баромад ва бо қарори доварон (0:5) соҳиби ҷойи дуюм шуд.
Ба ин комёбӣ шарафёб шудани Хусравхон Раҳимов саҳми волидайн, устодон, аз ҷумламураббии шоистаи Тоҷикистон, Саидхоҷа Маъмуров беназир аст.
Дафтари матбуоти
Раиси шаҳри Хуҷанд
