Натиҷагирӣ аз 9 моҳи фаъолияти шаҳрдорӣ

Фирдавс Шарифзода, Раиси шаҳри Хуҷанд ҷаласаи фаъолонро ҳусни оғоз бахшида, иттилоъ дод, ки дар он нишондиҳандаҳои рушди иқтисодию иҷтимоии шаҳр дар нӯҳ моҳи соли 2024 баррасӣ гардида, вазифаҳо барои фаъолияти минбаъда муайян карда мешаванд.

Сипас, Муяссара Қаҳҳорӣ, муовини Раиси шаҳри Хуҷанд оид ба натиҷаҳои фаъолияти хоҷагии халқи шаҳр дар 9 моҳи соли 2024 маълумоти муфассал дода аз ҷумла афзуд, ки дар ин давра Мақомоти иҷроияи ҳокимияти давлатии шаҳри Хуҷанд дар соли таърихии 30-солагии Конститутсияи давлатӣ баҳри таъмини иҷроиши дастуру ҳидоятҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, мўҳтарам Эмомалӣ Раҳмон, қарорҳои Ҳукумати Ҷумҳурии Тоҷикистон ва нишондодҳои Раиси вилоят фаъолияти ҳамарўзаи худро дар самти суръатбахшии истеҳсолот, тараққиёти ҳамаи соҳаҳои хоҷагии халқ ба роҳ монда, баҳри пешбурди кулли паҳлуҳои ҳаёти ҷамъиятию сиёсӣ, иқтисодию иҷтимоӣ, равнақи созандагию бунёдкорӣ ва ободонӣ чораҳои босубот андешида истодаанд.

Маврид ба тазаккур аст, ки кулли сокинон ва кормандони ҳамаи соҳаҳои истеҳсолию ғайриистеҳсолӣ ҳамеша ҷонибдори сиёсати пешгирифтаи давлату ҳукумат, ғояҳои хирадмандона ва ояндабинонаи Сарвари кишварамон, муҳтарам Эмомалӣ Раҳмон буда, бо заҳмати ҳамарўзаи худ ба пешрафт ва шукуфоии Тоҷикистони соҳибистиқлоламон саҳмгузорӣ карда истодаанд, ки нишондиҳандаҳои бадастовардаи нўҳ моҳи соли ҷорӣ аз он шаҳодат медиҳанд.

Шаҳри Хуҷанд, ки яке аз шаҳрҳои калонтарини саноатии ҷумҳурӣ ба ҳисоб рафта, дар ҳаҷми умумии маҳсулотҳои дар вилоят истеҳсолшаванда заминаи устувор мегузорад.

Натиҷаи чораҳои андешидашуда имкон дод, ки дар ин давра 37 адад корхонаҳои хурду миёнаи истеҳсолӣ бо истифодаи технологияҳои муосир ва дорои 900 адад ҷойи корӣ, бо ҷалби 53,0 млн. сомонӣ сармояи мустақим сохта ба истифода дода шуда, миқдори умумии корхонаҳои саноатӣ ба 297 адад расонида шавад.

Ин нишондиҳандаҳо дар раванди саноатикунонии босуръати кишвар, барои тақвият ёфтани соҳа, ҳамчун ҳадафи чоруми миллӣ ҷиҳати афзоиш ёфтани ҳаҷми маҳсулотҳои истеҳсолшаванда саҳми босазо гузошта истодааст.

Таҳлилҳо собит менамоянд, ки ҳаҷми умумии маҳсулоти истеҳсолгардида ба 1 млрд. 282,0 миллион сомонӣ расида, нисбат ба ҳамин давраи соли сипаригашта 112,9 млн. сомонӣ афзоиш ёфта, аз ин миқдор 300,8 млн. сомонӣ маҳсулот ба давлатҳои хориҷии дуру наздик содирот карда шудааст. Ин нишондиҳанда барои рушду такомули ин соҳаи реалии иқтисодиёт заминаи устувор гузошта истодааст.

Дар шаҳр шумораи корхонаҳои истеҳсолкунандаи маҳсулотҳои ивазкунандаи воридот зиёд шуда, дар ин давра аз ҷониби 110 адад корхонаҳои хурду калон ба маблағи 634,7 млн. сомонӣ чунин маҳсулот истеҳсол гардид, ки он нисбат ба ҳамин давраи соли сипаригашта 47,6 млн. сомонӣ зиёд гаштааст.

Илова бар ин, қайд кардан бамаврид аст, ки дар давраи ҳисоботӣ шумораи корхонаҳои нисбат ба ҳамин давраи соли гузашта зиёд маҳсулот истеҳсол карда, 43 адад ё 17,1 банди фоизӣ зиёд шуда, теъдоди онҳо ба 297 адад расидааст.

Дар масъалаҳои шуғлнокии соҳа низ пешравиҳо ба назар расида, шумораи кормандон нисбат ба ҳамин давраи соли сипаригашта 757 нафар ё 12,3 дар сад афзоиш ёфта, музди маоши миёнаи кормандон низ 85,8 сомонӣ ё 4,8 фоиз зиёд гардидааст.

Маврид ба зикр аст, ки натиҷаҳои комёбшудаи ин соҳа барои ғанӣ гардонидани бозори дохилӣ ва кам шудани маҳсулоти қаблан воридшаванда шароити мусоид фароҳам оварда, ҷиҳати такомули буҷети давлатӣ замина гузошта истода бошад ҳам, ҳоло дар ин самт имкониятҳои мавҷуда пурра истифода нашудаанд.

Иттилоъ дода шуд, ки дар натиҷаи андешидани чораҳои таъхирнопазир нақшаи буҷети умумии шаҳр ба андозаи 111,1 фоиз ё 570,5 миллион сомонӣ таъмин гардидааст.

Ба буҷети маҳаллии шаҳр бошад, ба ҷои 230,7 миллион сомонии пешбинигардида, 243,9 миллион сомонӣ андозу пардохтҳо ворид гардидааст, ки он дар муқоиса бо нақшаи пешбинигардида ба маблағи 13,2 миллион сомонӣ ё 5,7 дар сад зиёд мебошад.

Қисми хароҷоти буҷети шаҳр 99,8 фоиз таъмин гардида, дар ин давра барои пардохти музди меҳнат ва маблағҷудокуниҳо барои эҳтиёҷоти иҷтимоӣ 133,1 млн. сомонӣ маблағҳои буҷетӣ масраф гардиданд, ки ин 59,1 фоизи хароҷоти умумии буҷети маҳаллиро ташкил намуда, аз ин ҳисоб қарздорӣ ва ё қафомонии пардохти музди меҳнат ҷой надорад.

Зикр шуд, ки ба раванди корҳои бунёдкорӣ ва ободонӣ ҳамчун рисолати шаҳрвандӣ тақвияти рўзафзун дода шуда, дар шаҳр бо истифода аз тамоми имконияту захираҳо бо маблағгузории давлатию бахши хусусӣ чораҳои амалӣ андешида шуда истодааст.

Мутобиқи Амри Президенти Ҷумҳурии Тоҷикистон аз 6 майи соли 2022, №АП-188 бо мақсади омодагии ҳамаҷониба ба ҷашни 35-солагии Истиқлоли давлатии Ҷумҳурии Тоҷикистон бо амри Раиси шаҳр аз 20 июни соли 2022, №77 аз ҳисоби роҳбарони ташкилоту идораҳо ва воҳидҳои сохтории мақомоти иҷроияи ҳокимияти давлатии шаҳр гурўҳи корӣ таъсис дода шуда, нақшаи чорабиниҳои шаҳрӣ оид ба корҳои ободонию бунёдкорӣ ба муносибати 35-солагии Истиқлоли давлатии Ҷумҳурии Тоҷикистон тасдиқ карда шуд.

Бояд қайд намоем, ки аз сохтмон, азнавсозӣ ва таъмиру таҷдиди 950 иншоотҳои ҳаётан муҳими банақшагирифташуда, то имрўз 584 адади онҳо бунёд карда шудааст, ки он нисбат ба нақшаи пешбинишуда 61,0 фоизро ташкил медиҳад. Аз миқдори умумии иншоотҳои бунёдшуда, 178 адади он ба соли ҷорӣ рост меояд. Аз онҳо 50 иншоот дар соҳаи саноат, 15 иншоот дар соҳаи тандурустӣ, 4 иншоот дар соҳаи маориф, 19 иншоот ба дар соҳаи варзиш, 2 иншоти истироҳатӣ-фарҳангӣ, 72 иншоот дар соҳаи савдою хизматрасонӣ, 1 бинои маъмурӣ, 14 бинои истиқоматӣ ва 1 иншоотҳои гуногун бунёд, таъмиру таҷдид ва азнавсозӣ карда шуда, мавриди истифода қарор дода шуданд.

Муяссара Қаҳҳорӣ, муовини Раиси шаҳри Хуҷанд доир ба дигар нишондиҳандаҳои хоҷагии халқи шаҳр давоми 9 моҳи соли раовн ҳисоботи муфассал дод.

Дар ҷараёни маҷлис муовини аввали Раиси шаҳри Хуҷанд Хайрулло Ғайбуллозода, муовини Раиси шаҳр Бахтиёр Боқизода, Суҳроб Самадзода ва Ҷамшед Набизода аз фаъолияти хеш дар ин давра ҳисобот доданд.

Раиси шаҳри Хуҷанд Фирдавс Шарифзода зимни пурсиш аз масъулини дахлдор доир ба бурду бохти шаҳрдорӣ таҳлилҳои амиқ намуда, барои рафъи камбудиҳои ҷойдошта ба масъулин дастуру супоришҳои мушаххас дод.

Мавзуъҳои меҳварии ҷаласаи ҷамъбастӣ корҳои ободонию созандагӣ бахшида ба 35 солагии Истиқлолияти давлатии Ҷумҳурии Тоҷикистон, соҳаи тиббу маориф, хизматрасонӣ ба аҳолӣ, саноат, сохтмон ва ғайраҳо буданд.

Дар ҷараёни маҷлис муовини муовини Раиси вилояти Суғд Анвар Яъқубӣ доир ба мавзуъоти рӯзмарра фикру мулоҳизаҳои хешро баён дошт.

Раиси шаҳри Хуҷанд Фирдавс Шарифзода фаъолияти шаҳрдориро дар 9 моҳи соли 2024 натиҷагирӣ намуда, барои амалӣ намудани нақшаҳои соли ҷорӣ ба масъулини дахлдор дастуру супоришҳо дод.