13 Январ 2015

Имрӯз дар толори Маркази фарҳанг  маҷлиси фаъолони шаҳри Хуҷанд баргузор гардид.
Дар маҷлис Раиси шаҳри Хуҷанд Раҷаббой Аҳмадзода муовини Раиси вилояти Суғд Хайрулло, Амонулло, муовинони Раиси шаҳр, роҳбарони мақомоти қудратӣ, воҳидҳои сохторӣ, раисони кумитаҳои маҳаллаҳо, директорони мактабҳои миёна, сарварони бозорҳо ва дигар шахсони масъул иштирок намуданд.
Мудири Шӯъбаи иқтисод ва савдои Макомоти иҷроияи ҳокимияти давлатии шаҳри Хуҷанд Усмонҷон  Алимов «Оиди натиҷаҳои рушди иҷтимоию иқтисодии шаҳри Хуҷанд дар соли 2014» маърӯза намуд. (матни пурраи маърӯза дар саҳифаи сомонаи МИҲД ҷой дода шудааст). Раиси шаҳри Хуҷанд Раҷаббой Аҳмадзода дар идомаи маърӯза зикр намуд,ки ба масалаҳои зиёд намудани ҷойҳои нави корӣ, ҷалби бештари муҳоҷирони баргашта ба меҳнат, хусусан ба иншоотҳои сохтмонӣ, корхонаю муассисаҳои нав  эътибори ҷиддӣ дода шавад. Агарчанде имрӯз 56 ҳазор нафар сокинони шаҳр ҷойи корӣ доимӣ доранд лек ин ҳадди ниҳоӣ  нест. Дар шаҳри Хуҷанд имкониятҳои зиёди ташкили ҷойҳои нави корӣ мавҷуд аст. Ба Усмонҷон Алимов дар мавриди зиёд намудани ҳаҷми маҳсулоти истеҳсолӣ дар соли равон ба ҳаҷми 30 % ва дигар масалаҳои беҳтар намудани сатҳу рушди соҳаи иқтисодиёти шаҳр аз ҷониби Раиси шаҳри Хуҷанд супоришҳои мушаххас дода шуд.
Дар суханронии мудири шӯъбаи меъморӣ ва шаҳрсозӣ Маъруфҷон Мамадҷонов қайд гардид, ки «. Ҳоло дар 114 иншоотҳои маркази вилоят корҳои сохтмонӣ бо суръат идома ёфта истодааст. Баҳри назорат аз рафти корҳои сохтмонӣ ва таъмини риояи талаботҳои Меъёрҳою қоидаҳои сохтмони Ҷумҳурии Тоҷикистон дар ҳудуди шаҳр Шуъбаи меъморӣ ва шаҳрсозӣ якҷоя бо дигар сохторҳои марбутаи шаҳр дар соли сипаришуда дар 42 иншоотҳои сохташудаистода санҷишҳо гузаронида як қатор камбудииҳоро ошкор намуд. Дар натиҷа ба фармоишгарон ва пудратчиён 57 адад «Огоҳинома»-ҳо оиди боз доштани корҳои созтмонӣ то ислоҳи камбудиҳо дода шуда 38 адад Протоколҳои ҳуқуқвайронкунии маъмурӣ тартиб дода шудааст. Бо 78 адад Қарорҳои Шӯъба дар бораи таъйин намуданӣ ҷазои маъмурӣ ба шахсони ҳуқуқӣ ва воқеъӣ ба маблащи 50320 сомонӣ ҷарима таъин карда шуд,ки нисбати соли гузашта хеле зиёд мебошад. Дар асоси эътирози Прокуратураи вилояти Сущд як адад иҷозатномаи барои ощози сохтмон додашуда бо қарори мудири шӯъбаи меъморӣ ва шаҳрсозӣ бекор карда шуд».
Раиси шаҳри Хуҷанд ба шӯъбаи меъморӣ ва шаҳрсозӣ дастур дод, ки ба истиқболи Наврӯзи имсола омодагии ҳамҷониба дида биною иншоотҳоро таъмир намуда ба намуди зоҳирии онҳо эътибор диҳанд. Ҳамчунин зикр гардид, ки дар корҳои сохтмонӣ бештар бояд сокинони аз муҳоҷирати меҳнатӣ баргашта ҷалб шаванд. Зеро тибқи таҳлилҳо дар ин сурати амалӣ гаштани тамоми лоиҳаҳои сохтмонӣ  зиёда аз 3 ҳазор нафар хоҳишмандон  имкони пайдо намудани ҷойи кори доимиро пайдо мекунанд. Ҳамчунин супориш дода шуд ,ки дар лоиҳаҳои минбаъдаи биноҳои истиқоматӣ системаи алоҳидаи гармидиҳӣ ва барқтаъминкунӣ пешбинӣ карда шавад. Дар баробари ин иттилоъ дода шуд, ки шурӯъ аз соли равон аз ҳисоби буҷа сохтмони манзилҳои истиқоматӣ оғоз ёфта, он барои кормандони соҳаи буҷавӣ,мутахассисони ҷавон ва кормандони ҳифзи ҳуқуқ дода мешавад.Ҳамзамон тибқи нақша дар ду мактаб,- гимназия № 1 ба номи М Беҳбудӣ ва Литсеи ба номи Мю Осимӣ   толори варзишӣ ва дар маҳаллаи 28 ум бошад, бунёди мактаби миёна барои 640 хонанда пешбинӣ шудааст.
Баъди шунидани ҳисоботи солонаи мудири шӯъбаи нақлиёт ва алоқаи Мақомоти иҷроияи ҳокимияти давлатии шаҳри Хуҷанд Ғафурҷон Дадоҷонов аз ҷониби Раиси шаҳри Хуҷанд Раҷаббой Аҳмадзода таъкид гардид, ки ҳоло дар мавриди тартиби ҳаракати бенизоми  нақлиётҳои  микроавтобусҳои мусофиркашон дар мавзеи автовакзали кӯҳна, кӯчаи Шарқ камбудиҳо  ҷой доранд. Барои дар назди  кӯдакистони президентӣ ва маҳаллаи 18-уми шаҳр гузоштани чароғакҳои раҳнамо ба мутасаддиён 3 моҳ мӯҳлат дода шуд. Нисбати фаъолияти кормандони БДА дар мавзеи Панҷшанбе, кӯчаҳои марказии шаҳр эроди ҷиддӣ гирифта шуда, барои ислоҳи вазъ аз ҷониби Раиси шаҳри Хуҷанд супориш дода шуд.
Баъди шунидани ҳисоботи Бахтиёр Исматҷонов, мудири Бахши ҷавонон, варзиш ва сайёҳӣ бошад Раиси шаҳри Хуҷанд доири пешгирӣ намудани шомилшавии ҷавонон    ба  гурӯҳҳои ифротгароӣ, ҷудошавии оилаҳои ҷавон,баланд бардоштани маърифати ҳуқуқии онҳо, тарғиби ҳаёти солим тариқи ВАО, дастуру супоришҳо дод. Ҳамчунин баъди баромади ҳисоботии мудири Бахши кор бо занон ва оила- Муҳайё Дадобоева, кор ба маҳаллаҳо- Сайфуллохон Ҳабибуллоев, Сарраёсати ободонӣ ва манзилию коммуналӣ Даврон Шокиров, маориф ва илм Саидмухтор Ҷалолов, тандурустӣ Абдумуталиб Каримов ва чанде дигарон вазифагузорӣ карда шуд.
Муовини Раиси вилояти Суғд Хайрулло Амонулло дар интиҳои ҷаласа барои саҳми корхонаю ташкилотҳои маркази вилоят бобати пешрафти соҳаҳои мухталиф изҳори сипосмандӣ намуд.