13 Май 2025
Имрӯз Фирдавс Шарифзода, Раиси шаҳри Хуҷанд бо сокинон ва фаъолони маҳаллаҳои “Раззоқ”, “Масчиди савр” ва “Қорираҳмат Қурбонов” мулоқот намуд.
Шаҳрдор мулоқотро оғоз намуда, иттилоъ дод, ки Мақомоти иҷроияи ҳокимияти давлатии шаҳри Хуҷанд бо саҳми тамоми сокинони шаҳр, баҳри дар амал татбиқ намудани сиёсати хирадмандонаи Пешвои муаззами миллат, мўҳтарам Эмомалӣ Раҳмон, бо мақсади иҷрои босифату саривақтии Амру Фармонҳо ва инчунин дастуру ҳидоятҳое, ки аз Паёмҳояшон ба Маҷлиси Олии Ҷумҳурии Тоҷикистон бармеояд ва нишондодҳои Раиси вилояти Суғд Раҷаббой Аҳмадзода як силсила корҳои назарраси созандагиро роҳандозӣ намуда истодааст.
Дар ин давра аз ҷониби 110 адад корхонаҳои хурду калон ба маблағи зиёда аз 1,1 миллиард сомонӣ маҳсулотҳои воридотивазкунанда истеҳсол гардид, ки он нисбат ба ҳамин давраи соли сипаригашта 105,4 млн. сомонӣ зиёд шудааст.
Дар раванди рушду инкишофи ин соҳа дар соли сипаригашта ва семоҳаи аввали соли ҷорӣ бо ҷалби зиёда аз 44,0 миллион сомонӣ сармояҳо 61 адад корхонаҳои нави истеҳсолии хурд таъсис дода шуда, ҳамзамон 1031 ҷойҳои нави корӣ зиёд шудааст.
Раиси шаҳри Хуҷанд доир ба пешвози арзандаи ҷашни 35-солагии Истиқлоли давлатии Ҷумҳурии Тоҷикистон дар ҳудуди шаҳри Хуҷанд иттилоъ дода, афзуд, ки дар панҷ соли охир сохтмон, азнавсозӣ ва таъмиру таҷдиди 950 иншооти ҳаётан муҳим ба нақша гирифта шуда, танҳо дар семоҳаи якуми соли 2025-ум 63 адади онҳо бунёд карда шудааст.
Раиси шаҳри Хуҷанд Фирдавс Шарифзода дар баробари дастовардҳои ноил гардида, ҳамчунин таваҷҷуҳи масъулинро ба масъалаҳои ҳалталаби соҳаҳои алоҳида ҷалб намуда, аз ҳамагон даъват ба амал овард, ки баҳри рафъи он камари ҳиммат басда, дар якҷоягӣ Ватани маҳбубамонро ободу хуррам намоем.
Сипас муовини прокурори шаҳри Хуҷанд Толиб Ҳоҷиев баромад намуда, аз ҷумла афзуд, ки тайи солҳои соҳибистиқлолӣ Ҳукумати кишвар барои зиёд кардани иқтидори истеҳсоли неруи барқ, мустаҳкам сохтани инфрасохтори низоми энергетикӣ, сарфаҷӯйӣ ва истифодаи самараноки неруи барқ 36 лоиҳаи сармоягузории давлатиро ба маблағи 89 миллиард сомонӣ амалӣ намуд. Аз ҷумла, дар самти паст намудани талафоти неруи барқ 3 лоиҳа ба маблағи умумии 1,1 миллиард сомонӣ амалӣ гардида, татбиқи боз 3 лоиҳаи дигар ба маблағи 2,9 миллиард сомонӣ идома дорад.
Танзими ҳуқуқии соҳаи энергетика ҳамчун воситаи асосии ба низом даровардани муносибатҳои байни ширкатҳои таъминкунандаи барқ ва истеъмолкунандагон хизмат мекунад. Бе мавҷудияти қонунгузории возеҳ ва ҷорӣ намудани ҷавобгарии ҳуқуқӣ, мубориза бо қонуншиканиҳо, мисли истифодаи худсарона, дуздӣ ва исрофи нерӯи барқ душвор мегардад. Дар шароити рушди босуръати иқтисоди миллӣ, истифодаи оқилонаи нерӯи барқ ва ҳифзи манфиатҳои шабакаҳои барқӣ, давлат ва аҳолӣ танҳо тавассути танзими мукаммали ҳуқуқӣ имконпазир аст.
Муовини сардори шуъбаи шаҳрии дар шаҳри Хуҷанд будаи Раёсати Кумитаи давлатии амнияти миллии Ҷумҳурии Тоҷикистон дар вилояти Суғд, Олимҷон Сабуров дар баромади худ оид ба гаравидани наврасону ҷавонон ба ҳизбу ҳаракати экстремистию террористӣ, пешгирии фарҳанги бегона, ҷинояткорӣ ва ғайраҳо андешаронӣ намуда, аз ҷумла афзуд, ки зуҳуроти ташвишоваре, ки имрӯз як идда ҷавонони зудбовару гумроҳро фаро гирифтаву сӯи зулмот ва бераҳмиву ҷаҳолат мебарад, ин бо ҳар роҳу усул шомилшавӣ ба ҳизбу созмонҳои хусусияти экстремистидошта, гурӯҳҳои ҷангҷӯю тундрав мебошанд, ки имрӯз мусибати гаронеро ба сари мардум оварда, оромиву суботи ҷомеаро халалдор месозанд.
Доман задани таассуби динӣ дар мамолики исломӣ дар баробари ифротгароӣ ва терроризм аз он дарак медиҳад, ки дин сарчашмаи ғоявии пурқудрати барои расидан ба ҳаргуна ҳадаф мебошад. Яке аз омилҳои пайдоиши ба истилоҳ «терроризми исломӣ», ки маргталабон анҷом медиҳанд, таассуби динӣ мебошад. Бояд таъкид намоем, ки ифротгароӣ, тундгароӣ ва терроризм аз таассуби динӣ сарчашма мегирад.
Дар ҷараёни мулоқот сокинони маҳаллаҳои “Раззоқ”, “Масчиди савр” ва “Қорираҳмат Қурбонов” доир ба мушкилоти ҷойдошта, корҳои ободонию созандагӣ ва масоили матраҳгардида фикру андешаҳои хешро баён дошта, аз ҳозирин даъват ба амал оварданд, ки дар ободонии маҳалли зист бетараф набошем.
Мо ҳамагон боядба қадри заҳмати сангини роҳрӯбон ва тозакорон расем, зеро тозагиву озодагӣ вақте муяссар мегардад, ки дигарон онро риоя намоянд, нагузоранд, ки сабзазору дарахтони бо заҳмати зиёд парваришёфта поймолу шикаста гарданд.Нафаре партови худро ба роҳ партояд.
Сокини шаҳри Хуҷанд-маркази маъмурии вилояти Суғд будан ифтихори бузург аст. Сокинони мо низ кӯшиш намоянд, ки ба ин ифтихору шарафмандӣ сазовор бошанд. Фаромӯш насозем, ки тозагии шаҳри мо аз тозагии кӯчаву маҳалли зисти ҳар яки мо сар мешавад.
Дафтари матбуоти
Раиси шаҳри Хуҷанд
