07 Май 2025
Недоступен ни однин перевод.
Раиси шаҳри Хуҷанд Фирдавс Шарифзода бо мақсади огоҳӣ аз вазъи таъминкунии оби нӯшокӣ ва иншооти сохташаванда доир ба дастрасии аҳолии маҳаллаҳои навбунёд ба оби нӯшокӣ аз раванди сохтмон ва тадбирҳои амалишаванда дар ҳудуди шаҳр ошноӣ пайдо намуд.
Аз ҷониби Маъмурияти корхонаҳои сохташудаистодаи мақомоти иҷроияи ҳокимияти давлатии шаҳри Хуҷанд ба шаҳрдор иттилоъ дода шуд, ки аз ҷониби корхонаи мазкур ҷиҳати таъмин намудани аҳолии маҳаллаҳои навбунёди 1-15-уми соҳили рости шаҳри Хуҷанд сохтмони иншооти «Хатти обрасонӣ аз чашмаи Деҳмойи ноҳияи Ҷаббор Расулов ба шаҳри Хуҷанд», марҳалаи аввали он «Таҷдид ва зиёд намудани иқтидорҳои истгоҳи №4 КВДК «Хуҷандобуканал»»-ро ҳанӯз соли 2016-ум оғоз гардида, имрӯз мавриди истифода қарор дорад.
Тибқи лоиҳа 2 ҳавзи оби тоза дар маҷмуъ ба андозаи 5000м3, 1 адад истгоҳи бардошти II, 1 адад истгоҳи трансфарматор ба кор андохта шудааст.
Айни ҳол амалишавии марҳилаи дуюми иншоот “Сохтмонҳои 2 ҳавзҳои захиравии оби нӯшокии ҳар кадоме 3000м3 бо хатҳои обгузар” бомаром идома дорад. Таъиноти он бо оби нӯшокӣ таъмини намудани маҳаллаҳои қисми маҳаллаҳои навбунёди 1, 2, 3, 4, 5, 6, ва 7 мебошад, ки бо маблағгузории мутамаркази буҷети ҷумҳуриявӣ амалӣ карда мешавад.
Ба Раиси шаҳри Хуҷанд лоиҳаи сохтмони иншооти “Обтаъминкунии маҳаллаҳои 28, 29 ва 30-юми шаҳри Хуҷанд аз иншооти обдиҳии №2-и КВДК “Хуҷандобуканал” низ муаррифӣ карда шуд, ки он бо маблағгузории Мақомоти иҷроияи ҳокимияти давлатии шаҳри Хуҷанд сурат мегирад.
Ҳамчунин тибқи нақшаи дурнамо асосноккунии техникии ва иқтисодии “Азнавсозии таъмин намудани обҳои нӯшокӣ ва қабули обҳои партови шаҳри Хуҷанд” рӯнамо гардид.
Раиси шаҳри Хуҷанд Фирдавс Шарифзода баъди шиносоӣ бо раванди корҳо доир ба сифатан анҷом додани корҳои сохтмонӣ ба масъулини дахлдор дастуру супоришҳои мушаххас дод.
Таваҷҷуҳи асосӣ ба камхарҷ ва бо афзун намудани иқтидорҳои обрасонӣ карда шуд. Таъкид гардид, ки дар маҳаллаҳои навбунёди шаҳр сокинони зиёд хона бунёд намуда, зиндагӣ оғоз намудаанд ва табиист, ки ба оби нӯшокӣ эҳтиёҷи бештар пайдо мешавад.
Раиси шаҳри Хуҷанд Фирдавс Шарифзода зикр намуд, ки то таҷлили ҷашни 35 — солагии Истиқлолияти давлатии Ҷумҳурии Тоҷикистон бунёди чунин инфрасохтори иҷтимоӣ, ки ба некуаҳволии мардум равона гардидааст, дар шаҳр вусъат меёбад.
Хотиррасон менамоем, ки дар доираи омодагиҳо ба ҷашни 35- солагии истиқлолияти давлатии Тоҷикистон дар асоси дастуру ҳидоятҳои роҳнамунсози Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, нишондодҳои Раиси вилояти Суғд Раҷаббой Аҳмадзода ва иқдомҳои созандаи шаҳрдорӣ дар шаҳри Хуҷанд корҳои созандагиву ободонӣ вусъати тоза касб мекунанд.
Дафтари матбуоти
Раиси шаҳри Хуҷанд
