14 Октябр 2025
Имрўз дар толори Мақомоти иҷроияи ҳокимияти давлатии шаҳри Хуҷанд бо иштироки фаъолон ва намояндаи Мақомоти иҷроияи ҳокимияти давлатии вилояти Суғд таҳти роҳбарии Раиси шаҳри Хуҷанд Фирдавс Шарифзода ҷаласаи ҷамъбастии нишондиҳандаҳои хоҷагии халқи шаҳр дар 9 моҳи соли 2025 баргузор гардид.
Фирдавс Шарифзода, Раиси шаҳри Хуҷанд ҷаласаи фаъолонро ҳусни оғоз бахшида, иттилоъ дод, ки дар он нишондиҳандаҳои рушди иқтисодию иҷтимоии шаҳр дар нӯҳ моҳи соли 2025 баррасӣ гардида, вазифаҳо барои фаъолияти минбаъда муайян карда мешаванд.
Сипас, Бахтиёр Боқизода, муовини Раиси шаҳри Хуҷанд оид ба натиҷаҳои фаъолияти хоҷагии халқи шаҳр дар 9 моҳи соли 2025 маълумоти муфассал дода аз ҷумла афзуд, ки дар Мақомоти иҷроияи ҳокимияти давлатии шаҳри Хуҷанд баҳри таъмини босуботи дастуру супоришҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, мўҳтарам Эмомалӣ Раҳмон, қарорҳои Ҳукумати Ҷумҳурии Тоҷикистон, нишондодҳои Раиси вилоят Раҷаб Аҳмадзода, фаъолияти ҳамарўзаи худро дар самти суръатбахшии истеҳсолот, тараққиёти ҳамаи соҳаҳои хоҷагии халқ ба роҳ монда шуда, ҷиҳати пешбурди кулли паҳлуҳои ҳаёти ҷамъиятию сиёсӣ, иқтисодию иҷтимоӣ, равнақи созандагию бунёдкорӣ ва ободонӣ чораҳои амалӣ андешида истодааст.
Маврид ба зикри хос аст, ки кулли сокинон ва кормандони ҳамаи соҳаҳои истеҳсолию ғайриистеҳсолӣ ҳамеша ҷонибдори сиёсати пешгирифтаи давлату ҳукумат, ғояҳои хирадмандона ва ояндабинонаи Сарвари давлат муҳтарам Эмомалӣ Раҳмон буда, бо заҳмати ҳамарўзаи худ ба пешрафт ва шукуфоии Тоҷикистони соҳибистиқлол саҳмгузорӣ карда истодаанд, ки нишондиҳандаҳои ба дастовардаи нўҳ моҳи соли ҷорӣ аз он шаҳодат медиҳанд.
Иттилоъ дода шуд, ки дар ҳаҷми умумии маҳсулотҳои дар вилоят истеҳсолшаванда, шаҳри Хуҷанд ҳамчун яке аз шаҳрҳои калони саноатии ҷумҳурӣ заминаи устувор мегузорад.
Дар натиҷаи чораҳои андешидашудаи саривақтӣ дар ин давра 29 адад корхонаҳои хурду миёнаи истеҳсолӣ бо истифода аз технологияҳои муосир ва дорои 168 адад ҷойи корӣ, бо ҷалби зиёда аз 25,0 млн. сомонӣ сармояи мустақим сохта ба истифода дода шуда, миқдори умумии корхонаҳои саноатӣ 326 ададро ташкил дод.
Ин нишондиҳандаҳо дар раванди саноатикунонии босуръати кишвар, барои тақвияти соҳа, ҳамчун ҳадафи чоруми миллӣ ҷиҳати афзоиш ёфтани ҳаҷми маҳсулотҳои истеҳсолгардидаистода саҳми босазо гузошта истодааст.
Таҳлилҳо собит менамоянд, ки ҳаҷми умумии маҳсулоти саноатӣ 1,4 миллиард сомониро ташкил дода, аз ин миқдор 318,4 млн. сомонӣ маҳсулот ба давлатҳои хориҷии дуру наздик содирот карда шудааст, ки он нисбат ба ҳамин давраи соли гузашта 107,4 фоизро ташкил медиҳад. Ин нишондиҳанда барои рушду такомули ин соҳаи реалии иқтисодиёт, заминаи устувор гузошта истодааст.
Дар шаҳр шумораи корхонаҳои истеҳсолкунандаи маҳсулотҳои воридотивазкунанда торафт зиёд шуда, дар ин давра аз ҷониби 125 адад корхонаҳои хурду калон ба маблағи 763,7 млн. сомонӣ маҳсулот истеҳсол карда шудааст, ки он нисбат ба ҳамин давраи соли сипаригашта 129,2 млн. сомонӣ ё 20,4 банди фоизӣ зиёд гаштааст.
Аз таҳлилҳо бармеояд, ки дар давраи ҳисоботӣ шумораи корхонаҳои нисбат ба ҳамин давраи соли гузашта зиёд маҳсулот истеҳсол карда 16 адад зиёд шуда, теъдоди онҳо ба 237 адад расидааст.
Қайд кардан ҷоиз аст, ки натиҷаҳои комёбшудаи ин соҳа барои ғанӣ гардонидани бозори дохилӣ ва кам шудани маҳсулоти қаблан воридшаванда шароити мусоид фароҳам оварда, ҷиҳати такомули буҷети давлатӣ замина гузошта истода бошад ҳам, ҳоло дар ин самт имкониятҳои мавҷуда пурра истифода нашудаанд.
Бахтиёр Боқизода, муовини Раиси шаҳри Хуҷанд доир ба дигар нишондиҳандаҳои хоҷагии халқи шаҳр давоми 9 моҳи соли равон ҳисоботи муфассал дод.
Дар ҷараёни маҷлис муовини аввали Раиси шаҳри Хуҷанд Хайрулло Ғайбуллозода, муовинони Раиси шаҳр Муяссара Қаҳҳорӣ, Суҳроб Самадзода ва Ҷамшед Набизода доир ба самти фаъолияти хеш ва мушкилоти ҷойдошта маълумот доданд.
Раиси шаҳри Хуҷанд Фирдавс Шарифзода зимни пурсиш аз масъулини дахлдор доир ба бурду бохти шаҳрдорӣ таҳлилҳои амиқ намуда, барои рафъи камбудиҳои ҷойдошта ба масъулин дастуру супоришҳои мушаххас дод.
Мавзуъҳои меҳрварии ҷаласаи ҷамъбастӣ корҳои ободонию созандагӣ бахшида ба 35 солагии Истиқлолияти давлатии Ҷумҳурии Тоҷикистон, рушди соҳаи тиббу маориф, хизматрасонӣ ба аҳолӣ, саноат, сохтмон, омодагӣ ба зимистонгузаронӣ, иҷрои босифати нақшаи даъвати ҳарбии наваскарон, тарғиби худшиносиву худогоҳӣ, пешгирии амалҳои номатлуб, дурӣ аз фарҳанги бегона ва ғайраҳо буданд.
Дар ҷараёни маҷлис сардори Раёсати сармоягузорӣ ва идораи амволи давлатии вилояти Суғд Шарифҷон Ахмедов доир ба мавзуъоти рӯзмарра фикру мулоҳизаҳои хешро баён дошт.
Раиси шаҳри Хуҷанд Фирдавс Шарифзода фаъолияти шаҳрдориро дар 9 моҳи соли 2025 натиҷагирӣ намуда, барои амалӣ намудани нақшаҳои соли ҷорӣ ба масъулини дахлдор дастуру супоришҳо дод.
Дафтари матбуоти
Раиси шаҳри Хуҷанд
