31 Август 2025
Недоступен ни однин перевод.
МАОРИФ ОҒОЗИ ОҒОЗҲОСТ
Устодони собитқадам, омўзгорони гиромӣ!
Донишҷўён ва толибилмони азиз!
Ҳамасола бо оғози соли нави таҳсил Рўзи дониш ва баргузории дарси сулҳ дар қаламрави кишвар доир мегардад. Ба ин муносибат аз номи Мақомоти иҷроияи ҳокимияти давлатии шаҳри Хуҷанд ҳамаи шуморо самимона шодбод гуфта, дар фаъолияти пурмасъулу самарабахш ва рўзафзунатон баҳри таълиму тарбияи насли наврасу ҷавон барору комёбӣ, даст-овардҳои нав ба нав ва муваффақиятҳои бешумор таманно мекунам.
Дар сиёсати созанда ва маънавибунёди Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон низоми маориф ва таҳсилот дар мақоми аввал қарор дорад ва мактабу маориф доимо такягоҳи давлат ва тарғибгари ғояҳои навини он ба ҳисоб меравад. Маориф яке аз самтҳои афзалиятноки инкишофи давлат ба ҳисоб рафта, бе маорифи пешрафта ва низоми дурусти таҳсилот ба ҳадафҳои муҳиму созандаи давлатдорӣ расидан душвор аст. Ҳукумати Тоҷикистон аз нахустин марҳилаи ташаккулёбии Истиқлоли миллӣ, ки дар остонаи сивучаҳорсолагии он қарор дорем, ба рушди илму маориф ва нерўҳои ақлонии мамлакат таваҷҷўҳи беандоза зоҳир менамояд.
Барҳақ, Пешвои муаззами миллат аҳли илму маориф ва қувваи солими зеҳниро хазинаи тиллоии миллат номида, дар ҳама кору пайкор, ҳолатҳои тақдирсози душвор, ниятҳои наву таърихӣ ва муҳимтарин масоили ҳаёти сиёсию иқтисодӣ ва илмию фарҳангӣ, донишу таҷриба ва таклифу пешниҳодҳои аҳли маориф ва зиёро самаранок истифода менамоянд.
Устодону омўзгорони азиз!
Пешвои миллат, мўҳтарам Эмомалӣ Раҳмон дар яке аз суханрониҳояшон шаъну шарафи омўзгоронро чунин тавсиф намудаанд: «Миллате, ки омўзгори асил надорад, ҳеҷ гоҳ ба ягон мартаба нахоҳад расид. Ифтихор ва сари баланди мост, ки тоҷикон аз қадим соҳиби китобу қалам, илму маърифат ва олиму омўзгор буданд, ҳастанд ва дар оянда низ хоҳанд монд».
Таваҷҷўҳ ва ғамхориҳои рўзафзуни Президенти кишвар мўҳтарам Эмомалӣ Раҳмон ва Раиси вилояти Суғд Раҷаб Аҳмадзода нисбат ба соҳаи маориф, беҳдошти сифати таълиму тарбияи насли наврас, фароҳам овардани шароит ва имкониятҳои муосиру мусоиди таҳсил тавассути бунёди таълимгоҳҳои нав, таъмиру тармими бинои мактабҳо, бо таҷҳизоти техникии навтарин таъмин намудани онҳо аз ин далолат медиҳад.
Дар Қонуни Ҷумҳурии Тоҷикистон «Дар бораи масъулият барои таълиму тарбияи кўдак» омадааст, ки дар таълиму тарбияи кўдак дар баробари падару модар ҳамчунин мактаб ва ҷомеа низ масъулият дорад. Ин се ниҳоди бузург – оила, мактаб ва ҷомеа дар нашъу намо ва рушди кўдаку наврас саҳми ҷиддӣ гузошта, барои ояндаи кишвари маҳбубамон мутахассис ва фарзандони лоиқи давронро тарбия хоҳад намуд.
Басо рамзист, ки оғози соли нави таҳсил дар остонаи солгарди Истиқлоли давлатии Ҷумҳурии Тоҷикистон сурат мегирад. Умедворем, ки шумо - насли наврас ва ҷавон бо ифтихор аз шуҷоату мардонагии аҷдодони худ бо ҳисси баланди худогоҳию худшиносии миллӣ ва ватандўстию ватандорӣ минбаъд низ пояҳои бинои мўҳташами Истиқлол ва сулҳу суботро устуворӣ ва таҳким мебахшед. Кишвари азизамон Тоҷикистон ва шаҳрамон Хуҷанди бостонро чун ҳомиёни далеру тавоно, чун соҳибватанони ғаюр, чун сокинони сарбаланд пуштибонӣ мекунед ва дар пешрафташ саҳм мегузоред.
Бори дигар оғози фараҳбахши соли нави таҳсилро ба кулли устодону омўзгорони азиз ва донишҷўёну мактабиён таҳният гуфта, бароятон тансиҳатӣ, азму иродаи қавӣ ва дар роҳи тарбияи насли соҳибилму бомаърифат барору комёбиҳо таманно менамоям.
Оғози соли нави таҳсил муборак, устодону донишҷўён ва омўзгорону хонандагони азиз!
