ҶАЛАСАИ ШӮРОИ ҲАМОҲАНГСОЗИИ МАҚОМОТИ ҲИФЗИ ҲУҚУҚИ ШАҲРИ ХУҶАНД БАРГУЗОР ГАРДИД

Раиси Шӯрои ҳамоҳангсозии мақомоти ҳифзи ҳуқуқи шаҳр, прокурори шаҳри Хуҷанд, мушовири адлияи дараҷаи якум Бахтиёр Нозимзода ҷаласаро ҳусни оғоз намуда, иттилоъ дод, ки дар ҷаласа, аъзои Шӯро, муовини Раиси шаҳри Хуҷанд, роҳбарони сохторҳои дахлдори Мақомоти иҷроияи ҳокимияти давлатии шаҳр, нозироти андоз, раисони кумитаи маҳаллаҳо, нозирони минтақавӣ, роҳбарони муассисаҳои таълимӣ, хадамоти муҳоҷират ва шуғли аҳолӣ ва дигар шахсони масъул ҳузур доранд.

Раиси Шӯро Бахтиёр Нозимзода зикр дошт, ки дар ҷаласа ҳолати содиршавии ҷиноятҳо оид ба муқобили озодии ҷинсӣ ва дахлнопазирии ҷинсӣ дар давраи солҳои 2023-2024 ва 9 моҳи соли равон ва таҷрибаи судии ин қабил ҷиноятҳо мавриди таҳлил ва баррасӣ қарор дода мешавад.

Таъкид шуд, ки ҳолати содиршавии ҷиноятҳо оид ба муқобили озодии ҷинсӣ ва дахлнопазирии ҷинсӣ, бахусус нисбати кӯдакон ва ноболиғон боиси нигаронӣ буда, аҳли ҷомеаро ба ташвиш овардааст.

Бархе аз ин ҷиноятҳо аз ҷониби ҷинояткорон берун аз кишвар содир гардидааст, ки боиси паст шудани нуфузи давлату миллат мегардад.

Сипас, оид ба масъалаи мазкур ёрдамчии калони прокурори шаҳри Хуҷанд, мушовири адлияи дараҷаи 3 Парвиз Назарзода баромад намуд.

Иттилоъ дода шуд, ки мутаассифона дар ин давра содир намудани ҷиноятҳо ба муқобили озодии ҷинсӣ ва дахлнопазирии ҷинсӣ тамоюли болоравӣ дошта, бахусус ҷиноятҳои нанговар, аз қабили таҷовуз ба номус, ҳаракати зӯроварии дорои хусусияти шаҳвонӣ, маҷбур намудан ба ҳаракати дорои хусусияти шаҳвонӣ, алоқаи ҷинсӣ ва дигар ҳаракати дорои хусусияти шаҳвонӣ ба шахсе, ки ҳанӯз ба синни шонздаҳсолагӣ нарасида, ҳаракати бадахлоқона бо истифода аз ҳиссиёт ва боварии динӣ ё савдои одамон бештар ҷой дошта, аз паст будани маърифати ҳуқуқии шаҳрвандон ва нокифоя будани фаъолияти мақомоти дахлдор дар ин самт шаҳодат медиҳад.

Таҳлилҳо собит намуданд, ки яке аз сабабҳои асосии содир намудани ин қабил ҷиноятҳо бо истифода аз оҷизии кӯдакон, бидуни нигоҳубин мондани онҳо, паст будани маърифати ҳуқуқии баъзе шаҳрвандон бахусус занҳо ва ҷавонону наврасон, номуназзамии раванди муҳоҷирати меҳнатии шаҳрвандон, носолимии оила, зудбоварӣ, бо роҳи фиреб дар кишварҳои хориҷӣ мавриди истисмори шаҳвонӣ қарор гирифтани занҳо, ба таври дахлдор ба роҳ монда нашудани фаъолияти шахсони масъули мақомоти алоҳида ва дигар сабабҳо мебошад.

Ёрдамчии калони прокурори шаҳри Хуҷанд Парвиз Назарзода дар баромади худ чанд мисол аз парвандаҳои ҷиноятӣ овард.

Сипас дар ҷараёни кори Шӯро масъулини шуъбаҳои ҳифзи тартиботи ҷамъиятӣ ва тафтишотии мақомоти милитсия, шуъбаҳои маориф, кор бо занон ва оилаи шаҳр, Хадамоти муҳоҷират баромад намуда, доир ба масъалаи матраҳшуда ҳисобот доданд.

Муовини Раиси шаҳри Хуҷанд Муяссара Қаҳҳорӣ низ маърӯза карда, андешаҳои хешро доир ба пешгирии ҳолати содиршавии ҷиноятҳо оид ба муқобили озодии ҷинсӣ ва дахлнопазирии ҷинсӣ баён дошт.

Аъзои Шӯро дар баррасии мавзуъ фаъолона иштирок намуда, ҷиҳати баланд бардоштани маърифати ҳуқуқии шаҳрвандон, ташкили мулоқоту суҳбатҳои инфиродӣ бо ашхоси осебпазири ҷомеа, ҷалби равоншиносон ба масоили доғи ҷомеа ва ғайраҳо андешаронӣ намуданд.

Раиси Шӯро Бахтиёр Нозимзода ба масъулини дахлдор ҷиҳати тақвияти корҳои фаҳмондадиҳӣ, пешгирии ҷинояткорӣ, қонуншиканӣ, ҳифзи ҳаёт, саломатӣ, қадр, номус ва дигар ҳуқуқҳои фитрии инсон, ки дахлнопазир мебошанд, ба таври қатъӣ дастурҳо дод, то он доимо эътироф, риоя ва ҳифз карда шавад.

Зикр шуд, ки мақомоти ҳифзи ҳуқуқ ӯҳдадоранд, ки барои ҳуқуқи инсонро ба таври воқеӣ арзиши олӣ шудан, тамоми чораҳоро андешанд. Дар иртибот ба ин, ҳар шахсе, ки ба шахсияти инсон таҷовуз мекунад, аз рўйи принсипи ногузирии ҷавобгарӣ бояд таҳти ҷазо қарор гирад ва ё нисбат ба ў чораҳои дигари дорои хусусияти ҳуқуқии ҷиноятӣ татбиқ гардад.

Таъкид шуд, ки ҷиноятҳо ба муқобили озодии ҷинсӣ ва дахлнопазирии ҷинсӣ яке аз ҷиноятҳое мебошанд, ки пеш аз ҳама бо хусусият ва дараҷаи хавфи баланди барои ҷамъият доштаашон аз дигар ҷиноятҳо фарқ мекунанд, зеро, онҳо дар баробари бевосита расонидани зарар ба озодии ҷинсӣ ва ё дахлнопазирии ҷинсии ҷабрдида, инчунин метавонад ба рушди муътадили ҷисмонию рўҳии ҷабрдида таъсири манфӣ расонида, вайроншавии оилаҳоро ба миён оварда, ба наслгузории ҷабрдида доғ гузошта, сатҳи ахлоқи ҷамъиятро паст намояд.

Бо вазифагузориҳои мушаххас ба кори Шӯро ҳусни анҷом бахшида шуд.