22 Сентябрь 2025
Недоступен ни однин перевод.
Дар маҷлисгоҳи меҳмонхонаи “Суғдиён”-и шаҳри Хуҷанд мулоқоти Раиси вилояти Суғд, Раиси Федератсияи футболи вилоят Раҷаб Аҳмадзода бо ҳайати клуби футболи “Хуҷанд” баргузор гардид.
Дар оғоз Раиси вилоят аз дастгириву таваҷҷуҳи рӯзафзуни роҳбарияти олии мамлакат ва Президенти Федератсияи футболи Тоҷикистон муҳтарам Рустами Эмомалӣ ба рушди футбол ёдовар гардид. Таъкид карда шуд, ки футбол яке аз намудҳои маъмули варзиш дар кишвар маҳсуб ёфта, бо таваҷҷуҳи пайвастаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва дастгирии Федератсияи футболи Тоҷикистон сол ба сол рушд ёфта истодааст.
Раҷаб Аҳмадзода изҳор дошт, ки дар вилояти Суғд бо мақсади рушди футбол инфрасохтори зарурӣ муҳайё буда, дастаҳои футболи вилоят дар чемпионатҳои сатҳи гуногун иштирок доранд. Айни замон, се даста аз вилояти Суғд дар лигаи олӣ ҳунарнамоӣ доранд, ки ин нишондиҳандаи рушди футбол дар вилоят мебошад.
Зимни баррасии вазъи кунунӣ Раиси вилоят таъкид намуд, ки фаъолияти дастаи “Хуҷанд” бояд бознигарӣ шавад. – “Имконияти дастаи ‘Хуҷанд’ васеъ аст ва роҳбарият, мураббиён ва бозингарон бояд тамоми неруи худро барои ба даст овардани натиҷаҳои баланд равона созанд,” – илова кард Раҷаб Аҳмадзода.
Раиси вилоят таъкид намуд, ки масъулин бояд ба рушди футбол ва оммавияти он, ҷалби ҳарчи бештари наврасону ҷавонон ба футбол, тарбияи футболбозони касбӣ, ҳунарнамоии арзандаи даста дар мусобиқоти сатҳи олӣ таваҷҷуҳи махсус зоҳир намоянд.
Раҷаб Аҳмадзода ба роҳбарияти клуб ва мураббиён дастур дод, ки машқу тамринҳо мунтазам ва бо сифати баланд гузаронида шуда, барои бозиҳои оянда омодагии ҷиддӣ дида шавад.
Раиси вилоят ҳамзамон зарурати ҷалби истеъдодҳои нав ва баланд бардоштани сатҳи касбии бозингаронро зикр намуда, афзуд, ки “Хуҷанд” ҳамчун яке аз дастаҳои маъруфи кишвар бояд мавқеи сазовори худро дар лигаи олӣ барқарор намояд.
Ҳайати даста изҳор дошт, ки барои амалӣ намудани дастуру супоришҳои роҳбарият ва ба натиҷаҳои назаррас ноил шудан аз тамоми имкониятҳо истифода мебарад.
