18 Июл 2017

Дар толори Маркази фарҳанги шаҳри Хуҷанд бо роҳбарии Раиси шаҳри Хуҷанд Маъруф Муҳаммадзода ҷаласа оид ба ҷамъбасти шашмоҳаи соҳаҳои хоҷагии халқи шаҳр баргузор гардид.
Дар кори ҷаласа муовини Раиси вилояти Суғд Анвар Яъқубӣ, муовинони Раиси шаҳр, роҳбари дастгоҳи Раиси шаҳр, вакилони Маҷлиси вакилони халқи шаҳри Хуҷанд, мудирони шӯъбаҳо, сарварони макотиби олию миёна, беморхонаю дармонгоҳҳо, намояндагони мақомоти ҳифзи ҳуқуқ, раисони кумитаи маҳаллаҳо, кормандони васоити ахбори омма ва фаъолони дигар иштирок карданд.
Ҷаласа бо сухани ифтитоҳии Раиси шаҳри Хуҷанд Маъруф Муҳаммадзода оғоз гардид ва сипас, ҳисоботи муовини Раиси шаҳр Аюбҷон Раҳматзода оид ба натиҷаҳои фаъолияти шашмоҳаи иҷтимоӣ ва иқтисодии шаҳр дар соли 2017 шунида шуд. Аюбҷон Раҳматзода дар маърӯзаи худ зикр дошт, ки Мақомоти иҷроияи ҳокимияти давлатии шаҳри Хуҷанд дар партави Паёми Асосгузори сулҳу ваҳдати миллӣ - Пешвои миллат, мӯҳтарам Эмомалӣ Раҳмон ба Маҷлиси Олии Ҷумҳурии Тоҷикистон, дастуру супоришҳо ва нақшаи чорабиниҳои Ҳукумати ҷумҳурӣ фаъолияти худро ба роҳ монда, ба натиҷаҳои назаррас ноил гардид. Ҳамзамон, аз бурду бохти соҳаи саноат дар заминаи маълумотӣ оморӣ ибрози назар кард. Баъдан, мудири шӯъбаи иқтисод ва савдо Олимзода Усмон Собирӣ ва сардори Раёсати андоз Мунаввар Раҷабов аз ҷониби Раиси шаҳр ва муовини Раиси вилоят оид ба 4 намуди андози иҷронашуда пурсида шуданд. Баъди суолу ҷавоб атрофи масъалаи мазкур аз ҷониби шаҳрдор дастур дода шуд, ки то давраи ҳисоботи нӯҳмоҳа тамоми намуди андозҳо бояд ба пуррагӣ иҷро гарданд. Ҳамзамон дар рафти маҷлис вазъи нархи наво дар бозорҳои шаҳр мавриди баррасӣ қарор гирифт. Раиси шаҳри Хуҷанд Маъруф Муҳаммадзода изҳор дошт, ки ин масъала мардуми шаҳрро ба ташвиш овардааст. Аз ҷумла боло рафтани нархи меваҷот, сабзавот ва гӯшт ба назар мерасад, зикр намуд шаҳрдор.  Дар ин хусус мудири  шӯъбаи иқтисод ва савдо ва  роҳбарони бозорҳои шаҳр  вазифадор гардиданд, ки барои ба низом даровардани нархи наво дар бозор корбариро пурзӯр намоянд. {амзамон ба тозаву озода нигоҳ доштани дохилу атрофи бозор ва аз назар гузаронидани сифати маҳсулоти шириву гӯштӣ ба масъулин таъкид карда шуд.
Ҳамчунин, бо мудири шӯъбаи саноат Мӯъминҷон Муҳаммадҷонзода оид ба дастовардҳо ва камбудии соҳаи саноат муколама сурат гирифт. Раиси шаҳри Хуҷанд Маъруф Муҳаммадзода  ва муовини Раиси вилояти Суғд Анвар Яъқубӣ ба мудири шӯъбаи саноат оид ба сабабҳои кам шудани шумораи корхонаҳои саноатии  шаҳр, пурсиш ба амал оварданд.  Дар натиҷа ба мудири шӯъба дастур дода шуд, ки вазъи ба амаломадаро амиқ таҳлил намуда, баҳри ислоҳи камбудиҳо чора ҷӯяд.
Мудири шӯъбаи маориф Илҳом Султонӣ, роҳбарони муассисаҳои тиббӣ, сармеъмори шаҳр Абдумубин  Исоев, сардори  идораи замин  Абдухалил Ёрматов, директори Коргоҳи истифодабарии  роҳҳои шаҳр  Салимҷон Юнусов  ва дигар сохторҳо аз фаъолияти худ маълумот дода, ба саволҳои Раиси шаҳр ва муовини Раиси вилоят ҷавоб доданд.
Раиси шаҳри Хуҷанд аз дастовардҳо ва камбудиҳои тамоми соҳаҳои хоҷагии халқ сухан намуда, ба тамоми сохторҳо дастуру супоришоти мушаххас дод. Дар ин радиф таъкид намуд, ки Мақомоти иҷроияи ҳокимияти давлати шаҳри Хуҷанд пайваста дастуру ҳидоятҳои Асосгузори сулҳу ваҳдати миллӣ-Пешвои миллат, мӯҳтарам Эмомалӣ Раҳмонро сармашқи кори худ қарор дода баҳри ободиву пешравии Ватани маҳбуб тамоми қувваю малакаи худро равона хоҳанд намуд.
Дар анҷоми маҷлис муовини Раиси вилояти Суғд Анвар Яъқубӣ қайд намуд, ки барои пешравии кор ва расидан ба ҳадафҳои асосӣ бояд аз ғамхории роҳбарияти кишвар ва вилоят фаровон истифода намуд.  Зеро имрӯз шароти мусоид  баҳри ободтару зеботар гардидани шаҳри Хуҷанд  фароҳам омада, танҳо бо меҳнати софдилона ва муттаҳидӣ ба мақсади асосӣ расидан мумкин аст.