26 Апрел 2025
Имрӯз дар Боғи фарҳангӣ-фароғатии ба номи Абулқосим Фирдавсии шаҳри Душанбе даври ҷумҳуриявии озмуни «Сайри гули лола» баргузор гардид.
Боиси хушнудист, ки дар даври ҷумҳуриявии фестивал-озмуни гулҳо таҳти унвони “Сайри гули лола” шаҳри Хуҷанд дар миёни шаҳрҳои мамлакат аз рӯйи номинатсияи “Шаҳр”барои саҳми арзанда дар рушди фарҳанги зебоипарастӣ, вусъат бахшидан ба корҳои ободонию созандагӣ, кабудизоркунӣ бо дипломи дараҷаи 1 ва мукофотпулӣ сазовор гардид.
Дар вазъияти тантанавӣ аз ҷониби намояндагони Ҳукумати мамлакат Диплом ва мукофотпулӣ ба Раиси шаҳри Хуҷанд Фирдавс Шарифзода тақдим гардид.
Ин дастовардро ба шаҳрдори ҷавону ободкор, ташаббускор, кулли меҳмонону сокинон ва кормандони ниҳодҳои гуногуни шаҳрдорӣ таҳният гуфта, ба тамоми соҳибкорону шахсони ватандӯст, ташкилоту муассисаҳо, ки дар вусъати корҳои ободониву бунёдкорӣ дар ин гӯшаи назаррабои кишвар саҳмгузорӣ намуда истодаанд, изҳори сипосгузорӣ менамоем.
Воқеан ҳам, чанде қабл шаҳри зебою мунаввари Хуҷанд маркази баргузории чорабинии муҳими сиёсӣ, мулоқоти Президентони Ҷумҳуриҳои Тоҷикистон, Ӯзбекистон ва Қирғизистон мубаддал гардид. Бо эҳтимоми Пешвои муаззами миллат муҳтарам Эмомалӣ Раҳмон имзои санадҳои муҳими таърихӣ – Шартнома байни Ҷумҳурии Тоҷикистон, Ҷумҳурии Қирғизистон ва Ҷумҳурии Узбекистон доир ба нуқтаи пайвастшавии сарҳадҳои давлатии се мамлакат ва Эъломияи Хуҷанд доир ба дӯстии абадӣ маҳз дар шаҳри Хуҷанд дар фазои идона ба имзо расид, ки ин созишномаҳо ба сулҳу субот ва рушди минбаъдаи ҳамкориҳо дар Осиёи Марказӣ мусоидат хоҳад кард.
Ёдовар мешавем, ки кӯчаву хиёбонҳои шаҳри Хуҷандро дар рӯзҳои тантанаҳои Наврӯзи байналмилал беш аз 1 миллион гулҳои ҳархела ва беш аз 300 ҳазор гули лола зеб бахшиданд.
Минбаъд низ мо дар якҷоягӣ бо заҳмати софилона ва якдилона шаҳри азизамон-Хуҷанди бостониро боз ҳам зебою мунаввар, дилрабо, муҷалло ва сафобахш хоҳем намуд.
МУБОРАК БОШАД!
Дафтари матбуоти
Раиси шаҳри Хуҷанд
