21 Май 2025
Раиси вилояти Суғд Раҷаббой Аҳмадзода ва Раиси шаҳри Хуҷанд Фирдавс Шарифзода ба дидорбинии собиқадори хизмати давлатӣ, Исрофил Бобомаликов, ки ба синни мубораки 90 расидааст, рафта, бо ин марди хирад сӯҳбати самимӣ анҷом доданд.
Роҳбари вилоят Зимни мулоқоти самимӣ аз саҳми арзандаи бисёрсолаи собиқадори меҳнат Исрофил Бобомаликов дар рушди соҳаи ҳифзи иҷтимоии вилоят, тарбияи кадрҳои ҷавон ва ободии сарзамини аҷдодӣ ёдовар шуд.
Раиси вилоят зикр намуд, ки собиқадорони хизмати давлатӣ ва меҳнаткашоне, ки солҳои тӯлонӣ бо садоқат ба халқу Ватан хизмат кардаанд, ҳамеша зери таваҷҷуҳи роҳбарияти олии мамлакат, хусусан Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор доранд.
Бояд қайд намуд, ки Исрофил Бобомаликов 20 майи соли 1935 таваллуд шуда, имрӯз ба синни мубораки 90 расидааст. Ӯ дар давраи фаъолияти худ аз соли 1971 то соли 1995 ҳамчун мудири шуъбаи таъминоти иҷтимоии вилоят фаъолият намуда, саҳми арзандаи худро дар рушди соҳа гузоштааст.
Исрофил Бобомаликов то ҳол дар хизмати халқу диёр қарор дошта, ҳамчун раиси бинои баландошёнаи маҳалли зисташ фаъолият мебарад. Ӯ дар тарбияи насли наврас ва дар рӯҳияи ватандӯстӣ тарбия намудани насли наврасу ҷавон саҳми назаррас дорад ва пайваста барои ободии маҳалла ва таҳкими дӯстиву ҳамдигарфаҳмӣ миёни сокинон талош меварзад.
Раҷаббой Аҳмадзода зимни мулоқот ба Исрофил Бобомаликов аз номи Пешвои миллат туҳфаҳои пулию моддӣ тақдим намуд.
Дар навбати худ, дорандаи ордени «Нишони фахрӣ», медалҳои «Барои меҳнати Шуҷоат» ба муносибати ҷашни 100 солагии В.И.Ленин, «Собиқадори меҳнат», унвони «Корманди шоистаи Ҷумҳурии Тоҷикистон, ду Грамотаи фахрии Президиуми Шўроии Олии Тоҷикистон, грамотаи фахрии кумитаи марказии ҳизби комунисти Тоҷикистон», «Аълочии Вазорати ҳифзи иҷтимоии Тоҷикистон» Исрофил Бобомаликов барои чунин қадрдонӣ ва ғамхориҳои пайваста ба Пешвои миллат муҳтарам Эмомалӣ Раҳмон изҳори сипосу миннатдорӣ баён кард.
Дафтари матбуоти
Раиси шаҳри Хуҷанд
