20 Май 2025
Имрӯз Раиси шаҳри Хуҷанд Фирдавс Шарифзода бо сокинон ва фаъолони маҳаллаҳои «Тиллокон” ва «Темурмалик» мулоқот анҷом дод.
Фирдавс Шарифзода, Раиси шаҳри Хуҷанд ҳадафи мулоқотро баррасии масъалаҳои натиҷаҳои рушди иҷтимоию иқтисодии шаҳр, дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз 25 апрели соли 2025 барқияи ҳукуматӣ аз 28 апрели соли 2025, №24/2-37 ва қарори Раиси вилояти Суғд аз 29 апрели соли 2025, №118 «Дар бораи таъсис додани гурўҳӣ кории вилоятӣ» ва бо мақсади ба роҳ мондани корҳои фаҳмондадиҳӣ оид ба таъмини иҷрои талаботи моддаи 2531 Кодекси ҷиноятии Ҷумҳурии Тоҷикистон ва моддаи 382 Кодекси ҳуқуқвайронкунии маъмурии Ҷумҳурии Тоҷикистон ва корҳои амалишуда истода дар самти пешгирии шомилшавии сокинон ба экстремизм ва терроризм ва ғайраҳо унвон намуд.
Шаҳрдор иттилоъ дод, ки тақвияти нишондиҳандаҳои соҳаҳои хоҷагии халқ имкон дод, ки дар се моҳи соли ҷорӣ нақшаи буҷети шаҳр пурраю барзиёд таъмин гардад.
Дар натиҷаи андешидани чораҳои таъхирнопазир нақшаи буҷети умумии шаҳр ба андозаи 105,5 фоиз ё 228,4 миллион сомонӣ таъмин гардидааст.
Ба буҷети маҳаллии шаҳр бошад, 96,1 миллион сомонӣ андозу пардохтҳо ворид гардидааст, ки он дар муқоиса бо нақшаи пешбинигардида ба маблағи 2,6 миллион сомонӣ ё 2,8 дар сад зиёд мебошад.
Қисми хароҷоти буҷети шаҳр 100 фоиз таъмин гардида, дар ин давра барои пардохти музди меҳнат ва маблағҷудокуниҳо барои эҳтиёҷоти иҷтимоӣ 59 млн. 864,3 ҳазор сомонӣ маблағҳои буҷетӣ масраф гардиданд, ки ин 81,3 фоизи хароҷоти умумии буҷети маҳаллиро ташкил намуда, аз ин ҳисоб қарздорӣ ва ё қафомонии пардохти музди меҳнат ҷой надорад.
Боиси зикр аст, ки мутобиқи Амри Президенти Ҷумҳурии Тоҷикистон аз 6 майи соли 2022, №АП-188 бо мақсади омодагии ҳамаҷониба ба ҷашни 35-солагии Истиқлоли давлатии Ҷумҳурии Тоҷикистон бо амри Раиси шаҳр аз 20 июни соли 2022, №77 аз ҳисоби роҳбарони ташкилоту идораҳо ва воҳидҳои сохтории мақомоти иҷроияи ҳокимияти давлатии шаҳр гурўҳи корӣ таъсис дода шуда, нақшаи чорабиниҳои шаҳрӣ оид ба корҳои ободонию бунёдкорӣ ба муносибати 35-солагии Истиқлоли давлатии Ҷумҳурии Тоҷикистон тасдиқ карда шуд.
Мувофиқи нақша чорабинии зикрёфта сохтмон, азнавсозӣ ва таъмиру таҷдиди 950 иншооти ҳаётан муҳими ба нақша гирифта шуда, то имрўз 788 адади онҳо бунёд карда шудааст, ки он нисбат ба нақшаи умумии пешбинишуда 83,0 фоизро ташкил медиҳад. Аз миқдори умумии иншооти бунёдшуда, 63 адади он ба соли ҷорӣ рост омада, аз онҳо 17 иншоот дар соҳаи саноат, 1 иншоот дар соҳаи тандурустӣ, 3 иншоот ба дар соҳаи варзиш, 19 иншоот дар соҳаи савдою хизматрасонӣ, 23 бинои истиқоматӣ бунёд, таъмиру таҷдид ва азнавсозӣ карда шуда, мавриди истифода қарор дода шуданд.
Фирдавс Шарифзода дар баробари дастовардҳои ноил гардида, ҳамчунин таваҷҷуҳи масъулинро ба масъалаҳои ҳалталаби соҳаҳои алоҳида ҷалб намуда, аз ҳамагон даъват ба амал овард, ки баҳри рафъи он камари ҳиммат басда, дар якҷоягӣ Ватани маҳбубамон ободу хуррам намоем.
Сипас ёрдамчии прокурори шаҳри Хуҷанд, Манучеҳр Ҳурматзода доир ба Қонунҳои Ҷумҳурии Тоҷикистон «Дар бораи ворид намудани тағиру иловаҳо ба Кодекси ҳуқуқвайронкунии маъмурии Ҷумҳурии Тоҷикистон» ва «Дар бораи ворид намудани тағиру иловаҳо ба Кодекси ҷиноятии Ҷумҳурии Тоҷикистон» дар соҳаи қонунгузорӣ вобаста ба энергетика маълумот дода, аз ҷумла афзуд, ки дар Ҷумҳурии Тоҷикистон, ки рушди соҳаи энергетика ҳадафи стратегии давлатӣ эълон шудааст, иҷрои дастуру супоришҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти таҳкими қонунияти соҳа ва таъмини истифодаи самараноки захираҳои энергетикӣ аҳамияти вижа дорад.
Дар ин замина, тарғибу ташвиқи Қонунҳои Ҷумҳурии Тоҷикистон «Дар бораи ворид намудани тағиру иловаҳо ба Кодекси ҳуқуқвайронкунии маъмурии Ҷумҳурии Тоҷикистон» ва «Дар бораи ворид намудани тағиру иловаҳо ба Кодекси ҷиноятии Ҷумҳурии Тоҷикистон» дар соҳаи қонунгузории энергетикӣ амри зарурӣ ба ҳисоб меравад. Ворид намудани тағйиру иловаҳо ба кодексҳои ҷиноятӣ ва ҳуқуқвайронкунии маъмурӣ, ки ҷавобгарии шаҳрвандонро барои қонуншиканиҳо дар соҳаи энергетика муайян менамоянд, як қадами муҳим дар самти мубориза бо дуздӣи барқ, исрофкорӣ ва истифодаи ғайриқонунии захираҳои энергетикӣ мебошад. Ин тадбирҳо барои таъмини интизоми ҳуқуқӣ, ҳифзи манфиатҳои давлат ва шаҳрвандон, инчунин барои ҷалби сармоягузорӣ ба соҳаи энергетика равона шудаанд.
Муовини сардори шуъбаи шаҳрии дар шаҳри Хуҷанд будаи Раёсати Кумитаи давлатии амнияти миллии Ҷумҳурии Тоҷикистон дар вилояти Суғд, Олимҷон Сабуров дар баромади худ оид ба гаравидани наврасону ҷавонон ба ҳизбу ҳаракати экстремистию террористӣ, пешгирии фарҳанги бегона, ҷинояткорӣ ва ғайраҳо андешаронӣ намуда, аз ҷумла зикр намуд, ки аз замонҳои қадим то ба имрӯз новобаста ба пешрафти ҷомеа, тараққиёти илм ва техникаву технологияи нав инсонҳои пайдо мешаванд, ки ба тақлидкорию хурофот бовар доранд. Аслан сарчашмаи хурофот ва хурофотпарастӣ бештар аз фаҳмиши нодурусти як гурӯҳи одамон, аз паст будани сатҳи маърифати онҳо вобастагӣ дошта, бо ҳар роҳу васила мехоҳанд ба пешрафти ҷомеа халал ворид намоянд.
Барои наҷот аз ин омили номатлуб бештар омӯхтани илму маърифат ва донистани забонҳои дигар, инчунин омӯзонидани андешаи солим барои ҳамаи табақаҳои ҷомеа, хосатан насли ҷавон хеле муҳим мебошад.
Пешвои миллат, Президенти Ҷумҳури Тоҷикистон муҳтарам Эмомалӣ Раҳмон ҳамеша таъкид мекунанд, ки омӯхтани илму дониш ва дар ин замина баланд бардоштани сатҳи маърифатнокии ҷомеа, омӯхтани техника ва технологияи нав, донистани забонҳои хориҷӣ метавонад барои аз байн рафтани хурофот ва хурофотпарастӣ мусоидат кунад. Аз ин хотир бо иқдомҳои дурбинонаи Пешвои миллат роҳандозӣ гардидани якчанд озмунҳои ҷумҳуриявӣ барои бештар ҷалб гардидани сокинони синну соли гуногун, хосатан ҷавонон имкониятҳои васеъро фароҳам овард. Ҳамсола ҳазорҳо нафар дар озмунҳо иштирок намуда, сатҳи дониш ва касбияти худро баланд мебардоранд.
Агар ба таърихи башарият назар андозем аксаран дар ҷомеаҳои гуногун нафароне ё табақаҳои буданд, ки идораи иҷтимоӣ дар дасташон буд, онҳо ҳамеша кӯшиш мекарданд, худро дар назди мардуми оддӣ бартар ва болотар нишон дода, аз нодонии мардум истифода мебурдан ва манфиатҳои худро амалӣ месохтанд.
Ҳамин ҳолат боиси он мегардад, ки гурӯҳҳои манфиатҷӯие, ки аз бовариҳои мардум сӯистифода намуда, худро донандаи асрори вуҷуд муаррифӣ менамуданд, барои табақаҳои ҳоким ба ҳайси як пуштибон зуҳур кунанд. Онҳо бо таблиғҳои ғайри илмӣ ва ғайри воқеии хеш дар зеҳни мардум аз нафароне, ки идораи сиёсию иҷтимоӣ дар дасташон ҳаст, як навъ шахсиятҳои ғайритабиӣ муҷизаосо ва осмониро нишон медоданд.
Дар ҷараёни мулоқот сокинони маҳаллаҳои “Тиллокон” ва “Темурмалик” доир ба мушкилоти хеш, муаммоҳо, пешниҳодот оид ба ободонии маҳалли зист ва ҳамчунин вобаста ба масоили матраҳгардида фикру андешаҳои хешро баён доштанд.
Дафтари матбуоти
Раиси шаҳри Хуҷанд
