25 Май 2021
Дар МТМУ №27-и шаҳри Хуҷанд бо мақсади тарбияи хонандагон дар рўҳияи ватандўстӣ, ҳисси миллӣ, хештаншиносӣ, меҳру муҳаббат доштан ба Тоҷикистони азиз бахшида ба 30 солагии Истиқлолияти давлатии Ҷумҳурии Тоҷикистон чорабинии пуршукуҳи идона, ки саршор аз маънии худшиносиву ватанпарварӣ буд, баргузор гардид.
Гуруҳи карнайнавозон меҳмононро истиқбол ва ба сўйи хаймаҳои “30 соли дастовардҳои Истиқлолият” раҳнамоӣ сохтанд. Дар 6 адад хаймаҳои орододаи муҳассилини муассиса аз оғози соли Истиқлолият то ба имрўз тамоми муваффақият ва дастоварди сарзамини аҷдодӣ мунъакис гардида буданд. Таъкид шуд, ки халқи тоҷик бо шарафу номус, боварию садоқат, ибтикору ташаббус ва авлавияти манфиатҳои муҳими миллату Ватан таҳти сарварии Асосгузори сулҳу Ваҳдати миллӣ, Пешвои миллат, Президенти мамлакат муҳтарам Эмомалӣ Раҳмон дар марҳилаҳои мураккаби таърихӣ, бо азхуднамоии арзишҳои миллӣ ва хотима бахшидан ба ҷанги шаҳрвандӣ ба давлати рў ба тараққӣ мубаддал гардид.
Албатта, ҷойи ҳеҷ шакку шубҳаи дигаре нест, ки бо дарки воқеияти ҷомеи муосир, ҳаёти иҷтимоиву иқтисодии мардуми тоҷик давоми 30 соли соҳибистиқлолӣ ҷумҳурӣ ба куллӣ тағйир ёфта, масъалаҳои муҳими хоҷагии халқ бо эҷоди ташаккули давлатдории миллӣ тадриҷан ҳалли худро пайдо намуданд. Новобаста аз вазъи ноороми мамлакат ва заъфи имкониятҳои мавҷуда, дар давлати мо таҳти дастуру ҳидоятҳои ҳамешагии Пешвои муаззами миллат муҳтарам Эмомалӣ Раҳмон раванди корҳои созандагиву бунёдӣ вусъати тоза гирифта, тавассути заҳматҳои содиқонаву софдилонаи мардуми ватандӯсту ватанпарвар ба як давлати рў ба инкишофу тараққӣ мубаддал гардидааст.
Бо таваҷҷуҳ ба ҳунарҳои мардумӣ аз ҷониби ҳунармандони чирадасти маҳаллаи "Раззоқ" маҳсули эҷод муаррифӣ карда шуд.
Сипас, барномаи адабӣ-фарҳангӣ таҳти унвони “«Шукри 30 соли Истиқлолият» бо танинандозии Суруди миллӣ оғоз гардид.
Хонандагон дар васфи Тоҷикистон, Ватан, Миллат, Президент, Парчам, Забон, Ваҳдат ва ғайраҳо шеърҳои пурмазмун қироат намуданд.
Саҳнаи ҷолиб ва таърихӣ аз ҳаёти мардум дар замони ҷанги шаҳрвандӣ хеле муассир намоиш дода шуд. Муждаи сулҳ ва баҳамоии тоҷикон бо ибтикороти Роҳбари Давлат муҳтарам Эмомалӣ Раҳмон ба дилҳо шавқу сурур бахшид. Таъкид шуд, ки яке аз самараҳои истиқлол ин аст, ки Тоҷикистон тоҷикони ҷаҳонро ба ҳам овард ва дари худро ба ҳаммиллатони бурунмарзӣ боз намуд. Тоҷикистон ин сарзамини аз ниёгон меросмонда, дар роҳи истиқлол қадамҳои устувор ба пеш гузошт.
Рақсҳои мавзун, сурудҳои дилнишин табъи ҳозиринро болида намуд. Суруди умумии ватандўстона ба чорабинӣ ҳусни анҷом бахшид.
Директори муассисаи таълимии миёнаи умумии №27-и шаҳри Хуҷанд Манзура Ёрматова чорабиниро натиҷабардорӣ намуда, аз ҷумла афзуд, ки Истиқлолият миёни ҷашнҳои миллии мо мақом ва ҷойгоҳи махсус касб намудаву сол то сол қимати таърихиаш рў ба афзоиш дорад. Зеро ин санаи нодири таърихӣ дар саҳифаҳои соҳибистиқлолии миллиамон яке аз рӯйдодҳои муҳиму нодири таърихи навини давлатамон ба ҳисоб меравад. Роҳандозии чунин чорабинии фарҳангӣ бахшида ба 30 солагии Истиқлолияти давлатии Ҷумҳурии Тоҷикистон ба ҳамагон имкон медиҳад, ки бори дигар мардуми сарбаланди тоҷик решаҳои худро аз гузаштаҳои дур дарёфт карда, пайванди азалӣ доштани хешро ба онҳо эҳсос намуда, устувор гардонанд.
Таъкид гардид, ки бо таваҷҷуҳ ба нуктаҳои арзишманди таърихӣ ва ибтикороти Меъмори сулҳ- Пешвои муаззами миллат муҳтарам Эмомалӣ Раҳмон зикр намудан бамаврид аст, ки миллати куҳанбунёди мо дар ин муноқишаҳои бесару нӯги дохилӣ бори дигар ҷаҳониёнро бовар кунонид, ки тоҷикон ҳамчун миллати дорои фарҳангу хиради баланди азалӣ ҳамеша ҷонибдори сулҳу ваҳдати пойдор буданд, ҳастанд ва мебошанд.
Дар ин масир Ҷумҳурии Тоҷикистон бо ибтикору ташаббус ва рафъи мушкилоти масоили умдаи сайёра таҳти роҳбарии фарзанди фарзонаву абармарди раҳнамунсозаш мақому манзалати муносибе пайдо намуд. Воқеияти аслии дигаре, ки тавассути истиқлолияти давлатӣ барои рушду тавсеаи он имкониятҳои мусоид фароҳам сохт, ин мустаҳкаму устувор намудани пояҳои фарҳанги миллӣ бо иҷрои арзишҳои неки анъанаҳои ниёгонамон мебошад.
Зикр шуд, ки асри ХХI, ки давраи тараққиёти босуръати тафаккури илмиву техникӣ ва бозёфтҳои тозаи ақли инсонӣ мебошад, ба неруи офарандаву созанда, ҷӯяндаву навовари миллати тоҷик ва ҷавонони бо нангу номуси он аз ҳар вақти дигар бештар ниёз дорад. Маҳз мардуми соҳибфарҳанг ва ҷавонони соҳибмаърифату боистеъдод метавонанд хазинаи илму фарҳанги миллати хешро ғанӣ гардонида, ҳамчун ҳалқаи мустаҳкам дар занҷири маърифати наслҳо хизмат намоянд.
Бо таваҷчуҳ ба амалисозии омилҳои зикргардида ва дар шароити равандҳои пурталотуми ҷаҳонишавӣ мо бояд тафаккури солими миллиро дар зеҳни ҷавонону наврасон инкишофу тақвият бахшида, арзишҳои миллиро аз таҳдидҳои хатарбори асри нав эмин нигоҳ дорем. Зеро маҳз тавассути соҳибистиқлолии Ватан рушди иқтисоди миллии мо ба марҳилаҳои сифатан нав расида, ба дурнамои устувори бахшҳои муҳими хоҷагии халқ заминаҳои мусоиду устувор фароҳам овард.
Дар маҷмӯъ, метавон гуфт, ки дастовардҳои давлату давлатдории тоҷикон тўли солҳои соҳибистиқлолӣ қобили мулоҳиза ва зикри махсус мебошанд. Аз ин рӯ, бояд ҳар фарди бонангу номуси миллат бо бардоштани сабақи ибратомўзи таърих аз ҳодисоти гузаштаи халқамон шукронаи сулҳу суботи сарзамини аҷдодиямонро ба ҷой орад, ба қадри ин неъмати бебаҳои умумимиллӣ — Истиқлолияти давлатӣ бирасад ва барои ободии Тоҷикистони азиз саҳми софдилонаву содиқонаи худро гузорад.
Ҷоиз ба таъкид аст, ки дар чорабинии мазкур намояндагони шуъбаи маорифи шаҳри Хуҷанд, раиси кумитаи маҳаллаи “Раззоқ, муовини раиси кумиҷроияи ҲХДТ дар шаҳри Хуҷанд, фаъолони маҳалла ва дигарон иштирок намуда, ба сатҳи баргузории чорабинӣ баҳои баланд доданд.
Дафтари матбуоти
Раиси шаҳри Хуҷанд
