25 Июн 2019

Субҳи имрӯз беш аз 200 нафар наврасони болаёқату аълохон, камбизоату ятим ва бепарастор ба истироҳатгоҳи беруназшаҳрии «Парвоз» гусел карда шуданд.

Тавре, ки иттилоъ дода шуд, ки урдугоҳи беруназшаҳрии «Парвоз»-и Хуҷанд бо ҷалби беш аз 700 ҳазор сомонӣ маблағҳои буҷети маҳаллӣ ба таъмиру таҷдид фаро гирифта гирифта шудааст. То имрӯз як қатор корҳои асосӣ, аз ҷумла роҳравҳои асосии урдугоҳ дар ҳаҷми 500 метри мураббаъ, ҳавзи оббозӣ, чароғоннамоӣ, ошхона ва ғайраҳо ба анҷом расида, урдугоҳ барои қабули наврасон пурра омода аст.

Раиси шаҳри Хуҷанд Маъруф Муҳаммадзода соли ҷорӣ бо мақсади муҳайё намудани шароити арзандаю созгор ва ташкили истироҳати тобистонаи кӯдакон ва наврасон аз урдугоҳи «Парвоз» 3 маротиба боздид намуда, ба масъулини сохтмон дастур дода буд, ки ба корҳои таъмиру таҷдид суръат бахшида, баҳри босифат анҷом додани он тадбирҳои мушаххас андешида шавад. Ба роҳбарияти шуъбаи маорифи шаҳри Хуҷанд супориш дода шуда буд, ки баҳри гузаронидани корҳои ободонӣ шанбегии умумишаҳрӣ гузаронида шавад ва ин макон зебову пуртароват гардида, ба мавсими истироҳату фароғати наврасон омода карда шавад.

Ҷоиз ба зикр аст, ки ҳудуди урдугоҳи «Парвоз» беш аз 5, 6 гектарро ташкил намуда, дар он 4 бинои хобгоҳи умумии истироҳатӣ бо фарогирии беш аз 200 нафар истироҳаткунандагон мавҷуд аст. Дар истироҳатгоҳ дар баробари ошхона, ҳавзи шиноварӣ ҳамзамон амфитеатр, ҳаммом, нуқта тиббӣ, китобхона ва дигар инфрасохтори зарурӣ мавҷуд мебошад.

Дафтари матбуоти
Раиси шаҳри Хуҷанд