Машварат: “35 соли Истиқлол-оғози фардои дурахшон”

Иштирокчиёни машварат дастовардҳои 35 соли Истиқлоли давлатиро мавриди омӯзиш ва баррасӣ қарор доданд.

Нигора Муҳаммедова, муовини директор оид ба синфҳои ибтидоии МТМУ №9-и шаҳри Хуҷанд дар ин мавзуъ баромад намуда, аз ҷумла афзуд, ки дар аз азал то имрӯз илму дониш барои миллати тоҷик сарчашмаи неру, воситаи пешрафти ҷомеа ва пояи давлатдорӣ будааст. Бидуни дониш наметавон ба камол расид, ба худшиносӣ даст ёфт ва ҷомеаи мутамаддинро бунёд кард. Дар шароити мураккаби ҷаҳони муосир сулҳу субот ва ваҳдати миллӣ ҳамчун арзишҳои олии давлатдорӣ аҳамияти бештар пайдо намудаанд. Ҳар як шаҳрванд вазифадор аст, ки дар ҳифзи оромӣ, таҳкими ваҳдати миллӣ ва пешбурди маърифати ҷомеа саҳмгузор бошад.

Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон илму маърифатро меҳвари асосии сиёсати давлатӣ қарор дода, таъкид намудаанд:

«Баъди ба даст овардани истиқлол мо илму донишро пояи асосии рушди ҷомеа ва амнияти давлат эълон карда, аз ҷумла дар Қонуни Ҷумҳурии Тоҷикистон “Дар бораи амният” дарҷ намудем, ки хароб гардидани сифати таълим ва неруи зеҳнии мамлакат ҳамчун таҳдид ба амнияти давлат арзёбӣ мегардад».

Бо ҳамин мақсад дар кишвар пайваста тадбирҳо андешида мешаванд: таъсиси муассисаҳои нави таълимӣ, баланд бардоштани мақоми омӯзгорон, эълони озмунҳои илмӣ ва маърифатӣ барои ҷавонон ва фароҳам овардани шароити мутобиқ ба талаботи замони муосир. Ҳадаф аз ин ҳама тарбия намудани насли худшинос, соҳибмаърифат ва ватанпарвар мебошад.

Инкишофи маънавии кӯдак на танҳо вазифаи мактаб ва давлат, балки масъулияти муқаддаси падару модар низ ба шумор меравад. Қабули Қонуни Ҷумҳурии Тоҷикистон «Дар бораи масъулият барои таълиму тарбияи кӯдак» низ ба ҳамин ҳадаф равона шудааст.

Бо назардошти равандҳои ҷаҳонишавӣ ва рақобати афзояндаи байналмилалӣ, танҳо ҷомеае муваффақ мегардад, ки дорои низоми мукаммали маориф ва шаҳрвандони донишманду худшинос бошад.

Таъкид шуд, ки рисолати омӯзгор дар заҳматҳои шабонарӯзӣ ва садоқати пайвастаи ӯ зоҳир мегардад. Хушбахтона, фаъолияти омӯзгор беихтиёр имрӯзҳо дар зинаҳои гуногуни таълимӣ ва илмӣ назаррасанд. Президенти кишвар кӯшиш ба харҷ медиҳад то дар кутоҳтарин муҳлат обрӯ ва манзалати омӯзгор расман шинохта шавад.

Сипас дар синфхонаҳои алоҳида дарсҳои кушод бо ҳузури муовинони тарбиявии сарварони муассисаҳои таълимии шаҳр дар мавзуҳои “Дониши моро бубин”, “Давлатҳои ҷаҳон”, “Санҷиши зарб”, “Об аз куҷо меояд” ва ғайраҳо гузаронида шуданд. Баъдан машғулиятҳо таҳлилу баррасӣ гардиданд.

Чорабинии фарҳангии хонандагони МТМУ №9 таҳти унвони “35 соли Истиқлол-оғози фардои дурахшон” анҷомбахши машварат гардид.