02 Октябрь 2021
ОМӮЗГОР – РАҲНАМОИ РӮЗГОР
Омӯзгорони гиромиқадр, мураббиёни азиз ва кулли алоқамандони соҳаи маориф!
Шуморо аз номи Мақомоти иҷроияи ҳокимияти давлатии шаҳри Хуҷанд бо Рӯзи омӯзгор табрику таҳният мегӯям.
Ҳамасола мардуми шарафманди шаҳри бостонии Хуҷанд чун дигар сокинони шаҳру навоҳии мамлакат бо мақсади арҷгузорӣ ба хидмати муаллим, таълиму тарбиядиҳандаи аҳли башар Рӯзи омӯзгоронро ботантана ҷашн мегирад. Асосгузори сулҳу ваҳдати миллӣ - Пешвои миллат, Президенти мамлакат мӯҳтарам Эмомалӣ Раҳмон соҳаи маорифро яке аз самтҳои стратегӣ ва афзалиятноки сиёсати давлат эътироф намуда, ҷиҳати бузургдошти шахсияти муаллимону мураббиён ғамхориҳои бузург зоҳир менамоянд. Пешвои муаззами миллат дар яке аз суханрониҳои худ дар васфи омӯзгорон чунин фармудаанд: «Муаллимону омӯзгорон машъалафрӯзони илму дониш буда, дар замири хонандагон шӯълаи меҳри хондану аз бар намудан ва омӯхтани донишҳои гуногуни муосири ҷаҳониро меафрӯзанд. Ба ибораи дигар, устодон шаҳсутунҳои низоми таълиму тарбия ва омӯзишу парвариш мебошанд».
Барои беҳтар намудани шароити муассисаҳои соҳаи маориф бо дастгирии ҳамаҷонибаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон ва Раиси вилояти Суғд Раҷаббой Аҳмадзода силсилаи тадбирҳо амалӣ гардида, дар натиҷа муассисаҳои таълимии типи нав ва замонавӣ сохта, ба истифода дода шуда, сатҳу сифати тарбия ва дараҷаи донишандӯзии хонандагон куллан беҳтар гардид.
Омӯзгорон ба ҳама гуна арҷгузорию қадршиносӣ шоистаанд, зеро пешаи омӯзгорӣ басо сангину заҳматталаб, вале пурифтихор аст. Устодони маҳбуби мо баҳри боло рафтани сатҳи таълиму тарбия, шукуфоии имрӯзу фардои кишвар ва афзудани обрӯю эътибори ҷумҳуриамон дар арсаи ҷаҳон пайваста меҳнати фидокорона мекунанд ва ин ҳама заҳмат натиҷаҳои дилхоҳ дода истодааст ва аз назари роҳбарияти кишвару вилоят ва шаҳр дур намемонад.
Омӯзгорон ва кулли алоқамандони соҳаи маорифро бо Рӯзи гиромидошти муаллим бори дигар табрику таҳният мегӯям, барояшон тани сиҳат, барори кор ва дар таълиму тарбияи насли наврас муваффақиятҳои бешумор хоҳонам.
