31 Декабр 2020
СОЛИ НАВ – СОЛИ МУЗАФФАРИЯТҲОИ БЕШУМОР ГАРДАД
Ҳамшаҳриёни азиз!
Мо бо соли 2020-уми милодӣ, ки дар таърихи мардуми Тоҷикистон ҳамчун соли пурбарор, соли заҳмати содиқона баҳри ободонии Ватани азиз, амалӣ гардидани ҳадафҳои неки бунёдкорона ва дастовардҳои навбатии давлати соҳибистиқлоламон нақш хоҳад баст, хайрбод мегӯем ва соли нави 2021-умро бо умеду орзуҳои нек ва нақшаву ниятҳои созанда истиқбол мекунем.
Дар ин лаҳзаҳои идона ва фараҳбахш ҳамаи шумо, сокинон ва меҳмонони шаҳри бостонии Хуҷандро бо фарорасии соли нави милодии 2021-ум самимона табрику таҳният гуфта, ба ҳар яки шумо тансиҳативу дарозумрӣ, рӯзгори ободу осуда, бахти пояндаву иқболи нек ва зиндагии пурфайзу бобаракатро орзу менамоям.
Ба шарофати сиёсати хирадмандона ва дурбинонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон Тоҷикистони соҳибистиқлол ба кишвари мутамаддину пешрафта табдил ёфт. Маҳз бо кӯшишҳои пайваста ва фидокоронаи абармарди миллат Эмомалӣ Раҳмон давлати куҳанбунёди мо имрӯз тозаҷавонӣ дорад.
Сокинони шаҳри Хуҷанд дар соли сипаришуда меҳнати пурсамар намуда, дар таъмини иҷрои дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон ва Раиси вилояти Суғд Раҷаббой Аҳмадзода ҳадафмандона талош варзида, чун дигар сокинони шаҳру навоҳии кишвар баҳри истиқболи ҷашни миллӣ 30-солагии Истиқлолияти давлатии Ҷумҳурии Тоҷикистон ба комёбиҳои назарраси меҳнатӣ ноил гардиданд.
Аз ҷумла, дар доираи нақшаи чорабиниҳои шаҳрӣ ба муносибати 30-солагии Истиқлолияти давлатии Ҷумҳурии Тоҷикистон ва дар ин замина аз ҷониби Раиси вилояти Суғд Раҷаббой Аҳмадзода эълон гардидани 1300-рӯзи меҳнати зарбдор дар шаҳри Хуҷанд бо дастгирии Ҳукумати Ҷумҳурии Тоҷикистон, Мақомотҳои иҷроияи ҳокимияти давлатии вилояти Суғд ва шаҳри Хуҷанд, соҳибкорони ватандӯсту меҳанпараст садҳо иншооти иҷтимоию маишӣ ва истеҳсолию саноатӣ сохта ба истифода дода шуд, ки барои боз ҳам баланд бардоштани сатҳи некӯаҳволии мардум заминаи воқеӣ гузошт ва ба ҳусни нотакрори ин Хуршедшаҳр шукӯҳу шаҳомати хоса зам намуд.
Итминони комил дорам, ки дар соли 2021-ум Ватани азизамон боз ҳам ободу шукуфонтар гардида, мушкилоте, ки соли равон ҷомеаи ҷаҳониро фаро гирифт, паси сар хоҳад шуд ва шаҳрвандони фархундатолеъ бо руху илҳоми тоза, дар фазои сулҳу субот ба истиқболи ҷашни бузурги миллат, 30-солагии Истиқлолияти давлатии Ҷумҳурии Тоҷикистон созандагию бунёдкориҳои хешро идома хоҳанд дод.
Бо чунин таманниёти нек, бори дигар шумо, ҳамшаҳриёни азизро бо фарорасии Соли нави милодӣ табрику таҳният гуфта, бахти баланду толеъи накӯ ва зиндагии пурнишот орзу мекунам.
Соли нави милодӣ муборак, ҳамдиёрони азиз!
