Фирдавс Шарифзода роҳбари корпаратсияи чинӣ Хуан Ҷун Сиаро ба ҳузур пазируфт

Дар мулоқот ҷонибҳо аз густариши ҳамкории мутақобилан судманди Ҷумҳурии Тоҷикистон ва Ҷумҳурии мардумии Чин, ки натиҷаи сиёсати оқилонаи Сарони давлатҳо муҳтарам Эмомалӣ Раҳмон ва муҳтарам Си Ҷинпин аст, изҳори қаноатмандӣ намуданд. Раиси шаҳри Хуҷанд Фирдавс Шарифзода доир ба таърих, вазъи иқтисодии иҷтимоии шаҳр, рушди бемайлони соҳаҳои гуногун ва захираву имкониятҳои мавҷуда маълумот дода, ҷиҳати тақвиятбахшии ҳамкорӣ бо ширкатҳои истеҳсолии чинӣ изҳори омодагӣ кард. Таъкид карда шуд, ки шаҳри Хуҷанд бо кишварҳои гуногуни олам ҳамкорӣ дошта, алҳол дар шаҳри Хуҷанд беш аз 300 корхонаи саноатӣ фаъолият дорад. роҳбари корпаратсияи Сишиан Чунхай Крос Култура Эксчени Ҷумҳурии мардумии Чин Хуан Ҷун Сиа ба шаҳрдор барои қабули расмӣ изҳори миннатдорӣ намуда, иттилоъ дод, ки корпаратсия дар баробари соҳаҳои фарҳанг, маориф ва соҳибкории хурду миёну, азм дорад, ки дар бахшҳои мухталифи хоҷагии халқи шаҳр ҳамкориро ба роҳ монда, сармоягузориро роҳандозӣ кунад. Дар ин замина зарфияту таҷрибаи кофӣ дар самти сохтмон, энергияи сабз, саноат, хизматрасонӣ ва ғайраҳоро доранд. Мулоқоти ҷонибҳо бо баррасии нақшаи ҳамкорӣ ба анҷом расид. Бояд қайд намуд, ки роҳбари корпаратсияи Сишиан Чунхай Крос Култура Эксчени Ҷумҳурии мардумии Чин Хуан Ҷун Сиа дар доираи сафари худ имрӯз аз иншооти гуногуни иҷтимоию иқтисодӣ ва фарҳангию сайёҳии шаҳри Хуҷанд боздид ба амал меорад.