24 Май 2019
Дар майдони назди Театри давлатии мазҳака ва мусиқии ба номи Камоли Хуҷандии шаҳри Хуҷанд бо иштироки Раиси вилояти Суғд Раҷаббой Аҳмадзода, Раиси шаҳри Хуҷанд Маъруф Муҳаммадзода ва беш аз 50 ҳазор нафар мардум маросими ҷамъбастии чорабиниҳои Рӯзи ҷавонони Тоҷикистон дар вилояти Суғд баргузор гардид.
Раиси вилояти Суғд Раҷаббой Аҳмадзода ҷавононро ба муносибати Рӯзи ҷавонони Тоҷикистон табрик гуфта, аз ҷумла таъкид дошт, ки Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон ҷавононро нерўи тавонои созанда ва пешбарандаи ҳамаи соҳаҳои ҳаёти мамлакат меҳисобанд ва ҳалли мушкилоту масъалаҳои вобаста ба зиндагӣ ва таҳсилу фаъолияти онҳоро ҳамчун самти афзалиятноки сиёсати иҷтимоии давлат ва ҳукумати мамлакат муайян намудаанд. Маҳз чунин сиёсати ҷавонпарваронаи Пешвои муаззами миллат ва таваҷҷўҳи Ҳукумати Ҷумҳурии Тоҷикистон ба насли ҷавон аст, ки дар замони Истиқлолияти давлатӣ дар ҷаҳонбинӣ ва назару андешаи ҷавонон таҳаввулоти куллӣ ба вуҷуд омада, имрўз гуфтору рафтор, одобу ахлоқ ва муносибати онҳо ба зиндагӣ бамаротиб беҳтар гардидааст ва ҷавонони мо ҳоло дар корҳои давлативу ҷамъиятӣ саҳми сазовор гузошта истодаанд. Дар ҳалли масъалаҳои ҳаётан муҳим, аз ҷумла таҳкими пояҳои давлатдорӣ, рушди муназзаму устувори ҳамаи соҳаҳои иқтисоди миллӣ, бунёди роҳҳо ва нақбу пулҳо, нерўгоҳҳои хурду бузург, сохтмони иншооти иҷтимоӣ ва умуман дар раванди пешрафту ободонии кишварамон нақш ва саҳми ҷавонон басо арзишманд мебошад,-иброз дошт Раиси вилоят.
Ба таъкиди Раҷаббой Аҳмадзода Мақомоти иҷроияи ҳокимияти давлатии вилоят низ бо мақсади дастгирии ҷавонони боистеъдод, ватандӯсту соҳибмаърифат ва худогоҳу хештаншинос бо таъсис додани стипендия ва грантҳои Раиси вилоят, ҷоизаю мукофотҳои соҳавӣ барои ғолибону фаъолон тадбирҳои муассир меандешад. Аз ҷумла, барои дар сатҳи баланди сиёсию фарҳангӣ, оммавию варзишӣ, тарбиявию ахлоқӣ таҷлил намудани Рӯзи ҷавонони Тоҷикистон қарорҳои дахлдори Раиси вилоят ба тасвиб расида, дар асоси он дар тамоми шаҳру ноҳияҳои вилоят силсилаи чорабиниҳо бо шумули мусобиқаҳои кушоди вилоятӣ барои дарёфти Ҷоми Раиси вилояти Суғд гузаронида шуданд.
Иттилоъ дода шуд, ки баҳри иҷрои қарорҳои дахлдори Ҳукумати Ҷумҳурии Тоҷикистон ва дастгирии ҷавонон дар вилоят Барномаи миллии рушди иҷтимоии ҷавонон барои солҳои 2016-2018 ва барои солҳои 2019-2021, Барномаи вилоятии тарбияи ватандўстӣ ва таҳкими ҳувияти миллии ҷавонон барои солҳои 2019-2022, Барномаи маҳаллии маҷмўии рушди тарбияи ҷисмонӣ ва варзиш барои солҳои 2017-2021, Барномаи маҳаллии рушди футбол барои солҳои 2017-2021 қабул гардида, дар маҷмўъ барои амалишавии ин барномаҳо дар соли 2018-ум 1 миллиону 54 ҳазор сомонӣ ва барои соли ҷорӣ 1 миллиону 604 ҳазор сомонӣ ҷудо гардидааст.
Раҷаббой Аҳмадзода гуфт, ки бо мақсади дастгирии ҷавонон ва пешбурди сиёсати давлатии ҷавонон қабул гардидани қарорҳои Раиси вилоят “Дар бораи таҷлили Рўзи ҷавонони Тоҷикистон дар вилояти Суғд таҳти унвони “Ҷавонон – пайрави Пешвои миллат!”, «Дар бораи ташкил ва гузаронидани Ҳафтаи иштироки донишҷўёни муассисаҳои таҳсилоти олии касбии вилоят дар идоракунии мақомоти иҷроияи ҳокимияти давлатии вилояти Суғд» ва «Дар бораи муқаррар намудани стипендияи Раиси вилояти Суғд барои солҳои хониши 2018-2019», инчунин баргузории ҷаласаи Шўрои кор бо ҷавонони назди Раиси вилоят, конференсияи илмии “Ҷавонон муаррифгари фарҳанги миллӣ ва эҳёгарони ҳунарҳои мардумӣ”, иштироки фаъолонаи ҷавонон дар Ҳафтаи иштироки донишҷўён дар идоракунии Мақомоти иҷроияи ҳокимияти давлатии вилояти Суғд, маросими тақдими стипендияҳои Раиси вилоят ба донишҷўёну магистрантон ва аспирантони макотиби олии вилоят, боварӣ дорам, ки бевосита баҳри баланд бардоштани самаранокии татбиқи сиёсати давлатии ҷавонон, тақвият бахшидани фаъолият дар самти тарбияи ватандўстӣ, маънавию ҷисмонии ҷавонон, инкишофи ҳисси ватанпарастӣ ва муҳаббати онҳо нисбат ба Ватан, таҳкими истиқлолияту ободии Ватан мусоидат хоҳад намуд.
Барномаи рангини консертии фарогири суруду таронаҳои ватандӯстона ба чорабинӣ ҳусни дигар зам намуд.
Дафтари матбуоти
Раиси шаҳри Хуҷанд