28 Апрель 2022
Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар сиёсати маорифпарваронаву оқилонаи худ соҳаи маорифро соҳаи сарнавиштсозу афзалиятнок эълон намуда, изҳор доштанд, ки «бунёди миллат аз маориф оғоз меёбад ва ғамхорӣ нисбат ба маориф-сармоягузорӣ барои рушди неруи инсонӣ ва ояндаи ободи давлат ва Ватан мебошад.
Раиси вилояти Суғд Раҷаббой Аҳмадзода ва Раиси шаҳри Хуҷанд Фирдавс Шарифзода бо мақсади огоҳӣ аз раванди корҳои сохтмонию бунёдкорӣ дар соҳаи маорифи шаҳр ба муносибати 25 солагии Рўзи Ваҳдати миллӣ ва 30 солагии Иҷлосияи 16-уми Шўрои Олии Ҷумҳурии Тоҷикистон боздид ва ошноӣ пайдо карданд.
Зимни боздид аз МТМУ №28 иттилоъ дода шуд, ки бинои нави муассисаи таълимӣ бо маблағгузории Мақомоти иҷроияи ҳокимияти давлатии шаҳри Хуҷанд бо харҷи 18 миллион сомонӣ сохта мешавад. Тибқи лоиҳа иншоот аз чор ошёна ва таҳхона иборат буда, дорои 23 синфхона ва дигар иншооти ёрирасон мебошад. Фармоишгари иншооти сохташаванда Идораи сохтмони асосии шаҳри Хуҷанд, пудратчӣ Ҷамъияти дорои масъулияти маҳдуди “Сохтмонворидот” ва лоиҳакаш КФД “Суғдшаҳровар” мебошад. Мактаб барои 1280 нафар хонанда дар ду баст пешбинӣ шудааст. Алҳол дар иншооти номбурда то 100 нафар сохтмончиёни маҳаллӣ кору фаъолият доранд. Бунёди таххона ва ду ошёнаи мактаб ба охир расида, корҳои сохтмонӣ дар ошёнаи сеюми он бомаром идома дорад.
Зимни боздид ҳамчунин аз ҳолати сохтмони ширхоргоҳ-кўдакистони №18-и шаҳри Хуҷанд шиносоӣ карда шуд.
Иттилоъ дода шуд, ки ин муассисаи таълимӣ ҳанўз соли 1959 сохта шуда, масоҳаташ 0, 33 га. –ро ташкил медиҳад.
Корҳои сохтмонӣ дар кўдакистон бомаром идома дорад ва алҳол тибқи лоиҳа он 3 ошёна ва таҳхона иборат буда, дар атрофи он дигар иншооти зарурӣ барои тарбияи кўдакон низ бунёд карда мешавад. Фармоишгари иншоот Идораи сохтмони асосии Мақомоти иҷроияи ҳокимияти давлатии шаҳр буда, пудратчии иншоот ширкати «Сохтмонворидот» мебошад.
Баъди истифодаи ин муассисаи таълимӣ беш аз 180 нафар кӯдакон ба тарбия фаро гирифта мешаванд.
Кўдакистони бунёдшаванда бо назардошти талаботи замони муосир сохта мешавад ва дар он беҳтарин шароити тарбияву ба камолрасонии кўдакон муҳайё мегардад.
Раиси вилоят Раҷаббой Аҳмадзода ба масъулини сохтмон ҷиҳати босифат анҷом додани корҳои сохтмонӣ ва истифодаи васеи маҳсулоти ватанӣ дастуру супоришҳо дод. Ба масъулини соҳаи шаҳрсозӣ дастур дода шуд, ки атрофи биноҳои таълимиро ба тартиб дароварда, барои ба талаботи замони муосир қомат афрохтани иншооти атроф тадбирҳо андешанд.
Дафтари матбуоти
Раиси шаҳри Хуҷанд
