13 Май 2025
Дар тарабхонаи “Яккасарой”-и шаҳри Хуҷанд чорабинии идона бахшида ба Рўзи байналмилалии оила бо 20 ҷуфт оилаҳои барўманд ва намунавӣ аз маҳаллаҳои шаҳр Рӯзи оила таҷлил карда шуд.
Номаи табрикотии Раиси шаҳри Хуҷанд Фирдавс Шарифзода бахшида ба Рӯзи оила аз ҷониби муовини Раиси шаҳр Муяссара Қаҳҳорӣ ба самъи ҳозирин расонида шуд, ки дар он аз ҷумла зикр шудааст: “Оила бақои давлат ва ҷамъият буда, зерсутун ва пойдевори тарбияи насли наврас маҳз аз оила сарчашма мегирад. Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон дар яке аз суханрониҳояшон баён доштанд, ки «Давлат дар доираи талаботи Конститутсия ҳифзи иҷтимоии аҳолӣ, аз ҷумла ҳимояи оила, ҳифзи кӯдакони ятиму маъюб ва таҳсилу табобати шаҳрвандонро кафолат дода, оиларо ҳамчун асоси ҷамъият ҳимоя мекунад».
Зиндагии инсон маҳз дар оила оғоз меёбад, маҳз дар оила муҳаббат, эҳтиром, хурсандӣ ва меҳрубониро меомӯзад. Дар оила ҳамчунин муошират кардан ва бо ҷаҳони берун шинос шудан ёд дода мешаваду шинохти анъанаҳо ва аз насл ба насл мерос гузоштани онҳо низ аз оила маншаъ мегирад. Аз ин рӯ, оила дар фарҳанги мардуми куҳанбунёди тоҷик ҳамчун ниҳоди муқаддас эътироф шудааст”.
Сипас ба 5 ҷуфт оилаҳое, ки дар ин рўз соҳиби фарзанд гардидаанд шаҳодатномаи таваллуд ва тўҳфаҳои хотиравӣ барои навзодон супорида шуд.
Ҳамчунин ба 20 оилаҳое, ки ҳамзистии 15, 30, 35, 45, 50, 55 сола доштанд, Меҳрнома ва туҳфаҳои хотиравии Раиси шаҳрро супорида шуд.
Шаҳрванди фахрии шаҳри Хуҷанд Биҳоҷал Раҳимова баромад намуда ҳамаи оилаҳоро бо Рӯзи оила табрику таҳният намуда барои пешгирии вайроншавии оилаҳои ҷавон, таълиму тарбияи кўдакон, фарҳанги либоспўшӣ изҳори андеша намуданд.
Оилаҳое, ки ҳамзистии 15, 30, 35, 45, 50, 55 доштанд бо меҳру муҳаббати самимӣ аз роҳи тайкардаи худ барои ҷавонон маълумот доданд.
Барномаи бошукўҳи устодони санъат табъи идонаи иштирокчиёнро болида намуд.
Дафтари матбуоти
Раиси шаҳри Хуҷанд
