13 Июн 2018

12 июни соли равон Раиси вилояти Суғд Раҷаббой Аҳмадзода ба Маркази минтақавии хизматрасонии иҷтимоӣ ба пиронсолон ва маъюбон дар шаҳри Хуҷанд ташриф оварда, бошандагони ин муассисаи иҷтимоиро аёдат намуд.

Раҷаббой Аҳмадзода зимни суҳбат бо бошандагони Маркази минтақавии хизматрасонии иҷтимоӣ ба пиронсолон ва маъюбон ҳамаи онҳоро ба муносибати фарорасии Иди саиди Фитр ва Рӯзи Ваҳдати миллӣ табрик гуфта, иброз дошт, ки бо ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қишри ниёзманди ҷомеа ҳамеша зери таваҷҷуҳи мақомоти давлатӣ қарор доранд. Аз ҷумла, дар вилояти Суғд ба ҳаёту зиндагии пиронсолон ва маъюбон таваҷҷуҳи махсус зоҳир мегардад ва роҳбарияти Мақомоти иҷроияи ҳокимияти давлатии вилоят ба таври доимӣ ба онҳо кӯмакҳои хешро мерасонад.

Дар ин рӯз барои 54 нафар бошандагони Маркази минтақавии хизматрасонии иҷтимоӣ ба пиронсолон ва маъюбон дастурхони идона ороста шуда, ба ҳар кадоми онҳо туҳфаҳои хотиравии Раиси вилоят супорида шуд.

Сипас, Раиси вилоят аз филиали Корхонаи давлатии “Заводи протезию ортопедии шаҳри Душанбе” дар шаҳри Хуҷанд боздид намуда, бо фаъолияти он шинос гардид.

Дар ин бора аз хадамоти матбуоти Раиси вилояти Суғд хабар доданд.

Дафтари матбуоти
Раиси шаҳри Хуҷанд