12 Февраль 2026
Недоступен ни однин перевод.
Санаи 11 феврал Дар доираи нақша-чорабиниҳои тасдиқгардида ҷиҳати шарҳу тавзеҳи Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олии Ҷумҳурии Тоҷикистон, дар толори гимназияи №24-и шаҳри Хуҷанд бо сокинони маҳаллаи “Суғдиён”-и шаҳр вохӯрии судманд баргузор гардид.
Дар вохӯрӣ муовини раиси Кумитаи иҷроияи Ҳизби Халқии Демократии Тоҷикистон дар шаҳри Хуҷанд Маҳмадсалим Ҳаитов, мудири шуъбаи кор бо маҳаллаҳои Дастгоҳи Раиси шаҳри Хуҷанд Муродҷон Раҷабов, сардори Агентии меҳнат ва шуғли аҳолӣ дар шаҳр Султон Ғафуров, фаъолони маҳалла, омӯзгорон, ҷавонон ва сокинони маҳал иштирок намуданд.
Зимни баромадҳо зикр гардид, ки Паёми Президенти Ҷумҳурии Тоҷикистон ҳамчун ҳуҷҷати муҳими стратегӣ самтҳои асосии сиёсати дохилию хориҷии кишварро муайян намуда, рушди соҳаҳои иқтисодиёт, иҷтимоиёт, маориф, тандурустӣ, таъмини шуғли аҳолӣ, дастгирии ҷавонон ва занон, инчунин таҳкими ваҳдати миллӣ ва сулҳу суботро дар бар мегирад.
Маҳмадсалим Ҳаитов дар баромади худ ба нақши Ҳизби Халқии Демократии Тоҷикистон дар татбиқи ҳадафҳои созанда ва сиёсати пешгирифтаи роҳбарияти давлат таъкид намуда, сокинонро ба иштироки фаъолона дар корҳои ҷамъиятӣ, риояи қонунгузорӣ ва саҳмгузорӣ дар ободонии маҳалла даъват кард.
Муродҷон Раҷабов оид ба масъалаҳои ҳамкории мақомоти иҷроияи маҳаллӣ бо маҳаллаҳо, беҳтар намудани сатҳи хизматрасонӣ ба аҳолӣ ва ҳалли мушкилоти мавҷуда ибрози назар намуда, зикр кард, ки пешниҳоду дархостҳои сокинон ҳамеша мавриди таваҷҷуҳи роҳбарияти шаҳр қарор доранд.
Султон Ғафуров доир ба масъалаҳои таъмини шуғли аҳолӣ, таъсиси ҷойҳои нави корӣ, омӯзишҳои касбӣ ва имкониятҳои мавҷуда барои шаҳрвандони бекор маълумоти муфассал пешниҳод намуд.
Дар фарҷоми вохӯрӣ сокинон доир ба масъалаҳои рӯзмарраи худ саволҳо пешниҳод намуда, посухҳои мушаххас гирифтанд. Таъкид гардид, ки чунин вохӯриҳо ба таҳкими робитаи давлату ҷомеа мусоидат намуда, барои баланд бардоштани маърифати сиёсӣ ва иҷтимоии шаҳрвандон нақши муҳим доранд.
Дафтари матбуоти
Раиси шаҳри Хуҷанд
