20 Январ 2026
Имрӯз маҷлиси ҷамъбасти фаъолияти КИ ҲХДТ дар шаҳри Хуҷанд барои давраи соли 2025 ва вазифаҳо барои фаъолияти минбаъда баргузор шуд.
Дар ҷаласа муовини Раиси ҲХДТ Мирзоқосим Каримзода, Раиси шаҳри Хуҷанд Фирдавс Шарифзода, Раиси КИ ҲХДТ дар вилояти Суғд Ҷаҳонгир Салимзода ва аъзои фаъоли ҳизб иштирок намуданд.
Нахуст ҳисоботи раиси Кумиҷроияи ҲХДТ дар шаҳри Хуҷанд Мунзифа Ҷабборӣ фаъолияти КИ ҲХДТ дар шаҳри Хуҷанд барои давраи соли 2025 шунида шуд, ҳамчунин вазифаҳо барои соли 2026 муайян карда шуданд.
Дар музокира ректори ДДҲБСТ Шероз Муъминзода, сартабиби дармонгоҳи дандонпизишкии вилоят Илҳом Саидзода баромад намуданд.
Гузориши гуруҳи вакилони ҳизбӣ дар Маҷлиси вакилони халқи шаҳри Хуҷанд оид ба фаъолият дар соли 2025 низ шунида шуд.
Сипас нақшаи чорабиниҳо вобаста ба шарҳу тавзеҳи Паёми Президенти мамлакат муҳтарам Эмомалӣ Раҳмон ба Маҷлиси Олӣ ва нақшаи чорабиниҳо доир ба роҳандозии корҳои созандагиву ободкорӣ дар шаҳри Хуҷанд бахшида ба эълон гардидани соли 2026 “Соли вусъат додани корҳои ободониву созандагӣ ва тақвияту таҳкими худшиносиву худогоҳии миллӣ” тасдиқ карда шуд.
Муовини Раиси Ҳизби Халқии Демократии Тоҷикистон Мирзоқосим Каримзода зимни суханронӣ аҳамияти узвият дар сафи Ҳизби Халқии Демократии Тоҷикистонро ҳамчун мактаби садоқат ба давлат, Пешвои миллат ва арзишҳои миллиро таъкид намуд.
Зикр кард, ки ҳар як шаҳрвандон, махсусан ҷавонон, бояд бо эҳсоси ватандӯстӣ ва масъулиятшиносӣ дар татбиқи ҳадафҳои стратегии давлат саҳми худро гузоранд, зеро шомилшавӣ ба сафи Ҳизби Халқии Демократии Тоҷикистон на танҳо ифтихор, балки масъулияти ҷиддиро тақозо мекунад.
Раиси шаҳри Хуҷанд Фирдавс Шарифзода дар ҷаласа баромад намуда, аз ҷумла афзуд, ки Ҳизби Халқии Демократии Тоҷикистон чун ҳизби ормонӣ ва воқеан ҳам, мардумӣ дар таҳкими оромиву суботи сиёсии мамлакатамон нақши калон дорад. Ин ташкилот аз рӯзҳои аввали таъсисёбии худ таҳти роҳнамоии Асосгузори сулҳу ваҳдати миллӣ, Пешвои миллат муҳтарам Эмомалӣ Раҳмон мавқеи раиятдӯстонаро пеш гирифта, бо барномаҳои мукаммали худ дар беҳдошти вазъи сиёсӣ, иҷтимоиву маънавии мамлакатамон саҳми босазо гузоштааст.
Дар сафҳои он сиёсатмадорони варзида, олимону адибони тавоно ва ниҳоят ҳизбиёни содиқу вафодор сарҷамъ омада, тавассути дониш, малака ва иродаи худ ҳадафҳои стратегии давлатро миёни омма роҳандозӣ мекунанд. Ва дар ин ҷода муваффақ ҳам ҳастанд. Мо ҳамарӯза дастгирии аъзо ва пайравони ин ҳизби қудратмандро дар фаъолиятамон эҳсос менамоем.
Воқеан ҳам, омили зуд маҳбубият пайдо намудани Ҳизби Халқии Демократии Тоҷикистон дар ҷомеа маҳз бо мардум сарукор гирифтану аз розу ниёзи онҳо огоҳ будан аст. Ин ниҳоди созанда ҷомеаи моро ба маҷрои дуруст ҳидоят намуда, ба сулҳу созиши миллӣ, ваҳдат расонд, таҳти роҳбарии он ҷомеа ба марҳилаи созандагиву бунёдкорӣ ворид шуд.
Хеле хушоянд аст, ки фаъолияти Ҳизби Халқии Демократии Тоҷикистон имрӯз мавсимӣ набуда, туфайли сафарбарии фаъолонаи аъзоёнаш ҳама самтҳои ҳаёти мардумро фаро мегирад ва ҳамеша фаъол аст.
Кумитаи иҷроияи Ҳизби Халқии Демократии Тоҷикистон дар шаҳри Хуҷанд ташкилоти муқтадир буда, дар сафҳои он зиёда аз 28 ҳазор аъзо дар 5 кумитаи иҷроияи ибтидоӣ ва 280 ташкилоти ибтидоӣ сарҷамъ шудаанд. Ин қувваи бузург, ки сиёсати давлатии кишварро дар ҳама соҳаҳои хоҷагии халқ муаррифӣ мекунад, дар кулли чорабиниҳои шаҳр иштироки фаъолона дорад. Махсусан, аёдати собиқадорони меҳнат, шахсони яккаву барҷомонда, ятимону бесаробонмондагон ва дастгирии оилаҳои ниёзманд дар якҷоягӣ хуб ба роҳ монда шуда, ҳамчунин, таҷлили ҳамагуна ҷашну маросимҳо дар ҳамбастагӣ доир карда мешавад. Мақомоти иҷроияи ҳокимияти давлатии шаҳр дар ташвиқу тарғиби ҳадафҳои стратегӣ такя ба аъзоёни ҳизб мекунад.
Сипас ба якчанд фаъолони ҳизб сипосномаҳо тақдим гардида, ҷавонон ба узвияти Ҳизби Халқии Демократии Тоҷикистон пазируфта шуданд.
Дафтари матбуоти
Раиси шаҳри Хуҷанд
